यिर्मयाह 41

गदल्याहेरे खलाफ बगावत

1 तैस सालेरे सत्तोवं महीने मां एरू भोवं कि इश्माएल ज़ैन नतन्याहेरू मट्ठू ते एलीशामारू पोट्लड़ू ते राज़ेरे खानदाने मरां ते राज़ेरे प्रधान्न मरां थियो, तै दश मैन्हु साथी नेइतां मिस्पा मां अहीकामेरे मट्ठे गदल्याहे कां अव। तैड़ी मिस्पा नगरे मां तैनेईं साथी रोट्टी खाई। 2 तैखन नतन्याहेरे मट्ठे इश्माएल ते तैसेरे साथी दश ज़नेईं उठतां गदल्याह, ज़ैन अहीकामेरू मट्ठू ते शापानेरू पोट्लड़ू थियूं, ते ज़ै बाबेलेरे राज़े मुल्खेरो अधिकारी ठहरावरो थियो, तैस पुड़ तलवारी सेइं एन्च़रे हमलो कियो कि तै मेरि जेव। 3 इश्माएले गदल्याहे सेइं साथी ज़ेत्रे यहूदी मिस्पा मां थिये, ते ज़ैना कसदी सिपाही तैड़ी मैल्हे, तैना सब मारे।

4 गदल्याह मारनेरे दूइयोवं दिहाड़े ज़ैखन इस बारे मां कोन्ची पतो न थियो, 5 तैखन शेकेम ते शीलो ते सामरिया नगरन मरां 80 मड़द दुख बांदो केरनेरे लेई दाढ़ी कटेइतां, लिगड़ां छ़िन्दतां, अपनो आप ज़खमी केरतां ते हथ्थन मां अन्नबलि ते लोबान घिन्तां, यहोवारे भवने मांजो गाते लेइहोए। 6 तैखन नतन्याहेरू मट्ठू इश्माएल तैन सेइं मिलने मिस्पा मरां निस्सू, ते तेरां देंतू च़लू। ज़ैखन तै तैन सेइं मिलो, तैखन ज़ोवं, "अहीकामेरे मट्ठे गदल्याहे कां च़ला।" 7 ज़ैखन तैना तैस नगरे मां आए तैखन नतन्याहेरे मट्ठे इश्माएले अपने सैथन समेत तैना मारे ते तैन केरि लाशां खड्डे मांजो शैरी। 8 पन तैन मरां दश मैन्हु ज़ैना बच़ोरे थिये इश्माएले सेइं ज़ोने लगे, "असन न मार; किजोकि असन कां मैइदाने मां रखोरे गेहुं, जौ, तेल ते माछ़ीए।" एल्हेरेलेइ तैनी तैना तैन लोकन सेइं साथी न मारे।

9 ज़ैस खड्डे मां इश्माएले तैन लोकां केरि सब लाशां ज़ैना तैनी मारोरे थिये गदल्याहेरे लाशी कांजो शैरोरी थी, (ऐह तैए खड्डो ज़ै आसा राज़े इस्राएलेरे राज़े बाशारे डरेरे मारे बनावावरो थियो), तै नतन्याहेरे मट्ठे इश्माएले लाशन सेइं भरो। 10 तैखन ज़ैना लोक मिस्पा मां बच़ोरे थिये, यानी राज़ेरी कुइयां ते ज़ेत्रे लोक मिस्पा मां रेई जेवरे थिये ज़ैना अंगरक्षकां केरे प्रधान नबूजरदाने अहीकामेरे मट्ठे गदल्याहे सौंफी दित्तोरे थिये, तैन सभे नतन्याहेरू मट्ठू इश्माएल कैदी बनेइतां अम्मोनी लोकां केरे मुल्खे मांजो च़लू।

11 ज़ैखन कारेहेरे मट्ठे योहानाने ते सिपेही केरे टोली केरे तैन सेभी प्रधानेईं ज़ैना तैस सेइं साथी थिये, शुनू कि नतन्याहेरे मट्ठे इश्माएले ई सब बुराई की, 12 तैखन तैना सब सिपाही नेइतां नतन्याहेरे मट्ठे इश्माएले सेइं लड़नेरे लेई निस्से ते तै तैस तालाबे कां मैल्हो ज़ै गिबोने मांए। 13 कारेहेरे मट्ठे योहानाने, ते टोली केरे सेनारे प्रधान्न हेरतां ज़ैना तैस सेइं साथी थिये, इश्माएले सेइं साथी ज़ैना लोक थिये, तैना सब खुश भोए। 14 ज़ेत्रे लोक इश्माएले मिस्पा मरां कैदी बनेइतां च़लेवरे थिये, तैना मुड़तां कारेहेरे योहानाने कां वापस आए। 15 पन नतन्याह इश्माएल अठ सैथन समेत योहानानेरे हथ्थे मरां बेंच़तां अम्मोन मुल्खे मां च़लो जेव। 16 तैखन लोकन मरां जेवरे थिये, यानी ज़ैन सिपाही, कौन्शां, बाल-बच्‍चे ते खोजे कारेहेरे मट्ठे योहानान, अहीकामेरे मट्ठे गदल्याहेरे मिस्पा मां मारे गानेरां बाद नतन्याहेरे मट्ठे इश्माएले करां छुटेइतां गिबोने मरां वापस घिन्तां एवरो थियो, तैन तै अपने सब साथी सेनारे प्रधान्न समेत नेइतां च़लो। 17 बैतलहमेरे नेड़े ज़ै किम्हामेरी धर्मशाले, तैस मां तैना एल्हेरेलेइ रुके कि मिस्रे मां गान। 18 किजोकि तैना कसदी लोकन करां डरते थिये; एसेरी वजा ई थी कि अहीकामेरू मट्ठू गदल्याह ज़ैन बाबेलेरे राज़े मुल्खेरू अधिकारी बनेवरू थियूं, तैन नतन्याहेरे मट्ठे इश्माएले मारोरू थियूं।