यिर्मयाह 1

यहोवा यिर्मयाह नबी भोनेरे लेई कुजाते

1 हिल्किय्याहेरू मट्ठू यिर्मयाह ज़ै बिन्यामीन प्रदेशेरे अनातोत नगरे मां रानेबाले याजकां केरे खानदाने मरां थियो, तैसेरे इना वचन आन। 2 ज़ैस वक्त आमोनेरे मट्ठे योशिय्याहेरो यहूदा प्रदेशे पुड़ राज़ केरनेरो तेरहोवं साल थियो, तैस वक्त यहोवा यिर्मयाह नेबी सेइं गल की। 3 इसेरे बाद योशिय्याहेरे मट्ठे यहूदारे राज़े यहोयाकीमेरे राज़ केरनेरे वक्ते मां, ते यहोयाकीमेरे मट्ठे यहूदारे राज़े सिदकिय्याहेरे राज़े केरनेरे यारोवं सालेरे आखरी तगर भी यहोवा तैस सेइं गल्‍लां केरतो राव, ज़ांतगर कि तैस्से सालेरे पंच़ोंव महीने मां यरूशलेम नगरेरे लोक गुलैमी मां न च़ले जे।

4 एक्सां यहोवा मीं सेइं ज़ोवं, 5 "गर्भे मां रच़ने करां पेइले अवं तीं ज़ानताईं, ते पैदा भोने करां पेइले मीं तू च़ुनो; मीं तू कौमां केरो नबी ठहराव।"✝1:5 गल. 1:5. 6 तैखन मीं ज़ोवं, "हे प्रभु यहोवा! अवं न ज़ैनी कि लोकन मां केन्च़रे ज़ोनूए, किजोकि अवं हेजू निकड़ो आईं।" 7 पन यहोवा मीं सेइं ज़ोवं, "इन न ज़ो कि अवं निकड़ो आईं; किजोकि ज़ैन लोकन कां अवं तीं भेज़ी तैड़ी तू गालो, ते ज़ै भी हुक्म अवं तीं देईं तैन्ने तू ज़ोलो। 8 ते तू तैन करां न डेरां, किजोकि तीं बच़ानेरे अवं तीं सेइं साथी आईं, यहोवा एन ज़ोते।" 9 तैखन यहोवा हथ अग्रोवं केरतां मेरे एशी सेइं लाव; ते यहोवा मीं सेइं ज़ोवं, "हेर, मीं अपने वचन तेरे एशी मां छ़डोरेन।✝1:9 प्रेरित. 26:17;18:9,10.

दूई दर्शन

10 "शुन, अवं तीं अज़ कौमन ते रियासतन पुड़ अधिकार देताईं; कि तू तैन्न बिछ़ोड़स ते उन्ढे केरतस, नाश केरतस ते बरबाद केरस, तैन्न बनास ते लास।"

बदामेरी डालड़ी ते उबलतो पैनेरो पतीलो

11 फिरी यहोवा मीं सेइं एन ज़ोवं, "हे यिर्मयाह, तू कुन लाहोरोस हेरने?" मीं जुवाब दित्तो, "मीं बदामेरी अक डालड़ी लेइहोतीए।" 12 तैखन यहोवा मीं सेइं ज़ोवं, "तीं ठीक लेइहोते, किजोकि अवं ध्यान देइ राहोरोईं कि मेरू वचन पूरू भोए।"

13 फिरी यहोवा मीं पुछ़ू, "हुनी तीं कुन लेइहोने लगोरूए?" मीं जुवाब दित्तो, "उबलते पैनेरो अक पतीलो लेइहोते ज़ेसेरू बिल उत्तेरे पासेरां आहे।" 14 तैखन यहोवा मीं सेइं ज़ोवं, "इस मुल्खेरे सेभी लोकन पुड़ उतरेरे पासेरां मुसीबत एज्जनी आहे। 15 यहोवा एन भी ज़ोते, अवं उत्तरेरे पासेरे सारे कौमन कुजालो; ते तैन केरे राज़े एइतां यरूशलेम नगरेरे फाटकन मां ते तैसेरे च़ेवरे पासे केरि शहरपनाह, ते यहूदा प्रदेशेरे बाकी नगरन पुड़ हमलो केरेले। 16 अवं अपने लोकां केरि सैरी बुरैई केरे वजाई सेइं तैन सज़ाह देइलो। किजोकि तैनेईं अवं शैरतां होरि देबतां केरे लेई गुग्गल बालो ते एपनी बनेवरी मूरती केरि पूज़ा कियोरीए। 17 एल्हेरेलेइ तू खड़ो भोइतां तियार भो, ते ज़ैन किछ ज़ोनेरो अवं तीं हुक्म देईं तैन्ने तैन सेइं ज़ो। तू तैन केरू तुत्तर हेरतां न डेरां, एरू न भोए कि अवं तीं तैन केरे सामने घबरेइं। 18 किजोकि शुन, मीं अज़ तू इस सारे मुल्ख ते यहूदा प्रदेशेरे राज़न, हाकिमन, याजकन ते आम लोकां केरे खलाफ क़िले बालू नगर, ते लोंहेरो खम्भो, ते पितलरी शहरपनाहेरो ज़ेरो मज़बूत बनेवरो आस। 19 तैना लोक तीं सेइं लड़ेले, पन तैना तीं करां ज़ींती न बटेले, किजोकि बच़ानेरे लेई अवं तीं सेइं साथी आईं, यहोवा एन ज़ोते।"