यिर्मयाह 49

अम्मोनी केरे खलाफ नबूवत

1 अम्मोनी केरे बारे मां यहोवा एन ज़ोते: "कुन इस्राएलेरी कोई औलाद नईं? कुन तैसेरो कोई बारस न राव? फिरी मल्काम देबतो किजो गाद प्रदेशेरेरो मालिक भोव? ते तैसेरे लोक किजो तैसेरे नगरन मां बस्से? 2 यहोवा एन ज़ोते, एरे दिहाड़े एजने बाले आन, कि अवं अम्मोनी केरे रब्बाह नगरेरे खलाफ जंगरी ललकार शुनालो, ते तैन उज़ैड़तां खण्डर भोइ गालू, ते तैसेरी बेसती फुक्‍की गैली; तैखन ज़ैन लोकेईं इस्राएली केरे मुल्खे पुड़ कब्ज़ो कियोरो थियो, तैना फिरी तैस वापस आनेले। यहोवा एन ज़ोते।

3 "हे हेशबोन हाय-हाय केर; किजोकि आई नगर नाश भोइ जेवं। हे रब्बाह नगरेरी कौन्शव चिन्डां मारा! ते लखे टाट बन्धा, छाती पिटती बाड़न मां इरां उरां दौड़ा! किजोकि मल्काम देबतो अपने पुजैरन ते हाकिमन सने गुलैमी मां गालो। 4 हे भटकने बाली कुई! तू अपने मुल्खेरी वैदन पुड़, खास केरतां अपने फलदार वैदन पुड़ किजो घमण्ड केरतिस? तू किजो एन ज़ोइतां अपने रखोरे धने पुड़ भरोसो रखतिस, ‘मेरे खलाफ कौन चढ़ाई केरि सकेलो?’ 5 प्रभु सेना केरो यहोवा एन ज़ोते: हेर, अवं तेरे च़ेवरे पासां केरे सेभी रानेबाले केरि तरफां तेरे मने मां डर पैदा केरेलो, ते तेरे लोक अपने-अपने सामनेरे कढे गाले; ते ज़ैखन तैना दरबदर फिरेले, तैखन कोई तैन अकोट्ठे न केरेलो। 6 पन तैसेरे बाद अवं अम्मोनी लोकन गुलैमी मरां आनेलो; यहोवा एन ज़ोते।"

एदोमेरे खलाफ नबूवत

7 एदोमेरे बारे मां, सेना केरो यहोवा एन ज़ोते: "कुन तेमान नगरेरे लोकन मां हुनी किछ अक्ल न राई? कुन तैट्ठेरे ज्ञानी लोकां केरि योजना बेफल भोइ जेई? कुन तैन केरि अक्ल च़ली जेई? 8 हे ददानेरे रानेबालव नश्शा, वापस गाथ, तैड़ी छ़ेपतां बसा! किजोकि ज़ैखन अवं एसावे सज़ाह देइलो, तैखन तैस पुड़ भारी मुसीबत पेली। 9 अगर दाछ़रे ट्लोड़ने बाले तीं कां एज्जेथे, त कुन तैना कोन्च-कोन्च दाछ़ न छ़डेथे? ते अगर च़ोर राती एज्जेथे त कुन तैना ज़ेत्रू धन चातन त कुन तेत्रू लुटतां न नेथे? 10 किजोकि मीं एसाव नग्गो कियो, मीं तैसेरे छ़पनेरी ठारां बैंदी कियोरिन; इड़ी तगर कि तै छ़ेप्पी न सको। तैसेरू खानदान ते ढ्ला ते पड़ोसी सब नाश भोइ जे ते तैसेरो अन्त भोइ जेव। 11 अपने अनाथ बच्‍चे शारा, अवं तैन केरू ध्यान रखेलो; ते तुश्शी विधवा मीं पुड़ भरोसो रखन। 12 किजोकि यहोवा एन ज़ोते, हेरा, ज़ैना एसेरे काबल न थिये कि कुटोरे मरां पीन, तैन त पक्‍कू पीनू पेलू, फिरी कुन तू कोन्ची तरीके सेइं बेकसूर बच़ेलो? तू बेकसूर ठहरतां न बच़ेलो, तीं ज़रूर पीनू पेलू। 13 किजोकि यहोवा एन ज़ोते, मीं अपनि कसम खेवरीए, कि बोस्रा नगर उज़ड़ी गालू कि लोक हैरान भोल्हे, ते तैसेरू ऊपाम देइतां निन्दा केरेले ते लानत देले; ते तैसेरां सारां ड्लाव्वां हमेशारे लेई बेरान भोइ गालां।"

