1 यहोवा यिर्मयाह नेबी अक होरो सन्देश दित्तो, तैनी ज़ोवं: 2 "यहोवारे भवनेरे फाटके मां खड़ो भो, ते ऐह वचन प्रचार केरतां ज़ो, हे सब यहूदी लोकव, तुस ज़ैना यहोवारी आराधना केरने लेई एन फाटकां केरे ज़िरिये दाखल भोतथ, यहोवारू वचन शुना। 3 सेना केरो यहोवा ज़ै इस्राएलेरो परमेशरे, तै एन ज़ोते, अपनि-अपनि चाल ते कम्मां सुधारा, तैखन अवं तुसन एस ठैरी मां बस्सोरे राने देइलो। 4 तुस लोक एन ज़ोइतां झूठी गल्‍लन पुड़ भरोसो न केरा, ‘ईए यहोवारो भवने, ईए यहोवारो भवने, ईए यहोवारो भवने।’

5 "अगर तुस सच़्च़े अपनि-अपनि चाल ते कम्मां सुधारथ, ते सच़्च़े लोकां केरे दरमियान न्याय केरथ, 6 परदेशी ते अनाथ ते विधवा पुड़ अंधेर न केरथ; एस ठैरी मां बेकसूरेरो कत्ल न केरथ, ते होरि देबतां केरि पूज़ा न केरथ, ज़ैस सेइं तुश्शो नुकसान भोते, 7 त अवं तुसन एस नगरे मां, ते एस मुल्खे मां ज़ै मीं तुश्शे दादे-पड़दादन दित्तोरो थियो, हमेशारे लेई राने देइलो।

8 "हेरा, तुस झूठी गल्‍लन पुड़ भरोसो रखतथ ज़ैन सेइं कोई फैइदो न भोइ सके। 9 तुस च़ोर, कत्ल ते व्यभिचार केरतथ, झूठी कसम खातथ, बाल देबतेरे लेई गुग्गल बालतथ, ते होरि देबतां केरि आराधना केरथ ज़ैन तुस पेइले न थिये, 10 त कुन इन जाइज़े कि तुस एस भवने मां एज्जा ज़ैस जो मेरो ज़ोतन, ते मेरे सामने खड़े भोइतां इन ज़ोथ, ‘असां एल्हेरेलेइ छुटी जेवरेम’ कि इना सब भिट्टां कम्मां केरम? 11 कुन ऐह भवन ज़ैस जो मेरो ज़ोतन, तुश्शी नज़री मां डैकू केरि कुढ भोइ जेवरोए? मीं एप्पु एन ज़ोवरूए, यहोवा एन ज़ोते।✝

12 "शीलो नगरे मां गाथ, ज़ैड़ी मीं पेइलो अपनो पवित्र तेम्बु खड़ो कियोरो थियो, तैड़ी गेइतां हेरा कि मीं अपने इस्राएली लोकां केरे बुरैइारे वजाई तैसेरी कुन हालत कियोरीए? 13 हुनी यहोवा कुन ज़ोते शुना, कि तुस ज़ैन इना सब कम्मां केरते एवरेथ, ते अगर अवं तुसन सेइं बार-बार गल केरि राहोरोईं, फिरी भी तुसेईं न शुनू, ते तुसन कुजातो अव पन तुस न कुज्जे, 14 एल्हेरेलेइ ई भवन ज़ैस जो मेरो ज़ोतन, ज़ैस पुड़ तुस भरोसो केरतथ, ते ई ठार ज़ै मीं तुसन ते तुश्शे दादे-पड़दादन दित्तोरी थी, एसेरी हालत अवं शीलो नगरेरी ज़ेरि केरेलो। 15 ते ज़ेन्च़रे मीं तुश्शे सब ढ्ला यानी सारे एप्रैमी लोक अपने सामनेरां दूर कियोरेन, तेन्च़रे तुसन भी दूर केरेलो।"

16 यहोवा मीं सेइं ज़ोवं, "हे यिर्मयाह, इन लोकां केरे लेई प्राथना न केर, न एन लोकां केरे लेई उच्‍ची आवाज़ी सेइं फरियाद केर ते न मीं कां बिनती केर, किजोकि अवं तेरी न शुनेलो। 17 कुन तू न हेरस कि इना लोक यहूदारे नगरन ते यरूशलेम नगरेरी सड़कन मां कुन केरि राहोरेन? 18 हेर, बाल-बच्‍चे त कैड़ु आनतन, बाजी अग बालतन ते कौन्शां अट्टू सेनतिन, कि देबरे लेई रोट्टी च़ाढ़न ज़ैस जो तैना सुर्गेरी रानी ज़ोतन; ते बाकी देबतां केरे लेई पीनेरी च़ढ़तल च़ैढ़तां मीं सरकातन। 19 यहोवा एन ज़ोते, कुन तैना मीएं सरकातन? कुन तैना अपने आपे नईं ज़ैस सेइं तैन केरे तुत्तरे पुड़ उदासी पे? 20 एल्हेरेलेइ प्रभु यहोवा एन ज़ोवरूए, कुन मैन्हु, कुन जानबर, कुन मैइदानेरे बुट, कुन ज़मीनरी फसल, तैन सेभन पुड़ ज़ैन किछ इड़ी भवने कांए, मेरे क्रोधेरी अग भड़कने बालीए; तै लगातार बलती राली ते कधे न हिश्शेली।"

