यिर्मयाह 42

लोक यिर्मयाह जो ज़ोतन कि इश्शे लेई प्राथना केर

1 तैखन कारेहेरू मट्ठू योहानान, होशायाहेरू मट्ठू याजन्याह, सब सेनापति ते निकड़े करां लेइतां बड्डे तगर, सब लोक 2 मीं कां एइतां ज़ोने लगे, "इश्शी बिनती कबूल केरतां अपने परमेशर यहोवा कां इश्शे सब बच़ोरे लोकां केरे लेई प्राथना केर, किजोकि तू एप्पु हेरनेरे लगोरोस कि असां ज़ैन पेइले बड़े थिये, हुनी थोड़े रेई जेवरेम। 3 एल्हेरेलेइ प्राथना केर कि इश्शो परमेशर यहोवा असन ज़ोए कि असां कोस बत्तां च़लम, ते कूनां कम्मां केरम?" 4 मीं तैन सेइं ज़ोवं, "मीं तुश्शी शुनोरीए; हेरा, अवं तुश्शे ज़ोनेरे मुताबिक तुश्शे परमेशर यहोवा कां प्राथना केरेलो ते ज़ै जुवाब यहोवा तुश्शे लेई देलो अवं तुसन सेइं ज़ोइलो; अवं तुसन करां कोई गल न छ़ुपेइलो।" 5 तैखन तैनेईं मीं सेइं ज़ोवं, "अगर तेरो परमेशर यहोवा तेरे ज़िरिये असन कोई वचन दे ते अगर असां तैसेरे मुताबिक न च़लम, त यहोवा इश्शे दरमियाने मां सच़्च़ो ते वफादार गवाह ठहरे। 6 चाहे तै रोड़ी गल भोए, चाहे बुरी, फिरी भी असां अपने परमेशर यहोवारे हुक्म मनमेले, ज़ैस कां असां तीं भेज़ने लगोरेम, किजोकि ज़ैखन असां अपने परमेशर यहोवारी गल मन्नम तैखन इश्शू भलू भोल्हु।"

यिर्मयाह नेबेरे प्राथनारो जुवाब

7 प्राथना केरनेरे दश दिहाड़े बीतनेरे बाद यहोवा मीं सेइं ज़ोवं। 8 तैखन तैनी कारेहेरे मट्ठे योहानाने, तैसेरे साथी सेनापति, ते निकड़े करां लेइतां बड़े तगर ज़ेत्रे लोक थिये, तैन सब कुजेइतां तैन सेइं ज़ोवं, 9 "इस्राएलेरे परमेशर यहोवा, ज़ैस कां तुसेईं अवं एल्हेरेलेइ लेई भेज़ो कि मीं तुश्शी बिनती तैस सेइं ज़ोईं, तै एन ज़ोते: 10 अगर तुस एस्से यहूदा प्रदेशे मां रेई गाथ, तैखन त अवं तुसन नाश न केरेलो बल्के कायम रखेलो; ते तुसन न ढ्लूड़ेलो, बल्के लगोरे रखेलो; किजोकि तुश्शो ज़ै नुकसान मीं कियोरोए तैस करां अवं पसताताईं। 11 तुस बाबेलेरे राज़े करां डरतथ, एल्हेरेलेइ तैस करां न डरा; यहोवा एन ज़ोते। तैस करां न डरा, किजोकि अवं तुश्शी रक्षा केरनेरे लेई ते तुसन तैस करां बच़ानेरे लेई तुसन सेइं साथी आईं। 12 अवं तुसन पुड़ दया केरेलो, कि तै भी तुस पुड़ दया केरतां तुसन तुश्शी ज़मीनी पुड़ फिरी बस्सने देलो। 13 पन अगर तुस एन ज़ोइतां कि असां एस मुल्खे मां न रहमेले अपने परमेशर यहोवारी गल न मन्नथ, ते ज़ोथ कि असां त मिस्र मुल्खे मां गेइतां तैड़ी रहमेले, 14 किजोकि तैड़ी न असां जंग हेरेले, न नरशिंगेरी आवाज़ शुनमेले ते न असन रोट्टरी कमी भोल्ही, त हे बच़ोरे यहूदी लोकव, यहोवारू एन वचन शुना। 15 इस्राएलेरो परमेशर सेना केरो यहोवा एन ज़ोते: अगर तुस सच़्च़े मिस्र मुल्खेरे पासे गानेरे लेई तुत्तर फिराथ, ते तैड़ी रानेरे लेई गाथ, 16 त एरू भोल्हु कि ज़ैस तलवारी करां तुस डरतथ, तैए तैड़ी मिस्र मुल्खे मां तुश्शो पीछो केरेली, ते ज़ैस काले करां डरतथ, तै मिस्र मुल्खे मां तुश्शो पीछो न शारेलो; ते तैड़ी तुस मारेले। 17 ज़ेत्रे मैन्हु मिस्रे मां रानेरे लेई तैसेरे पासे तुत्तर फिरान, तैना सब तलवार, काल ते मरी सेइं मरेले, ते ज़ै आफत अवं तैन मां छ़डेलो, तैस करां कोई न बच़ेलो।

18 "इस्राएलेरो परमेशर सेना केरो यहोवा एन ज़ोते: ज़ैस किसमे सेइं मेरो क्रोध ते सरक यरूशलेम नगरेरे लोकन पुड़ भड़कोरी थी, तैस्से तरीके सेइं अगर तुस मिस्र मुल्खे मां गाथ, त मेरो क्रोध तुसन पुड़ एरहो भड़केलो कि लोक हैरान भोल्हे, ते तुश्शू ऊपाम देइतां लानत देले। तुस तैस ठारी फिरी कधी न लेही बटेले। 19 यिर्मयाह इन भी ज़ोवं, हे बच़ोरे यहूदी लोकव, यहोवा तुश्शे बारे मां ज़ोवरूए: ‘मिस्र मुल्खे मां न गाथ।’ तुस सच़्च़े ज़ैना कि मीं अज़्ज़े तुसन याद करेइतां ऐह गल ज़ोवरीए। 20 किजोकि ज़ैखन तुसेईं अवं एन ज़ोइतां इश्शे परमेशर यहोवा कां भेज़ोरो थियो, ‘इश्शे लेई इश्शे परमेशर यहोवा कां प्राथना केर ते ज़ैन किछ इश्शो परमेशर यहोवा ज़ोए तैसेरे मुताबिक असन ज़ो ते असां तेन्च़रे केरेले,’ तैखन तुस ज़ैनी बुझ़तां अपने आपे धोखो देते थिये। 21 हेरा, अवं अज़ तुसन सेइं ज़ोताईं, पन होरू ज़ैन किछ इश्शे परमेशर यहोवा तुसन सेइं ज़ोनेरे लेई अवं भेज़ोरोईं, तैस मरां तुस कोई गल न मन्नथ। 22 हुनी तुस पक्‍कू समझ़ा, कि ज़ैस ठारी मां तुस परदेशी बेनतां रानेरी उमीद केरतथ, तैस मां तुस तलवार, काल ते मरी सेइं मेरि गाले।"