यिर्मयाह 17

यहूदा प्रदेशेरे लोकां केरो पाप

1 यहोवा ज़ोते, "यहूदारे प्रदेशेरे लोकां केरो पाप लोंहेरी टाँकी ते हीरेरे नोकी सेइं लिखोरोए; तै तैन केरे दिलेरे तेख्ती ते तैन केरि वेदी केरे शिंगन पुड़ भी घड़ाई कियोरोए। 2 तैन केरि वेदी ते अशेरा देबरी मूरती ज़ैना सब्ज़ बुट्टन कां ते उच्‍चे पहैड़न पुड़ आन, तैना तैन केरे मट्ठन भी याद रैतिन। 3 हे मेरे पहाड़, तू ज़ैन मैइदाने मां आस, तेरी धन दौलत ते भण्डार अवं पापेरे वजाई सेइं लुटाने देलो, ते तेरी पूज़ा केरनेरी ठारां ज़ैना तेरे मुल्खे मां आन। 4 तू अपने पापेरे वजाई सेइं अपने तैस हिस्सेरो अधिकारी न रेई बटेलो ज़ै मीं तीं दित्तोरोए, ते अवं एरू केरेलो कि तू बखले मुल्खे मां अपने दुश्मना केरि सेवा केरेलो, किजोकि तीं मेरे सरकरी अग एरी भड़केवरीए ज़ै हमेशा बलती राली।"

लानत ते आशिर्वाद

5 यहोवा एन ज़ोते, "लानतीए तै मैन्हु ज़ै मैन्हु पुड़ भरोसो रखते, ते तैसेरो सहारो नेते, ज़ेसेरो मन यहोवा करां दूर भोते। 6 तै खुशक मुल्खेरे झ़ैलेरो ज़ेरो भोल्हो ते कधे भलियाई न हेरेलो। तै खुशक मुल्खे ते गैर आबाद ते लूनी ज़मीनी पुड़ बसेलो।

7 "धने तै मैन्हु ज़ै यहोवा पुड़ भरोसो रखते, ज़ेसेरी उमीद परमेशरे पुड़े। 8 तै तैस बुट्टेरो ज़ेरो भोल्हो ज़ै दरियारे बन्ने पुड़ लगोरो भोए ते तैसेरां ज़ीलां पैनी कां फैलोरां भोन; ज़ैखन धुप भोल्ही तैखन तैस न लग्गेली, तैसेरे पट्लां सब्ज़ रालां, ते शोहेरे वक्ते मां भी तैसेरे लेई कोई फिक्र न भोल्ही, किजोकि तैस, तैस वक्त भी फल लगतो रालो।"

धोखेबाज़ मन

9 "मन त सब चीज़न करां धोखो देनेबालो भोते, तैस मां एरहो रोग लगोरोए ज़ेसेरो कोई आलाज़ नईं; तैसेरो भेद कौन सेमझ़ी सकते? 10 पन अवं यहोवा दिल दिमाग परखताईं ताके हर अक मैन्हु तैसेरे कम्मां केरे मुताबिक बदलो देईं।"✝17:10 1 पत. 1:17;प्रका. 2:23;20:12-13;22:12.

11 ज़ैन गैर न्याय सेइं दौलत अकोट्ठी केरते तै तैस तितरेरो ज़ेरोए ज़ै होरी च़ुड़ोली केरे दित्तोरे बेट्टन ज़ाऊ देतीए, तै अध्धे उमरी मां तैस धने शारते, ते आखरी मां तै बेवकूफ ठहरते।

12 इश्शो पवित्र भवन शुरू करां उच्‍चे ठहरी रखोरे एक्‍की महिमा बाले तखतेरो ज़ेरोए। 13 हे यहोवा, हे इस्राएलेरी उमीद, ज़ेत्रे लोक तीं करां दूर भोतन तैना सब शरमिन्दा भोल्हे; ज़ैना तीं करां दूर भोइ गातन तैन केरां नव्वां ज़मीनी पुड़ लिखां गालां, किजोकि तैनेईं ज़िन्दगी देनेबालो यहोवा शारोरोए।