21 सेना केरो यहोवा ज़ै इस्राएलेरो परमेशरे, एन ज़ोते, "अपने मेलबेलि सेइं साथी अपने होमबलि भी च़ाढ़ा ते मास खाथ। 22 किजोकि ज़ैस वक्त मीं तुश्शे दादे-पड़दादे मिस्र मुल्खे मरां कढे, तैस मौके मीं तैन होमबलि ते मेलबेलरे बारे मां कोई हुक्म न थियो दित्तोरो। 23 पन मीं त तैन ऐह हुक्म दित्तो कि मेरू वचन मन्ना, तैखन अवं तुश्शो परमेशर भोनोईं, ते तुस मेरे लोक भोल्हे; ते ज़ैस बत्तरे बारे मां अवं तुसन हुक्म देईं तैस्से मां च़ला, तैखन तुश्शू भलू भोल्हु। 24 पन तैनेईं मेरी न शुनी ते न मेरी गल्‍लन पुड़ ध्यान दित्तू; तैना अपनि योजना ते अपने बुरे मनेरे ज़िद्दी पुड़ च़लते राए ते पत्रोवं मुड़ी जे अग्रोवं न च़ले। 25 ज़ैस दिहाड़े तुश्शे दादे-पड़दादे मिस्र मुल्खे मरां निस्से, तैस दिहाड़े करां अज़्ज़ेरे दिहाड़े तगर अवं त अपने सारे दासन, नेबन तुसन कां लगातार भेज़तो राव; 26 पन तैनेईं मेरी न शुनी, न ध्यान दित्तू; तैनेईं ज़िद की, ते अपने दादे-पड़दादन करां जादे बुरैई की।"

27 "तू सब गल्‍लां तैन सेइं ज़ोलो पन तैना तेरी न शुनेले; तू तैन कुजालो, पन तैना न कुज्जेले। 28 तैखन तू तैन सेइं ज़ोइयां, ‘ऐह तैए कौमे ज़ैनेईं अपने परमेशर यहोवारी न शुनी, ते तैन सज़ाह मैलतां भी तैनेईं न मन्नू; सच़्च़ाई मुक्‍की जेई, ते तैन केरे ऐशी मरां दूर भोइ।

29 "‘अपनो दोग केटतां शारा; पहाड़न पुड़ गेइतां मातमेरू गीत ज़ो, किजोकि यहोवा इस वक्तेरे लोकन सेइं क्रोध कियो ते तैना निकम्मे सेमझ़तां छ़ेडी दित्ते।’

30 "यहोवा एन ज़ोते, एसेरी वजा ऐह आहे कि यहूदी लोकेईं तैन कम कियोरूए, ज़ैन मेरी नज़री मां बुरूए; तैनेईं तैस भवने मां ज़ैस जो मेरो ज़ोतन, एपनी भिट्टी मूरती रेखतां तै अशुद्ध कियो। 31 ते तैनेईं हिन्नोम खानदानेरे लोकां केरे वैदी मां तोपेत नव्वेंरी वेदी बनेइतां, अपना मट्ठां कुइयां अग्गी मां फुकतां बलिदान कियां; ज़ेसेरो हुक्म मीं कधे नईं दित्तोरो ते न मेरे मने मां तै कधे अव। 32 यहोवा एन ज़ोते, एल्हेरेलेइ एरे दिहाड़े एइतन कि तैस वैदी जो न त फिरी तोपेत ते न हिन्नोम खानदानेरे लोकां केरू ज़ोवं गालू, बल्के तैस जो कत्लेरी वादी ज़ोले; ते तोपते मां एत्री कब्रां भोल्ही कि तैड़ी ठार नईं राली। 33 एल्हेरेलेइ एन लोकां केरि लाशां अम्बरे च़ुड़ोलू ते धेरतरे जानबरां केरि खूराक भोल्ही, ते तैन निशान्ने बालो कोई न भोल्हो। 34 तैस मौके अवं एरू केरेलो कि यहूदारे नगरन ते यरूशलेमेरी सड़कन मां न त खुशी ते आनन्देरी आवाज़ शुनोली, ते न मारहव ते न मारहैनरी; किजोकि मुल्ख उज़ड़ी गालो।"✝