यिर्मयाह 14

तलवार, काल ते मरी

1 यहोवा मीं सेइं शोहेरे बारे मां ज़ोवं, 2 "यहूदा मातम केरने लगोरोए, ते नगरेरे फाटकन मां लोक मातमेरां लिगड़ां लेइतां तल्‍ले उदास बिशोरेन; ते यरूशलेम नगरे मरां चिन्डां केरि शौर अम्बरे तगर पुज़ोरीए। 3 ते तैन केरे अमीर लोक अपने नौकरन त पैनेरे लेई भेज़तन; पन तैन्न खुहन कां एइतां पानी न मैल्हे, एल्हेरेलेइ खाली भांडां घिन्तां घरजो वापस एइतन; तैना शरमिन्दा ते परेशान भोइतां क्रोड़ी छ़ुपातन। 4 मुल्खे मां झ़ड़ी न भोनेरे वजाई सेइं ज़मीनी दालां पेवरिन, एस वजाई ज़मीनदार लोक परेशान भोइतां क्रोड़ी छ़ुपातन। 5 हिरनी भी मैइदाने मां बच्‍चे ज़र्म देइतां शारतीए किजोकि सब्ज़ घास न मैल्हे। 6 जंगली गधे भी पहाड़न पुड़ गिद्दां केरे ज़ेरे हमफतन। तैन केरि एछ़्छ़ी धुंधली भोइ गैतिन, किजोकि सब्ज़ घास बिलकुल भी नईं।"

7 लोक ज़ोतन, "हे यहोवा, इश्शे अधर्मेरां कम्मां इश्शे खलाफ गवाही देइ राहोरेन, असां तेरू साथ छ़ेडतां टेपलोइ बड़े दूर जेवरेम, ते असेईं तेरे खलाफ पाप कियोरोए; फिरी भी, तू अपने नंव्वेरे खातर किछ केर। 8 हे इस्राएलेरी उमीद यहोवा, मुसीबतरे वक्ते तैन केरो बच़ानेबालो तू ही आस, तू किजो इस मुल्खे मां एक्‍की परदेशेरो ज़ेरो आस? तू किजो मुसाफरेरो ज़ेरो आस ज़ै रात कटनेरे लेई कोन्च रुकोतो भोए? 9 तू किजो तैस मैन्हेरो ज़ेरो लगतस ज़ैस पुड़ हमलो कियोरो भोए या एरे सिपेहेरो ज़ेरो ज़ै बच़ेइ न सके? फिरी भी हे यहोवा तू इश्शे दरमियान आस, असन जो तेरे ज़ोतन; एल्हेरेलेइ असन न शार।"

10 यहोवा एन लोकां केरे बारे मां इन ज़ोवं: "एन एन्च़रे भटकनू रोड़ू लगते; एना कुकर्मे मां च़लने करां न रुके; एल्हेरेलेइ यहोवा एन सेइं खुश नईं, तै एन केरो अधर्म याद केरेलो ते तैन केरे पापेरी सज़ाह देलो।"

झूठे नेबन सज़ाह मैल्हनी

11 फिरी यहोवा मीं सेइं ज़ोवं, "इन लोकां केरे भलैइयरे लेई प्राथना न केर। 12 चाहे तैना बरत भी रखन, फिरी भी अवं तैन केरि बिनती न शुनेलो, ते चाहे तैना होमबलि ते अन्नबलि च़ाढ़न, फिरी भी अवं तैन सेइं खुशी न भोल्हो; अवं तलवार, काल ते मरी एरे ज़िरिये तैन केरो अन्त केरेलो।"✝14:12 यहे. 8:18.

13 तैखन मीं ज़ोवं, "हाय, प्रभु यहोवा, हेर, नबी एन सेइं ज़ोतन, ‘न तुसन पुड़ तलवार च़लेली ते न काल पेलो, यहोवा तुसन इस ठैरी मां हमेशारी शान्ति देलो।’" 14 तैखन यहोवा मीं सेइं ज़ोवं, "एना नबी मेरे नव्वें सेइं झूठी नबूवत केरतन, मीं न तैना भेज़े ते न तैन कोई हुक्म दित्तो ते न तैन सेइं कोई भी गल ज़ोई। तैना तुसन सेइं दर्शनेरो झूठो दावो केरतां अपने ही मनेरी फुज़ूल ते धोखेरी नबूवत केरतन।✝14:14 यहे. 13:6. 15 एल्हेरेलेइ ज़ैना नबी मीं नईं भेज़ोरे ते मेरे नव्वें सेइं नबूवत केरतन, ‘तैस मुल्खे न तलवार च़लेली ते न काल पेलो,’ तैन केरे बारे मां यहोवा इन ज़ोते, कि तैना नबी एप्पु तलवार ते काले सेइं नाश भोल्हे। 16 ते ज़ैन लोकन सेइं तैना नबूवत केरतन, तैना काल ते तलवारी सेइं मारने गाने पुड़ एन्च़रे सेइं यरूशलेमेरी सड़कन मां शारे गाले, ते न त तैन, ते न तैन केरि कौन्शन ते तैन केरे मट्ठन-कुइयन कोई दबने बालो भोल्हो। किजोकि अवं तैन केरे बुरैई केरो फल तैन देलो।"

यिर्मयाहेरी बिनती

17 यहोवा यिर्मयाह सेइं ज़ोवं, "तू तैन सेइं ई गल ज़ो, ‘मेरी एछ़्छ़न सेइं रात दिहैड़ी ऐंखरू लगातार बगतां रां, तैना रुकन न किजोकि मेरे लोकां केरि कुई ढ्लन्च़ी जेई ते ज़खमी भोइ। 18 अगर अवं मैइदाने मां गेईं, त हेरा, तलवारी सेइं मारोरां केरि लाशन! ते अगर अवं नगरे मां गेईं, त हेरा, ढ्लुखी सेइं बेहोश पेवरेन! किजोकि नबी ते याजक अपनु कम केरि राहोरेन पन तैना न ज़ानन कि कुन केरन।’"

19 कुन तीं यहूदा प्रदेशे पुड़ां बिलकुल अपनो हथ खड़ो कियोरोए? कुन तू सिय्योने सेइं नफरत केरतस? नईं, तीं किजो असन एरी सज़ाह दित्ती कि अस न बेझ़ोम? असां शैन्तरो इंतज़ार केरि राहोरेम, फिरी भी कोई भलियाई न भोइ; ते अगर अस ठीक भोनेरी उमीद केरतम, त फिरी भी घबरानू पेते। 20 हे यहोवा, असां अपनि बुराई ते अपने दादे-पड़दादां केरे अधर्म भी मन्तम, किजोकि असेईं तेरे खलाफ पाप कियोरोए। 21 अपने नंव्वेरे खातर असन न शार; अपने महिमा बाले तखते बेइज़्ज़त न केर; ज़ै करार तीं असन सेइं कियो, तैस याद केर ते तैस न ट्लोड़। 22 कुन कौमां केरि मूरतन मरां कोई झ़ड़ी ऐनी सकतीए? कुन अम्बरे मरां झ़ड़ी भोइ सकतीए? हे इश्शे परमेशर यहोवा, कुन तूए एन सब गल्‍लां केरो केरनेबालो नईं? असां तेरो सहारो हेरतम, किजोकि इना सैरी चीज़ां केरो बनानेबालो तूए आस।