यिर्मयाहेरी बिनती

14 हे यहोवा मीं बझ़ा, तैखन अवं बेझ़ोइलो; मीं बच़ा, तैखन अवं बच़ेलो; किजोकि अवं तेरी ही तारीफ़ केरताईं। 15 शुन, यहूदा प्रदेशेरे लोक मीं सेइं ज़ोतन, "यहोवारू वचन कोड़िए? तैना हुन्ना पूरू भोए!" 16 पन तू मेरो हाल ज़ानतस, मीं तीं पत्ती च़ेलतां जल्दबाज़ी केरतां पुहालेरू कम नईं शारोरू; न मीं तैस एजनेबाली मुसीबतरे दिहाड़ेरी उमीद कियोरीए; ज़ैन किछ मीं ज़ोवं तैन तीं पुड़ बांदू थियूं। 17 मीं न डरा; मुसीबतरे दिहाड़े तू मेरी छ़पनेरी ठार आस। 18 हे यहोवा, मेरी उमीद ट्लुटने न दे, मेरे सताने बाला केरि उमीद ट्लुटे; तैन्ने परेशान केर; पन मीं न उमीद भोने करां बच़ा; तैन पुड़ मुसीबत छ़ड ते तैन चकनाचूर केर!

थैकरी दिहाड़ी पवित्र मनानी

19 यहोवा मीं सेइं एन ज़ोवं, "गेइतां आम फाटके मां खड़ो भो ज़ैस मांमेइं यहूदा प्रदेशेरो राज़ो बल्के यरूशलेम नगरेरे सब लोक अन्तर बेइर एइतन गातन; 20 ते तैन सेइं ज़ो, ‘हे यहूदारे राज़व ते सब यहूदी लोकव, हे यरूशलेमेरे सब लोकव, ते सब लोकव ज़ैना एन फाटकन मांमेइं अन्तर गातन, यहोवारू वचन शुना। 21 यहोवा एन ज़ोते, खबरदार राथ, आरामेरे दिहाड़े कोई भारो न छ़ूथ; ते न कोई बोझ यरूशलेमेरे फाटकन अन्तर आनां।✝17:21 यूह. 5:10. 22 आरामेरे दिहाड़े अपने घरेरां भी कोई बोझ बेइर न नेथ ते न कोन्ची किसमेरू कम काज़ केरा, बल्के तैस हुक्मेरे मुताबिक ज़ै मीं तुश्शे दादे-पड़दादन दित्तोरो थियो, आरामेरे दिहाड़े पवित्र मन्ना। 23 पन तैनेईं न शुनू ते न ध्यान दित्तू, पन इसेरे बदले ज़िद की ते न शुनू ते झ़िड़की सेइं भी न मन्नू।

24 "‘पन अगर तुस सच़्च़े मेरी शुनथ, यहोवारू एन ज़ोते, ते आरामेरे दिहाड़े एस नगरेरे फाटकां केरे अन्तर कोई बोझ न आनां ते आरामेरे दिहाड़े पवित्र मन्ना, ते तैस मां कोन्ची किसमेरू कम काज़ न केरा, 25 तैखन त दाऊदेरे तखते पुड़ बिशोरो राज़ो, रथ ते घोड़न पुड़ सुवार हाकिम ते यहूदा प्रदेशेरे लोक ते यरूशलेम नगरेरे रानेबाले एस नगरेरे फाटकन मांमेइं भोइतां दाखल भोल्हे ते इन नगर हमेशा बस्सोरू रालू। 26 लोक होमबलि, मेलबलि, अन्नबलि, लोबान ते शुक्रेरी बलि एन्हतां यहूदारे नगरन ते यरूशलेमेरे आसे-पासेरां, बिन्यामीनेरे इलाके ते मुल्खेरे बुनीयें हिस्से मरां, पहाड़ी मुल्ख ते दक्षिण मुल्खेरां, यहोवारे भवने मां एज्जेले। 27 पन अगर तुस मेरी शुन्तां आरामेरे दिहाड़े पवित्र न मन्नथ, ते तैस दिहाड़े यरूशलेमेरे फाटकन मां बोझ एन्हतां दाखल भोथ, त अवं यरूशलेमेरे फाटकन मां अग लेइलो; ते तैस सेइं यरूशलेमेरे मेहल भी भस्म भोइ गाले ते तै अग फिरी न हिश्शेली।’"