1 मोआब मुल्खेरे बारे मां इस्राएलेरो परमेशर, सेना केरो यहोवा एन ज़ोते: "नबो नगरे पुड़ अफ़सोस, किजोकि तैन बरबाद भोइ जेवं! किर्यातैम नगरेरी उमीद ट्लूटी जेई, तैस पुड़ कब्ज़ो कियो जेव; उच्‍चो क़िलो परेशान ते बरबाद भोइ जेव। 2 हुनी मोआबेरी कोई तारीफ़ न केरेलो। हेशबोने मां तैसेरे नुक्सानेरो विचार कियो जेवरोए: ‘एज्जा, असां तैस एन्च़रे केरम कि तै कौम न रेई बटे।’ हे मदमेन नगर, तू भी बेरान भोइ गालू; तलवार तीं पत्पती पेली।

3 "होरोनैम नगरे मरां चिन्डां केरि शौर शुना! नाश ते बड़े दुखेरी आवाज़ शुनोतीए! 4 मोआबेरो सत्यानाश भोइ राहोरोए; तैसेरे निक्‍के बच्‍चां केरे चिन्डां केरि शौर शुनोई। 5 किजोकि लूहीत नगरेरे चड़ैई मां लोक लगातार लेरां देते च़ड़ेले; ते होरोनैमेरे उतरैई मां नाश भोनेरे चिन्डां केरि शौर भोइ। 6 नश्शा! अपनि-अपनि जान बच़ाथ! तैस झ़ैलेरे ज़ेरे भोथ ज़ैन जंगले मां भोते! 7 किजोकि तू ज़ै अपने कम्मन ते जाईदाती पुड़ भरोसो रखतस, एल्हेरेलेइ तू भी ट्लाव गालो; ते कमोश देबतो भी अपने पुजैरन ते हाकिमन सने गुलैमी मां गालो। 8 यहोवारे ज़ोनेरे मुताबिक नाश केरनेबाले तुश्शे हर एक्‍की नगरे पुड़ चढ़ाई केरेले, ते कोई नगर न बच़ेलू; वादी ते पहाड़े पुड़ेरी चौरस ज़मीन दूईये नाश भोल्ही।

9 "मोआबेरां फंघां लाथ ताके तै उडरतां दूर भोइ गाए; किजोकि तैसेरां नगरां एन्च़रे उज़डेलां कि तैन मां कोई भी न बेस्सी बटेलो।

10 "लानती आहे तै ज़ै यहोवारू कम आलसे सेइं केरते; ते तै भी ज़ै अपनि तलवार खून बगाने करां रुकतां रखते।

11 "मोआब बचपने करां सुखीए, तैस हैठ तलछटे, तै एक्‍की भांडे मरां होरि भांडां मां उलटव न जेव ते न गुलैमी मां जेव; एल्हेरेलेइ तैसेरो सुवाद तैस मां आए, ते तैसेरी खुशबू ज़ेरि थी तेरही रहतीए। 12 एल्हेरेलेइ यहोवा एन ज़ोते, एरां दिहाड़े एज्जेले, कि अवं लोकन तैस उलटानेरे लेई भेज़ेलो, ते ज़ैन घड़न मां तै रखोरोए, तैन खाली केरतां भन्नेले। 13 तैखन ज़ेन्च़रे इस्राएलेरे घराने बेतेल देबते पुड़ भरोसो रखने सेइं शरमिन्दा भोनू पेवं, ज़ैस पुड़ तैना भरोसो केरते थिये, तेन्च़रे ही मोआबी लोक कमोश देबते पुड़ भरोसो रखने सेइं शरमिन्दा भोल्हे।

14 "तुस केन्च़रे ज़ोईं सकतथ कि असां जंग लड़नेरे लेई बहादर ते हिम्मती बाले सिपाही अहम? 15 मोआब त नाश भोव, तैसेरे नगर भस्म भोइ जे ते तैसेरे च़ुनोरे जुवान मरनेरे लेई जे, महाराज़ो, ज़ेसेरू नवं सेना केरो यहोवाए, तै एन ज़ोते। 16 मोआबेरी मुसीबत नेड़े एज्जी जेई, ते तैसेरे दुखे मां गानेरी दिहाड़े बड़े तेज़ी सेइं एइतीए। 17 तैसेरे आसे-पासेरे सब रानेबालन, ते तैसारी मुशूरी, सब ज़ान्ने बालव, तैसेरे लेई मातम केरां; ज़ोथ, ‘हाय! ऐह मज़बूत सोटो ते खूबसूरत लट्ठ केन्च़रे ट्लूटी जेवरीए?’

