यिर्मयाह 13

कमरबन्धेरी मसाल

1 यहोवा मीं सेइं एन ज़ोवं, "गेइतां सनी एरहो अक कमरबन्ध घिन्न, तैस लखे सेइं बन्ध ते पैनी मां सिज़ने न दे*13:1 पैनी मां सिज़ने न दे धोइयां न।" 2 तैखन मीं अक कमरबन्ध घिन्तां यहोवारे ज़ोनेरे मुताबिक अपने लखे सेइं बन्धो। 3 तैखन दूइयोवं बार यहोवा मीं सेइं ज़ोवं, 4 "ज़ै कमरबन्ध तीं घिन्तां अपने लखे बन्धो, तैस फरात दरियारे बन्ने पुड़ नेइतां गा ते तैड़ी तैस चट्टानरे एक्‍की दरज़ी मां छ़ुपा।" 5 एल्हेरेलेइ मीं तै यहोवारे इस हुक्मेरे मुताबिक फरात दरियारे बन्ने पुड़ नेइतां छ़ुपाव। 6 बड़े दिहाड़ां केरे बाद यहोवा मीं सेइं ज़ोवं, "उठ, फिरी फरात दरियाए कां गा, ते ज़ै कमरबन्ध मीं तैड़ी छ़ुपानेरो हुक्म दित्तोरोए तैस तैट्ठां ने।" 7 तैखन अवं फरात दरियाए कां जेव ते घेड़तां ज़ैस ठारी मीं कमरबन्ध छ़ुपेवरो थियो, तैट्ठां तै केढतां आनो। ते हेरा, कमरबन्ध बिगड़ी जेवरो थियो; तै कोन्ची कम्मेरो न थियो राहोरोए।

8 तैखन यहोवा सेइं इन ज़ोवं, 9 "एस्से तरीके सेइं अवं यहूदी लोकां केरू घमण्ड, ते यरूशलेमेरो बड़ू घमण्ड नाश केरेलो। 10 इन दुष्ट यहूदारे लोक ज़ैन मेरे वचन शुन्ने करां इन्कार केरतन ज़ैन अपने मने ज़िद्दी पुड़ च़लतन, ते होरि देबतां केरि पूज़ा केरतन ते तैन कां मथ्थो टेकतन, तैना इस कमरबन्धेरे ज़ेरे भोइ गाले ज़ै कोन्ची कम्मेरो न राव। 11 यहोवा एन ज़ोते कि ज़ैस तरीके सेइं कमरबन्ध मैन्हु केरे लखे मां कस्सो गाते, तैस्से तरीके सेइं मीं इस्राएली केरो सारो घरानो ते यहूदारो सारो घरानो अपनि कमरी मां बन्धोरो थियो कि तैना मेरे लोक बन्न ते मेरू नवं ते आदर ते शोभारी वजा भोन, पन तैनेईं न मन्नू।

दाछ़रे रस्से सेइं भेरतां कुप्पी केरि मसाल

12 "एल्हेरेलेइ तू तैन सेइं इन वचन ज़ो, ‘इस्राएली केरो परमेशर यहोवा एन ज़ोते, दाछ़रे रस्सेरे सब कुप्पे दाछ़रे रस्से सेइं भरे गाले।’ तैखन तैना तीं सेइं ज़ोले, ‘कुन असन नईं पतो कि दाछ़रे रस्सेरे सब कुप्पे दाछ़रे रस्से सेइं भेरोई गाले?’ 13 तैखन तू तैन सेइं ज़ोइयां, ‘यहोवा एन ज़ोते, हेरा, अवं एस मुल्खेरे सेभी रानेबालन, खास केरतां दाऊदेरे खानदानेरे तखते पुड़ बिशोरो राज़ो ते याजक ते नबी सारे यरूशलेमेरे सेभी रानेबालन अपनि क्रोधेरी शराब पेइतां मसत केरेलो। 14 तैखन अवं तैन एक्‍की होरि सेइं टकरेइलो; यानी बाजी मट्ठे सेइं, ते मट्ठां बाजी सेइं, यहोवा एन ज़ोते। अवं तैन पुड़ नरमी न हरेइलो, न तरस खेइलो ते न महरबानी केरतां तैन खतम भोने करां बच़ेइलो।’"

