1 यहोवा मीं सेइं ज़ोवं, "उठतां कुम्हारेरे घरे गा, 2 ते तैड़ी अवं तीं सेइं गल केरेलो।" 3 एल्हेरेलेइ अवं कुम्हारेरे घरे जेव ते मीं कुन हेरू कि शच्‍चे पुड़ किछ बन्ने लगोरूए! 4 ज़ैन मित्तरू भांड तै बनाने लगोरो थियो तैन बिगड़ी जेवं, तैखन तैनी तैस्से मित्तरू होरू भांड अपनि समझ़रे मुताबिक बनावं।

5 तैखन यहोवा मीं सेइं इन ज़ोवं, 6 "हे इस्राएलेरे घराने, यहोवा एन ज़ोते कि इस कुम्हारेरू ज़ेरू कुन अवं भी तुसन सेइं न केरि सेखी? हेर, ज़ेरि मित्ती कुम्हारेरे हथ्थे मां रहचे, तेन्च़रे ही हे इस्राएलेरे लोक, तुस भी मेरे हथ्थे मां आथ।✝ 7 ज़ैखन अवं कोन्ची कौम या रियासतरे बारे मां ज़ोईं कि तैस ढ्लूड़ेलो या बिछ़ोड़ेलो ते नाश केरेलो, 8 तैखन अगर तैस कौमरे लोक ज़ेसेरे बारे मां मीं ई गल ज़ोवरी भोए तैना अपने बुरैई करां फिरन, त अवं तैस मुसीबतरे बारे मां ज़ै मीं तैन पुड़ छ़डनेरो इरादो कियोरो भोए पसतालो। 9 ते ज़ैखन अवं कोन्ची कौम या रियासतरे बारे मां ज़ोईं कि अवं तैस बनेइलो ते लेइलो; 10 तैखन अगर तैना तैस कम्मे केरन ज़ैन मेरी नज़री मां बुरूए ते मेरी गल न मन्न, त अवं तैस भलैइयरे बारे मां पसतालो, ज़ै मीं तैन केरे केरनेरे लेई ज़ोवरू भोए। 11 एल्हेरेलेइ हुनी तू यहूदा प्रदेश ते यरूशलेम नगरेरे लोकन सेइं एन ज़ो, ‘यहोवा एन ज़ोते, हेरा, अवं तुश्शे नुक्सानेरी योजना ते तुश्शे खलाफ इंतज़ाम केरने लगोरोईं। एल्हेरेलेइ तुस अपने-अपने बुरे बत्ती करां फिरा ते अपनो-अपनो चाल च़लन ते कम सुधारा।’

12 "पन तैना जुवाब देले, ‘एरू न भोइसखे, असां त अपने खियालां केरे मुताबिक च़लमेले ते अपने बुरे मनेरे ज़िद्दी पुड़ बनोरे राले।’

13 "एल्हेरेलेइ प्रभु यहोवा एन ज़ोते, कौमां केरे लोकन पुछ़ा कि एरी गल्‍लां कुन कधे केन्चेरे शुन्ने मां एवरिन? इस्राएलेरे कुइयां* ज़ैन कम कियूं तैसेरे शुन्ने सेइं शिलकंटे खड़े भोतन। 14 कुन लबानोनेरो हिवं ज़ै चट्टानी पुड़ां मैइदाने मां बगते बन्द भोइ सकते? कुन तैन ठंडू पानी ज़ैन दूरेरां बगते कधे शुक्‍की सकते? 15 पन मेरे लोकेईं अवं बिसरो; तैना फुज़ूल मूरती केरे लेई गुग्गल बालतन; तैनेईं अपने पुराने ज़मानेरे बत्तन मां ठोकर खेवरीए, ते सड़कां छ़ेडतां बत्तन मां भटकतन। 16 एस सेइं तैन केरो मुल्ख एन्च़रे उज़ड़ी जेवरोए कि लोक तैस पुड़ हमेशा च़ैड़ी देते राले; ते ज़ै कोई तैस मेइं च़ले तै हैरान भोल्हो ते क्रोड़ी हिलालो। 17 अवं तैन पूर्वेरे हवाई सेइं उज़ैड़तां दुश्मनेरे सामनेरां तितर-बितर केरेलो। तैन केरे मुसीबतरे दिहाड़े अवं तैन तुत्तर नईं पन पिठ हरेइलो।"

18 तैखन लोक एप्पु मां ज़ोने लगे, "च़ला, यिर्मयाहेरे खलाफ योजना केरम, किजोकि न याजके करां कानून, न ज्ञानी करां सलाह, न नेबी करां वचन दूर भोल्हे। एज्जा, असां तैसेरी कोई गल ट्लेइतां तैस नाश कराम ते फिरी तैसेरी कोन्ची गल्‍ली पुड़ ध्यान न देम।"

19 एल्हेरेलेइ मीं ई प्राथना की, हे यहोवा, मेरे पासे ध्यान दे, ते ज़ैना लोक मीं सेइं लड़तन तैन केरि गल्‍लां शुन। 20 कुन भलियैइयरी बदले मां बुरैइारो सलूख कियो गाए? तू एस गल्‍ली याद केर कि अवं तैन केरि भलैइयरे लेई तेरे सामने प्राथना केरनेरे लेई खड़ो आईं, ज़ैस सेइं तेरी जलजलाहट तैन पुड़ां दूर गाए, ते हुनी तैनेईं मेरे प्राण नेनेरे लेई खड्डो घड़ोरोए। 21 एल्हेरेलेइ तैन केरे बाल-बच्‍चन नियन्ने मरने दे, तैना तलवारी सेइं केटोइतां मरन, ते तैन केरि कौन्शां बेऔलाद ते विधवा भोइ गान। तैन केरे मड़द मरी सेइं मरन, ते तैन केरे जुवान लड़ैई मां तलवारी सेइं मरन। 22 ज़ैखन तू तैन पुड़ अचानक दुश्मना केरि सेना च़ाढ़स, तैखन तैन केरे घरन मरां चिन्डां केरि शौर शुनोए! किजोकि तैनेईं मेरे लेई खड्डो घड़ो ते मीं फसानेरे लेई फंदे लाए। 23 हे यहोवा, तू तैन केरि सब योजना ज़ानतस ज़ैना तैना मेरी मौतरे लेई बनातन। एल्हेरेलेइ तू तैन केरो ई अधर्म न माफ़ केर, न तैन केरो पाप अपने सामनेरां मिटा। तैना तेरे हेरते-हेरते ठोकर खेइतां बिछ़ड़ी गाले, अपने क्रोधे मां एइतां तैन सेइं एरहो बर्ताव केर।