14 मीं यहोवारी तरफां खबर शुनी, बल्के कौमी-कौमी मां एन ज़ोनेरे लेई अक दूत भी भेज़ो, अकोट्ठे भोइतां एदोमे पुड़ चढ़ाई केरा; ते तैस सेइं लड़नेरे लेई उठा। 15 किजोकि मीं तू कौमन मां निकड़ो, ते मैन्हन मां घटिया कियोरोए। 16 हे चट्टानरी दरज़न मां बस्सोरे, हे पहैड़रे च़ोटी पुड़ क़िलो बनानेबाले! तेरे भयानक रूप ते मनेरे अभिमाने तीं धोखो दित्तोरोए। चाहे तू उकाबेरो ज़ेरो अपनो आल्हो उच्‍ची ठारी पुड़ बनास, फिरी भी अवं तैट्ठां तीं उसैलेलो, यहोवा एन ज़ोते।

17 "एदोम इड़ी तगर उज़ड़ी गालो कि ज़ै कोई तैसेरे सामने च़ले तै हैरान भोल्हो, ते तैसेरे सारे दुखन पुड़ च़ैड़ी देले। 18 यहोवारू एन वचने, कि ज़ेरि सदोम ते गमोरा ते तैन केरे आसे-पासेरे नगरन तबाह भोनेरे वजाई सेइं तैन केरि हालत भोवरी थी, तेरही हालत तैसेरी भोल्ही, तैड़ी न कोई मैन्हु रालो, ते न कोई मैन्हु तैस मां टिकेलो।✝49:18 उत्प. 19:24-25. 19 हेरा, तै शेरेरो ज़ेरो यरदनेरे आसे-पासेरे घने जंगलन सेइं हमेशा चरागान पुड़ च़ड़ेलो, ते अवं तैन्न तैसेरे सामनेरां लूशी कढेलो; तैखन ज़ैस अवं च़ुनी, तैस तैन पुड़ अधिकारी ठहरेइलो। मेरे ज़ेरो कौने? ते कौन मीं पुड़ मुकदमो च़लालो? तै पुहाल कोड़िए ज़ै मेरो मुकाबलो केरि सकेलो? 20 हेरा, यहोवा एदोमेरे खलाफ कुन योजना बनेवरीए; ते तेमानेरे लोकां केरे खलाफ कुन केरनेरे लेई सोचोरूए? पक्‍को तै भैड्डां-छ़ेल्‍ली केरे बच्‍चन दीलतां नेलो; तै चरागान भैड्डां-छ़ेल्‍लन करां ज़रूर खाली केरेलो। 21 तैन केरे बिछ़ड़नेरी आवाज़ी सेइं धरती हिल्‍लेली; ते एरी चिन्डां केरि शौर भोल्ही ज़ै लाल समुन्दरे तगर शुनोली। 22 हेरा, तै उकाबेरो ज़ेरो निस्तां उडरेलो, ते बोस्रा नगरे पुड़ अपने फंघां फैलालो, ते तैस दिहाड़े एदोमी बहादर सिपेही केरो मन गल्हे बिशोरी कौन्शरो ज़ेरो भोल्हो।"