18 "हे दीबोन नगरेरे रानेबाली तू अपनो वैभव छ़ेडतां ट्लिशोरी बिशोरी रा! किजोकि मोआबेरे नाश केरनेबाले तीं पुड़ चढ़ाई केरतां तेरे मज़बूत क़िले नाश किये। 19 हे अरोएर नगरेरे रानेबाली तू बत्ती मां खड़े भोइतां तकती रा! ज़ै नशते तैस करां, ते ज़ैन बेच़तां निसतीए तैस पुछ़ कि कुन भोवं? 20 मोआबेरी उमीद ट्लुटेली, तै परेशान भोइ जेव; तुस हाय-हाय केरा ते चिन्डां मारा; अर्नोने मां भी एन ज़ोथ कि मोआब नाश भोव।

21 "चौवरस ज़मीनरे मुल्खे मां होलोन, यहस, मेपात, 22 दीबोन, नबो, बेतदिबलातैम, 23 ते किर्यातैम, बेतगामूल, बेतमोन, 24 ते करिय्योत, बोस्रा, ते कुन दूर कुन नेड़े, मोआबेरे मुल्खेरे सारे नगरन पुड़ सज़ारो हुक्म भोवरोए। 25 यहोवा एन ज़ोते, मोआबेरू शिंग केटोई जेवं, ते शक्ति ट्लुटी जेई।

26 "तैस मतवालो केरा, किजोकि तैनी यहोवारे खलाफ बेड्डी-बेड्डी गल्‍लां की; एल्हेरेलेइ मोआब अपने कियोरे उलटी मां वापस गालो, ते तैसेरो मज़ाक बनाव गालो। 27 कुन तीं भी इस्राएलेरो मज़ाक न बनाव? कुन तै च़ोरन मां ट्लाव जेवरो थियो कि ज़ैखन तू तैसेरी चर्चा केरतस तैखन तू क्रोड़ी हिलातो थियो?

28 "हे मोआबेरे रानेबालव अपने-अपने नगर शैरतां चट्टानरी दरज़ी मां बस्सा! तैस कबूतरेरे ज़ेरो बन ज़ैन कुढरे एक्‍की पासे आल्हो बनाते। 29 असेईं मोआबेरे घमण्डेरे बारे मां शुनोरूए कि तैस बड़ू अभिमाने, तैसेरू घमण्ड, अभिमान ते अहंकार ते तैसेरो मन फुलनो मुशूरे। 30 यहोवा एन ज़ोते, अवं तैसेरी सरक भी ज़ानताईं, कि तै बेकारे, तैसेरे बेड्डी-बेड्डी गल्‍लन सेइं किछ न बनेलू। 31 एल्हेरेलेइ अवं मोआबी केरे लेई हाय-हाय केरेलो; हाँ अवं सारे मोआबी केरे लेई चिन्डां मारेलो; कीरहेरेस नगरेरे लोकां केरे लेई मातम कियो गालो। 32 हे सिबमा नगरेरी दाछ़री बाग, अवं तुश्शे लेई याजेर नगरे करां भी जादे मातम केरेलो! तेरी डैलड़ी त समुन्दरे पार पुज़्ज़ी जेई, बल्के याजेर नगरेरे समुन्दरे तगर भी पुज़ोरी थी; पन नाश केरनेबालो तेरे रितरे फलन पुड़, ते ट्लोड़ी दाछ़ी पुड़ भी ट्लुटी जेवरोए। 33 फलदार बागन मरां ते मोआब मुल्खे मरां आनन्द ते मघन भोनू दूर भोवं; मीं एरू कियूं कि दाछ़रे रस्सेरे कुण्डन मां किछ दाछ़रो रस न राव; लोक फिरी ललकारते दाछ़ न ढ्लन्च़ेले; ज़ै ललकार भोनेबालीए तै हुनी न भोल्ही।

