1 योशिय्याहेरे मट्ठे, यहूदा प्रदेशेरो राज़े सिदकिय्याहेरे राज़ केरनेरे शुरुआती मां यहोवा मीं सेइं ज़ोवं। 2 तैनी मीं सेइं एन ज़ोवं, "बन्धन ते जुऊं बनावेइतां अपने मेट्टू पुड़ रख। 3 तैखन तैन्न एदोम ते मोआब ते अम्मोन ते सोर ते सीदोनेरे राज़न कां, तैन दूतां केरे ज़िरिये ई सन्देश भेज़ां ज़ैना यहूदारे राज़े सिदकिय्याह कां यरूशलेम नगरे मां एवरेन। 4 तैन्न तैन केरे मालिकां केरे लेई इन ज़ोइतां हुक्म देनो: ‘इस्राएलेरो परमेशर सेना केरो यहोवा एन ज़ोते: अपने-अपने मालिके सेइं इन ज़ोथ कि 5 धरती ते धेरती पुड़ रानेबाले मैन्हु ते जानबर मीं अपने शेक्ति सेइं बनाए, ते ज़ैस कोन्ची अवं चाताईं तैस्से अवं तैन देताईं*। 6 हुनी मीं इना सब मुल्ख, अपने दास बाबेलेरे राज़े नबूकदनेस्सरे एप्पु दित्तोरेन; ते मैइदानेरे जीप जन्तू भी मीं तैस दित्तोरेन कि तैना तैसेरे अधीन रान। 7 इना सब कौमां तैसेरे ते तैसेरे बाद तैसेरे मट्ठां ते पोट्लड़ेरे अधीन तैस वक्ते तगर रहेली ज़ांतगर तैसेरे भी मुल्खेरी दिहाड़ी न एज्जे; तैखन बेड़ि कौमां ते बड्डे-बड्डे राज़े तैस करां भी अपनि सेवा करवाले।

8 "‘पन ज़ै कौम या रियासतरो राज़ो बाबेलेरे राज़े नबूकदनेस्सरेरे अधीन न भोए ते तैसेरो जुओ अपने मेट्टू पुड़ न ने, तैस कौमी अवं तलवार, काल ते मरी सेइं सज़ाह तैस मौके तगर देतो रेइलो, ज़ांतगर तैस तैसेरे ज़िरिये मिटेई न छ़ेडी, यहोवा एन ज़ोते। 9 एल्हेरेलेइ तुस लोक अपने नेबन ते एजने बाले वक्तेरे बारे मां ज़ोनेबालन ते जैदू टूनो केरनेबालन ते मन्ट्लां देनेबालां केरे पासे मन न लाथ ज़ैना तुसन सेइं ज़ोतन कि तुसन बाबेलेरे राज़ेरे अधीन न भोनू पेलू। 10 किजोकि तैना तुसन सेइं झूठी नबूवत केरतन, ज़ैस सेइं तुस अपने-अपने मुल्खे मरां दूर भोइ गाथ ते अवं एप्पु तुसन दूर केरतां नाश केरेलो। 11 पन ज़ै कौम बाबेलेरे राज़ेरो जुओ अपने मेट्टू पुड़ नेइतां तैसेरे अधीन राली तैस अवं तैस्सेरे मुल्खे मां राने देइलो; ते तै तैस मां ज़मीनदारी केरती बस्सोरी राली, यहोवा एन ज़ोते।’"

12 यहूदा प्रदेशेरे राज़े सिदकिय्याह सेइं भी मीं इना गल्‍लां ज़ोईं, "अपने लोकन समेत तू बाबेलेरे राज़ेरो जुओ मेट्टू पुड़ ने, ते तैसेरे ते तैसेरे लोकां केरे अधीन रेइतां ज़ींतो रा। 13 ज़ैखन यहोवा तैस कौमरे बारे मां ज़ै बाबेलेरे राज़ेरे अधीन न भोए, इन ज़ोवं कि तै तलवार, काल ते मरी सेइं नाश भोल्ही; त फिरी तू किजो अपने लोकन समेत मरनू चातस? 14 ज़ैना नबी तीं सेइं ज़ोतन, ‘तीं बाबेलेरे राज़ेरे अधीन न भोनू पेलू,’ तैन केरि न शुन; किजोकि तैना तीं सेइं झूठी नबूवत केरतन। 15 यहोवा एन ज़ोते कि मीं तैना नईं भेज़ोरे, तैना मेरे नंव्वे सेइं झूठी नबूवत केरतन; ते एसेरो फल ईए भोल्हो कि अवं तीं मुल्खे मरां कढेलो, ते तू तैन नेबन समेत ज़ैना तीं सेइं नबूवत केरतन नाश भोइ गालो।"

16 तैखन मीं याजकन ते आम लोकन सेइं भी ज़ोवं, "यहोवा इन ज़ोते, तुश्शे ज़ैना नबी तुसन सेइं ई नबूवत केरतन कि ‘यहोवारे भवनेरां भांडां हुनी लूशी ही बाबेले मरां वापस आनां गालां,’ तैन केरे गल्‍लन पुड़ ध्यान न देथ, किजोकि तैना तुसन सेइं झूठी नबूवत केरतन। 17 तैन केरि न शुना, बाबेलेरे राज़ेरे अधीन भोइतां ते तैसेरी सेवा केरतां ज़ींते राथ। 18 इन नगर किजो बेरान भोइ गाए? अगर तैना नबी भी भोन, ते अगर यहोवारू वचन तैन कां भोए, त तैना सेना केरे यहोवा सेइं बिनती केरन, कि ज़ैना भांडां यहोवारे भवने मां ते यहूदारे राज़ेरे मेहले मां ते यरूशलेम नगरे मां रेई जेवरन, तैना बाबेल मां न गेइ बटेलां। 19 किजोकि सेना केरो यहोवा इन ज़ोते कि ज़ैना खम्भे ते पितलरू कुण्ड, गंगाल ते कुर्सी ते बाकी भांडां इस नगरे मां रेई जेवरन, 20 ज़ैना बाबेलेरे राज़े नबूकदनेस्सरे तैस वक्ते न नियां ज़ैखन तै यहोयाकीमेरे मट्ठे यहूदारे राज़े यकोन्याह ते यहूदा ते यरूशलेमेरे सब बड्डे अधिकारी कैदी केरतां यरूशलेम नगरेरां बाबेले जो नियोरे थिये, 21 ज़ैना भांडां यहोवारे भवने मां ते यहूदारे राज़ेरे मेहले मां ते यरूशलेम नगरे मां रेइ जेवरन, तैन केरू बारे मां इस्राएलेरो परमेशर सेना केरो यहोवा इन ज़ोते कि तैना भी बाबेले पुज़्ज़ां गालां; 22 ते ज़ांतगर अवं तैन केरि खबर न नेही तांतगर तैना तैड़ी रालां, ते तैखन अवं तैन एन्हतां इस ठैरी मां फिरी रखेलो, यहोवा एन ज़ोते।"