1 यहोवा मीं सेइं एन ज़ोवं, "तू गेइतां कुम्हारे करां मित्तरी बनेवरी अक सुराही घिन, ते इस्राएली लोकन मरां किछ बुज़ुर्ग ते याजकन मरां भी किछ खास याजक भी साथ नेइतां, 2 हिन्नोमी केरे वैदरे* पासे तैस फाटके कां नेड़े च़लो गा ज़ैड़ी केपरी शारतन; ते ज़ैन वचन अवं ज़ोईं, तैस तैड़ी प्रचार केर। 3 तू एन ज़ोइयां, ‘हे यहूदा प्रदेशेरे राज़व ते यरूशलेम नगरेरे सारे लोकव, यहोवारू वचन शुना। इस्राएली केरो परमेशर सेना केरो यहोवा एन ज़ोते, एस ठैरी पुड़ अवं एरी मुसीबत छ़डने पुड़ आईं कि ज़ै कोई तैसेरी खबर शुने, तैस पुड़ खामोशी पेई गाली। 4 किजोकि इट्ठेरे लोकेईं अवं शारोरोईं, ते एस ठैरी मां होरि देबतां केरे लेई गुग्गल बालो, ज़ैन्न न त तैना ज़ानतन, ते न तैन केरे दादे-पड़दादे या यहूदारे पुराने राज़े ज़ानते थिये; ते तैनेईं ई ठार बेकसूर लोकां केरे खूने सेइं भरी, 5 ते बाल देबतेरे पूज़ा केरेनेरे लेई उच्‍ची ठारां बनेइतां अपने बाल-बच्‍चे अग्गी मां बलिदान किये, हालांकी कधी भी मीं ज़ेसेरो हुक्म न थियो दित्तोरो, न तैसेरी चर्चा की ते न कधे तैन मेरे मने मां अव। 6 एल्हेरेलेइ यहोवा एन ज़ोते कि एरां दिहाड़े एइतन कि इस ठारी जो तोपेत या हिन्नोमी केरि वादी न ज़ोवं गालू, बल्के मारने गानेरी वादी ज़ोवं गालू। 7 ते अवं एस ठैरी मां यहूदा ते यरूशलेमेरी योजना बेफल केरेलो; ते तैन्न तैन केरे जानरे दुश्मना केरे हथ्थे तलवार च़लेइतां बिछ़ोड़ेलो। तैन केरि लाशन अवं अम्बरे च़ुड़ोलू ते जंगली जानबरां केरि खूराक बनेइलो। 8 अवं एस यरूशलेम नगरे एन्च़रे उज़ाड़ेलो कि लोक एस लेहितां डरेले; ज़ै कोई तैसेरे सामने भोइतां च़ले तै इसेरी सब आफतां केरे वजाई सेइं हैरान भोल्हो ते घबरालो। 9 ते घिरे गाने ते तैस मुसीबतरे वक्ते ज़ैस मां तैन केरे जानरे दुश्मन तैन्न छ़डेले, अवं तैन केरे मट्ठां कुइयां केरू मास तैन खुवेइलो ते एक्‍की होरेरू भी मास खुवेइलो।’

10 "तैखन तू तैस सुराही तैन मैन्हु केरे सामने भेन्नां ज़ैना तीं सेइं साथी गान, 11 ते तैन सेइं ज़ोइयां, ‘सेना केरो यहोवा एन ज़ोते कि ज़ैस तरीके सेइं एन मित्तरू भांड ज़ैन ट्लूटी जेव कि फिरी न बनेइयोए, इस्से तरीके सेइं अवं एस मुल्खेरे लोकन ते एस नगरे ट्लोड़ी छ़डेलो। ते तोपेत नंव्वेरे वैदी मां एत्री कब्रां भोल्ही कि कब्रां केरे लेई ठार न राली। 12 यहोवा एन ज़ोते कि अवं एस नगरे ते एसमां रानेबालन सेइं एरू कम केरेलो, अवं एस नगरे तोपेतेरो ज़ेरो बनालो। 13 ते यरूशलेम नगरेरां घरां ते यहूदा प्रदेशेरे राज़ां केरे मेहल, ज़ैन केरे छतन पुड़ तारे देबतां केरे लेई गुग्गल बालो जेव, ते बाकी देबतां केरे लेई पीनेरी च़ढ़तल भी च़ाढ़ी, तैना सब तोपेतेरे ज़ेरे अशुद्ध भोइ गाले।’"✝

14 तैखन यिर्मयाह तोपेतेरां वापस गेइतां, ज़ैड़ी यहोवा तै नबूवत केरनेरे लेई भेज़ोरो थियो, यहोवारे भवनेरे अंगने मां खड़ो भोव, ते सब लोकन सेइं ज़ोने लगो; 15 "इस्राएलेरो परमेशर सेना केरो यहोवा एन ज़ोते, हेरा, सब ड्लाव्वन समेत इस नगरे पुड़ तै सारी आफत छ़डनी चाताईं, ज़ै मीं इस पुड़ छ़डनेरे लेई ज़ोवरूए, किजोकि तैनेईं ज़िद केरतां मेरू वचन न मन्नू।"