दमिश्क नगरेरे खलाफ नबूवत

23 यहोवा दमिश्क नगरेरे बारे मां ज़ोते, "हमात ते अर्पाद नगरां केरि उमीद ट्लूटोरीए, किजोकि तैनेईं बुरी खबर शुनोरीए, तैना गेली जेवरेन; समुन्दरे पुड़ फिक्रे, तै च़ुप न भोइ सके। 24 दमिश्क कमज़ोर भोइतां नशनेरे लेई त फिरतीए, पन तैस बड़ी थर्क लग्गी, गल्हे बिशने बाले कौन्शरी ज़ेरि तकलीफ भोवरीए। 25 हाय, तैन नगर, तैन तारीफ़रे काबल नगर, ज़ैन मेरे खुशरी वजाए, तैन शारू जेवं! 26 सेना केरो यहोवा एन ज़ोते, कि तैसेरे जुवान चौकन मां बिछ़ोड़े गाले, ते सब बहादर सिपेही केरू ज़ोनू बन्द भोइ गालू। 27 अवं दमिश्केरी शहरपनाही मां अग लेइलो ज़ैस सेइं बेन्हदद राज़े मेहल भस्म भोइ गाले।"

केदार ते हासोरेरे खलाफ नबूवत

28 "केदार ते हासोर गोट्लां केरे रियासतां केरे बारे मां ज़ैन पुड़ बाबेलेरे राज़े नबूकदनेस्सरे हमलो कियो। यहोवा एन ज़ोते: उठतां केदारे पुड़ चढ़ाई केरा! पूरबेरे लोकन नाश केरा! 29 तैना तैन केरे डेरे ते भैड्डां-छ़ेल्‍ली आनेले, तेरे तेम्बु ते सब भांडां छ़ुइतां ऊँटन भी नेले, ते तैन लोकन पुकैरतां ज़ोले, ‘च़ेवरे पासन डरे-डरे।’ 30 यहोवा एन ज़ोते, हे हासोरेरे रानेबालव नश्शा! दूर-दूर दरबदर फिरा, कोस्कोई गेइतां छ़ेपतां बसा। किजोकि बाबेलेरे राज़े नबूकदनेस्सरे तुश्शे खलाफ योजना ते विचार कियोरोए।

31 "यहोवा एन ज़ोते, उठतां तैस सुखे सेइं रानेबाले कौमरे लोकन पुड़ हमलो केरा, ज़ैना निडर रहतन, ते तैन केरे फाटकन न त किवाड़ आन ते न अड्डे आन। 32 ते तैन केरां बेशुमार ऊँट ते गोरू ते गब्बां लुटी मां गालां, किजोकि अवं तैन्न तैन केरे दैड़ारे कूनेरे बालन उड़ेइतां च़ेवरे पासन तितर-बितर केरेलो; ते च़ेवरे पासना तैन पुड़ मुसीबत एन्हतां छ़डेलो, यहोवा एन ज़ोते। 33 हासोर गिद्दां केरि रानेरी ठार भोल्ही ते हमेशारे लेई बेरान भोइ गालू, तैड़ी न कोई मैन्हु रालो, ते न कोई मैन्हु तैस मां रालो।"

एलामेरे खलाफ नबूवत

34 यहूदा प्रदेशेरे राज़े सिदकिय्याहेरे राज़ केरनेरे शुरुआती मां यहोवा मीं सेइं एलाम मुल्खेरे बारे मां ज़ोवं।

35 सेना केरो यहोवा एन ज़ोते: "अवं एलामेरे धनुषे ट्लोड़ेलो, ज़ै तैन केरे ताकतरी खास वजा आहे; 36 ते अवं अम्बरेरे च़ेवरे पासना बात च़लेइतां च़ेवरे पासन इड़ी तगर तितर-बितर केरेलो, कि एरी कोई कौम न राली ज़ैस मां एलाम नेइशतां न एज्जे।✝49:36 प्रका. 7:1. 37 अवं एलामे तैन केरे जानरे दुश्मना ते तैन दुश्मना केरे हवाले केरेलो ज़ैना तैन्न जाना मारेले, ते तैन पुड़ अपनो क्रोध भड़केइतां मुसीबत छ़डेलो। यहोवा एन ज़ोते, कि तलवार तैन पुड़ च़लावेइतां अवं तैन्न नाश केरेलो; 38 ते अवं एलामे मां अपनो तखत रेखतां तैन केरे राज़े ते हाकिमन नाश केरेलो, यहोवा एन ज़ोते।

39 "पन यहोवा एन भी ज़ोते, कि आखरी दिहाड़न मां अवं एलामे गुलैमी मरां वापस आनेलो।"