34 "हेशबोन नगरेरे चिन्डां केरि शोर शुन्तां लोक एलाले ते यहस नगरे तगर, ते सोअर करां होरोनैम ते एग्लत-शलीशिया तगर चिन्डां मारते नशते च़ले जेवरेन। किजोकि निम्रीमेरू पानी भी शुक्‍की जेवं। 35 ते यहोवा एन ज़ोते, कि अवं उच्‍चे ठैरन पुड़ बलिदान च़ाढ़ना, ते देबतां केरि पूज़ा केरनी दूईये मोआबे मां बन्द केरेलो। 36 एल्हेरेलेइ मेरा मन मोआब मुल्ख ते कीरहेरेस नगरेरे लोकां केरे लेई बेइशोई अरो ज़ेरो लेरां देइतां अलापते, किजोकि ज़ैन किछ तैनेईं कमेइतां बच़ेवरूए, तैन नाश भोवं। 37 किजोकि सेभी केरे दोग कट्टे जे ते सेभी केरि दैढ़ी ढ्लूड़ी जेई; सेभेइं अपनो आप च़ीरोरोए, ते सेभेइं मझ़ बन्धोरूए। 38 मोआबेरे सब घरां केरे छत्तन पुड़ ते सब चौकन मां लेरां देने लगोरेन; किजोकि मीं मोआब घटिया भांडेरो ज़ेरो ट्लोड़ो यहोवा एन ज़ोते। 39 मोआब केन्च़रे ट्लुटी जेव! हाय, हाय, केरा! तैनी केन्च़रे शरमरे मारे अपनि पिठ फिरावरीए! एन्च़रे सेइं मोआबेरे च़ेवरे पासां केरे सब लोक रानेबाले तैसेरो मज़ाक बनाले ते उदास भोइ गाले।"

40 किजोकि यहोवा इन ज़ोते, "हेरा, तै, उकाबेरो ज़ेरो उडरेलो ते मोआबे पुड़ अपना फंघां खिलारेलो। 41 करिय्योत नगरे पुड़ कब्ज़ो कियो जेव, ते क़िले बालां नगरां होरि केरे कब्ज़े मां पेआं। तैस दिहाड़े मोआबी सिपाही केरे मन गल्हे बिशने बाले कौन्शरे ज़ेरे भोइ गाले; 42 ते मोआबे एन्च़रे तितर-बितर भोल्हो कि तैसेरी सेना ट्लुटी गाली, किजोकि तैने यहोवारे खलाफ घमण्ड कियोरूए। 43 यहोवा एन ज़ोते कि मोआबेरे रानेबाले, तेरे लेई डर ते खड्डो ते फंदे ठहराए जेवरेन। 44 ज़ै कोई डरे करां नश्शे तै खड्डे मां बिछ़ड़ेलो, ते ज़ै कोई खड्डे मरां निसेलो, तै फंदे मां फसेलो। किजोकि अवं मोआबेरे सज़ारे दिहाड़े तैस पुड़ आनेलो, यहोवा एन ज़ोते।

45 "ज़ैना नश्शोरेन तै हेशबोने मां शरण नेइतां खड़े भोइ जे; पन हेशबोने मरां अग ते सीहोने मरां लौ निस्सेली, ज़ैस सेइं मोआबेरे मुल्खेरे कूने ते बगावत केरनेबालां केरि क्रोड़ी नाश भोइ जेई।✝ 46 हे मोआब तीं पुड़ अफ़सोस! कमोश देबतेरे लोक नाश भोए; किजोकि तेरे कौन्श मड़द दूईये गुलैमी मां जेवरेन। 47 फिरी भी यहोवा एन ज़ोते कि अन्तेरे दिहाड़न मां मोआबे गुलैमी मरां वापस आनेलो।" मोआबेरे सज़ारे वचन इन्ना आन।