यिर्मयाह 11

करार याद करानो

1 यहोवा यिर्मयाह सेइं ज़ोवं, 2 "इस करारेरे वचन शुना, ते यहूदा प्रदेश ते यरूशलेम नगरेरे लोकन सेइं ज़ोथ। 3 इस्राएलेरो परमेशर यहोवा एन ज़ोते, लानती आन्न तैना मैन्हु, ज़ैना इस करारेरे वचन न मन्न, 4 ज़ै मीं तुश्शे दादे-पड़दादन सेइं कियोरो थियो, ज़ैखन तैना मिस्र मुल्खे मरां कढे, तैस ठारारां ज़ै तैन केरे लेई लोंह गालनेरे भेट्ठरी ज़ेरि थी, तैखन मीं ज़ोवं, मेरी शुना, ते ज़ेत्रे हुक्म अवं तुसन देताईं तैन्न मन्ना। इस सेइं तुस मेरे लोक ठहरेले, ते अवं तुश्शो परमेशर ठहरेलो; 5 ते ज़ै वाधो मीं तुश्शे दादे-पड़दादन सेइं कियोरो थियो कि ज़ैस मुल्खे मां दुद्ध ते मैछ़ेरी गड्डां*11:5 दुद्ध ते मैछ़ेरी गड्डां मतलब फलदार मुल्ख। बेगचन, तैस अवं तुसन देइलो, तैस पूरो केरेलो; ते हेरा, तै पूरी भोवरोए।" एन शुन्तां मीं ज़ोवं, "हे यहोवा, आमीन।"

6 तैखन यहोवा मीं सेइं ज़ोवं, "इना सब वचन यहूदारे नगरन ते यरूशलेमेरी सड़कन मां प्रचार केरतां ज़ो, इस करारेरे वचन शुना ते तैसेरे मुताबिक च़ला। 7 किजोकि ज़ैस वक्ते करां मीं तुश्शे दादे-पड़दादे मिस्र मुल्खे मरां छुटाए तैखन करां अज़्ज़ेरे दिहाड़े तगर तैन बार-बार खबरदार केरतो एवरोईं, मेरी गल्‍लां शुना। 8 पन तैनेईं न शुनी ते न मेरी गल्‍लन पुड़ ध्यान दित्तू, पन अपने-अपने बुरे मनेरे ज़िद्दी पुड़ च़लते राए। एल्हेरेलेइ मीं तैन केरे बारे मां इन करारेरी सेभी गल्‍लां पूरी कियोरी आन ज़ैन केरे मन्नेलो हुक्म मीं तैन दित्तोरो थियो ते तैनेईं न मन्नू।"

9 फिरी यहोवा मीं सेइं ज़ोवं, "यहूदा प्रदेश ते यरूशलेम नगरेरे लोकेईं बगावत कियोरीए। 10 ज़ेन्च़रे एन केरे दादे-पड़दादे मेरे वचन शुन्ने करां इन्कार केरते थिये, तेन्च़रे इना भी तैन केरां ज़ेरां अधर्मेरां कम्मां केरतां होरि देबतां केरि पूज़ा केरतन; इस्राएल ते यहूदारे लोकेईं तै करार ट्लोड़ो ज़ै मीं तैन केरे दादे-पड़दादन सेइं कियोरो थियो। 11 एल्हेरेलेइ यहोवा एन ज़ोते, हेर, अवं एन पुड़ एरी मुसीबत छ़डने पुड़ आईं ज़ैस सेइं इना बेच़ी न सकेले; ते चाहे इना मीं कां मद्दतरे लेई फरियाद केरन फिरी अवं तैन केरि न शुनेलो। 12 तैस मौके यरूशलेम ते यहूदारे नगरां केरे रानेबाले तैन देबतन कां मिन्नत केरेले ज़ैन केरे लेई तैना गुग्गल बालतन, पन तैना तैन केरे मुसीबतरे मौके तैन कधे न बच़ेइ सकेले। 13 हे यहूदा, ज़ेत्रे तेरे नगर आन तेत्रे ही तेरे देबते भी आन; ते यरूशलेम नगरेरे रानेबाले लोकेईं हर एक्‍की सड़की मां तैस बेशर्म बालेरी वेदी बनेइतां तैसेरे लेई गुग्गल बालोरोए।

14 "एल्हेरेलेइ हे यिर्मयाह, तू मेरे एन लोकां केरे लेई प्राथना न केर, ते न कोई एन लोकां केरे लेई उच्‍ची आवाज़ी सेइं बिनती केरे, किजोकि ज़ैस मौके इना अपनि मुसीबतरे मारे मीं कां फरियाद केरेले, तैखन अवं तैन केरि न शुनेलो। 15 मेरी ट्लारी मेरे भवने मां किजो अई? किजोकि तैसां त बड़न सेइं कुकर्म कियोरोए, ते तेरी पवित्रता पूरे तरीके सेइं च़लती जेवरीए। ज़ैखन तू बुराई केरतिस, तैखन खुश भोतिस।✝11:15 भज. 50:16. 16 यहोवा तींजो सब्ज़, मन पसंद, खूबसूरत फले बालो ज़ैतून त ज़ोवरू थियूं, पन तैस मां बड़े शोरारे शब्दे भोते तैस मां अग लाई जेई, ते तैसेरी डैलड़ी ट्लोड़ी जेई। 17 सेना केरो यहोवा, ज़ैनी तू लाव, तैनी तीं पुड़ मुसीबत छ़डनेरे लेई ज़ोवरूए; एल्हेरेलेइ इस्राएल ते यहूदारे केरे घरानेरी तै बुराई आहे कि तैनेईं मीं नफरत दुवानेरे लेई बाल देबतेरे लेई गुग्गल बालो।"

यिर्मयाह नेबेरे खलाफ साज़िश

18 यहोवा मीं सेइं ज़ोवं ते मीं इस गल्‍लरो पतो लग्गो; किजोकि यहोवा ही तैन केरि योजना मीं पुड़ बांदी की। 19 अवं त मारे गानेबाले गबड़ेरो ज़ेरो अनज़ान थियो। मीं न थियो पतो कि तैना मेरो नुक्सानेरी योजना इन ज़ोइतां केरतन, "एज्जा, असां फले समेत इस बुट्टे ढ्लुड़म, ते ज़ींते केरे मझ़ाटेरां तैस कट्टम, तैखन इसेरू नवं भी याद न राए।" 20 पन, हुनी हे सेना केरे यहोवा, हे धर्मी न्याय केरने बाला, हे अन्तरेरी गल्‍लां ज़ान्ने बाला, तू तैन केरे बदलो ने ते मीं हिरा, किजोकि मीं अपनो मुकदमो तेरे हथ्थे मां छ़डोरोए।✝11:20 भज. 7:9;प्रका. 2:23. 21 एल्हेरेलेइ यहोवा मीं सेइं ज़ोवं, "अनातोत नगरेरे लोक ज़ैना मीं मारने चातन ते एन ज़ोतन कि तू यहोवारे नंव्वे सेइं नबूवत न केर, नईं त अस तीं मारमेले। 22 एल्हेरेलेइ सेना केरो यहोवा तैन केरे बारे मां एन ज़ोतन, अवं तैन सज़ाह देइलो; तैन केरे जुवान तलवार सेइं, ते तैन केरां मट्ठां कुइयां नियन्नां मरेलां; 23 ते तैन मरां कोई भी न बच़ेलो। अवं अनातोत नगरेरे लोकन पुड़ ई मुसीबत छ़डेलो; तैन केरि सज़ारी दिहाड़े एजने बालीए।"