घमण्डेरे खलाफ परमेशरेरी खबरदारी

15 हे इस्राएली लोकव, हेरा, ध्यान देथ, घमण्ड न केरां, किजोकि यहोवा एन ज़ोवरूए। 16 अपने परमेशर यहोवारी तारीफ़ केरा, एस करां पेइले कि तै अंधकार आने ते तुश्शे पव आंधरे पहाड़न पुड़ ठोकर खान, ते ज़ैखन तुस लौअरो सहारो हेरथ, तैखन तै तैस मौतरी छावी मां बदले ते तैस बिलकुल आंधरू बनाए। 17 पन अगर तुसन एस न शुनथ, त अवं अकैल्‍ले मां तुश्शे घमण्डेरे वजाई सेइं लेरां देइलो, ते मेरी एछ़्छ़न सेइं ऐंखरू केरि गड्डां बेगती रहेली, किजोकि यहोवारी भैड्डां कैदी बनेइतां नेवरिन। 18 राज़े ते तैसेरी अम्मा सेइं ज़ो, "उन्ढे बिश्शा, किजोकि तुश्शे क्रोड़ारां शोभने बालां ताजां उसालोरन। 19 दक्षिण मुल्खेरां नगरां घेरोरन, कोई तैन बच़ेइ न सकेलो; पूरे यहूदा प्रदेशेरे लोक कैदी भोइ जे, तैना पूरे तरीके सेइं गुलैमी मां च़ले जे।

20 "एपनी एछ़्छ़ी खोलतां तैन दुश्मन्न हेरा ज़ैना उत्तरेरे पासेरां एज्जी राहोरेन। तैन खूब रोड़ू झुण्ड ज़ैन तीं सौंफोरू थियूं कोड़िए? 21 ज़ैखन तै तेरे तैन दोस्तन तीं पुड़ प्रधान ठहरालो ज़ैन तीं अपनो नुकसान केरनेरी शिक्षा दित्तोरीए, तैखन तू कुन ज़ोली? कुन तैस मौके तीं गल्हे बिशने बाले कौन्शरी ज़ेरि तकलीफां न भोल्ही? 22 अगर तू अपने मने मां सोचस कि इना गल्‍लां कोस वजाई सेइं मीं पुड़ पेई, त तेरे बड़े अधर्मेरी वजाई सेइं तेरे लिगड़ां खोल्‍लां जेआं ते तीं सेइं कुकर्म कियो जेवं। 23 कुन कूशी*13:23 कूशी मतलब अक कालो मैन्हु। अपने चेमड़रो रंग, या चीतो अपने धब्बे बेदली सकते? अगर तैना एरू केरि सकन, त तू भी, ज़ैसां बुरैई केरनी शिखोरिन, भलियाई केरि सकेली। 24 एल्हेरेलेइ अवं तैन एन्च़रे तितर-बितर केरेलो, ज़ेरो भूंस जंगलेरे बाते सेइं तितर-बितर कियो गाते। 25 यहोवा एन ज़ोते, तेरो हिस्सो ते मेरी तरफां तेरो ठहरावरो हिस्सो ईए आहे, किजोकि तीं अवं बिसरतां झूठे देबतन पुड़ भरोसो रखोरोए।✝13:25 यिर्म. 2:13. 26 एल्हेरेलेइ अवं तेरां लिगड़ां खोलेलो, तैखन तेरी शर्म ज़ानी गाली। 27 व्यभिचार ते हबसीपन ते वेश्यारां सारां भिट्टां कम्मां ज़ैना तीं मैइदाने ते पहैड़न पुड़ कियोरन, तैना मीं सब लाहोरेन। हे यरूशलेम नगरी, तीं पुड़ अफ़सोस! तू अपने आपे किताली तगर शुद्ध न केरेली? ते केत्रे च़िरे तगर बनोरी राली?"