1 योशिय्याहेरे मट्ठे यहूदारे राज़े यहोयाकीमेरे राज़ केरनेरे वक्ते मां यहोवा मीं सेइं ज़ोवं, 2 "रेकाबेरे खानदानेरे लोकन कां गेइतां तैन सेइं गल्‍लां केर ते तैन यहोवारे भवनेरे एक्‍की कमरे मां नेइतां तैन दाछ़रो रस पीया।" 3 तैखन मीं याजन्याहे ज़ैन हबस्सिन्याहेरू पोट्लड़ू ते एक्‍की मैन्हु मट्ठू थियूं ज़ेसेरू नवं भी यिर्मयाह थियूं, ते तैसेरे ढ्लाएईं ते सब मट्ठेईं, मतलब रेकाबेरे खानदानेरे सब लोक साथी आने। 4 मीं तैना यहोवारे भवने मां, यिग्दल्याहेरे मट्ठे हानान, ज़ै यहोवारो अक मैन्हु थियो, तैसेरे कमरे मां आनो ज़ै हाकिमां केरे तैन कमरन कां थियो ते शल्‍लूमेरे मट्ठे डेवढी एरे रखवाले मासेयाहेरे कमरे पुड़ थियो। 5 तैखन मीं रेकाबी लोकां केरे घराने दाछ़रे रस्से सेइं भेरतां पतीले ते कुटोरे देइतां ज़ोवं, "दाछ़रो रस पीथ।" 6 तैनेईं ज़ोवं, "असेईं दाछ़रो रस नईं पीनो किजोकि रेकाबेरे मट्ठे योनादाबे ज़ै इश्शो पूर्वज थियो असन ऐह हुक्म दित्तोरो थियो, ‘तुस कधे दाछ़रो रस न पियथ; न तुस, न तुश्शां मट्ठां। 7 न घर बनेइयथ, न ज़मीनदारी केरथ, न दाछ़री बाग लेइयथ, ते न तैन केरे मालिक भोइयथ; पन ज़िन्दगी भर डेरन ही मां रेइयथ ज़ैस सेइं ज़ैस मुल्खे मां तुस परदेशी भोथ, तैस मां बड़े दिहाड़न तगर ज़ींते राथ।’ 8 एल्हेरेलेइ असां रेकाबेरे मट्ठे अपने पूर्वज योनादाबेरी गल मेनतां, तैसेरे सारे हुक्मां केरे मुताबिक च़लतम, न असां ते न इश्शी कौन्शां या मट्ठां-कुइयां कधे दाछ़रो रस पीतम, 9 ते न असां घरां बनेइतां तैन मां रहतम। असां न दाछ़री बाग न ऊडारां लाम, ते न ज़मीनदारी केरतम; 10 असां डेरन ही मां रहतम, ते अपने पूर्वज योनादाबेरी गल मेनतां तैसेरे सारे हुक्मां केरे मुताबिक कम केरतम। 11 पन ज़ैखन बाबेलेरे राज़े नबूकदनेस्सरे एस मुल्खे पुड़ चढ़ाई की, तैखन-तैखन असेईं एप्पु मांमेइं ज़ोवं, ‘च़ला, कसदी ते अरामी सेनारे डरेरे मारे यरूशलेम नगरे मां गाम।’ एल्हेरेलेइ असां हुनी यरूशलेम नगरे मां रहतम।"

12 तैखन यहोवा यिर्मयाह ज़ोवं। 13 इस्राएलेरो परमेशर सेना केरो यहोवा एन ज़ोते: "गेइतां यहूदा प्रदेशेरे लोकन ते यरूशलेम नगरेरे रानेबालन सेइं ज़ो, यहोवा एन ज़ोते, कुन तुस शिक्षा मेनतां मेरी न शुनेले? 14 हेरा, रेकाबेरे मट्ठे योनादाबे ज़ै हुक्म अपने खानदानेरे लोकन दित्तोरो थियो कि तुस दाछ़रो रस न पियथ तै मन्नोरोए इड़ी तगर कि अज़्ज़ेरे दिहाड़े भी तैना लोक दाछ़रो रस न पीन, तैना अपने पूर्वजां केरे हुक्म मनतन; पन अवं तुसन सेइं बार-बार ज़ोतो अव, पन फिरी भी तुसेईं मेरी गल न मन्नी। 15 अवं अपने सारे दास नबी बार-बार तुसन कां भेज़तो एवरोईं, ‘कि अपनि बुरी चाली करां फिरा, ते अपना कम्मां सुधारा, ते होरि देबतन पत्ती गेइतां तैन केरि पूज़ा न केरा तैखन तुस एस मुल्खे मां ज़ै मीं तुश्शे दादे-पड़दादन दित्तोरो थियो ते तुसन भी दित्तोरोए, बेस्सी बटेले।’ पन तुसेईं मेरे पासे ध्यान न दित्तू ते न मेरी गल मन्नी। 16 हेरा, रेकाबेरे मट्ठे योनादाबेरे खानदाने त अपने पूर्वजेरी गल मन्नी, पन तुसेईं मेरी न शुनी। 17 एल्हेरेलेइ सेना केरो परमेशर यहोवा, ज़ै इस्राएलेरो परमेशरे, एन ज़ोते: हेरा, यहूदा प्रदेश ते यरूशलेम नगरेरे सारे लोकन पुड़ ज़ेत्री मुसीबतां छ़डनेरी मीं चर्चा कियोरीए तैना हुनी अवं छ़डताईं; किजोकि मीं तैन शुनावं पन तैनेईं न शुनू, मीं तैना कुजाए पन तैनेईं जुवाब न दित्तो।"

18 पन रेकाबी केरे घराने सेइं यिर्मयाह नेबे ज़ोवं, "इस्राएलेरो परमेशर सेना केरो यहोवा तुसन सेइं एन ज़ोते: एल्हेरेलेइ कि तुसेईं ज़ै अपने पूर्वज योनादाबेरो हुक्म मन्नो, बल्के तैसेरे सारे हुक्मन मन्ने ते ज़ैन किछ तैनी ज़ोवं, तैसेरे मुताबिक कम कियूं, 19 एल्हेरेलेइ इस्राएलेरो परमेशर सेना केरो यहोवा एन ज़ोते: रेकाबेरे मट्ठे योनादाबेरे खानदाने मां हमेशा एरहो मैन्हु भोल्हो ज़ै मेरे सामने खड़ो राए।"