यिर्मयाह 47

पलिश्ती केरे खलाफ नबूवत

1 मिस्र मुल्खेरे राज़े फ़िरौनेरे गाज़ा नगरे पुड़ हमलो केरने करां पेइले यहोवा मीं सेइं पलिश्ती केरे बारे मां ज़ोवं, 2 "यहोवा एन ज़ोते कि हेरा, उत्तर पासेरां बगने बालो दरिया मुल्खे तैस सब समेत ज़ैन तैस मांए, ते तैस मां रानेबालन लोकन समेत नगरे रुड़ालो। तैखन मैन्हु चिन्डां मारेले, बल्के मुल्खेरे सब रानेबाले हाय-हाय केरेले। 3 दुश्मना केरे ताकतबर घोड़ां केरे रौन्ने, रथ्थां केरे तेज़ च़लने ते तैन केरे पेइहां केरे च़लनेरी शौर शुन्तां बाजी केरे हथ पव एरां ढिल्‍ले भोइ गाले, कि तै तुत्तर फिरेइतां अपने मट्ठन भी न हेरी बटेलो। 4 किजोकि सब पलिश्ती केरि नाश भोनेरी दिहाड़ी एवरीए; ते सोर ते सीदोन नगरां केरे सब बच़ोरे मद्दत केरनेबाले मिटी गाले। किजोकि यहोवा पलिश्तन ज़ैना कप्तोर नंव्वेरे समुन्दरेरे बन्नेरे बच़ोरे रानेबालेन, तैन्न भी नाश केरने पुड़े। 5 गाज़ा नगरेरे लोकेईं टिन्ड बनेवरीए, अश्कलोन नगर ज़ैन पलिश्ती केरे वैदी मां अकैल्‍लू रेइ जेवं, तैन भी मिटवं जेवरूए; तू किताली तगर अपनि जान चीरतो रालो?

6 "ओ यहोवारी तलवार! तू किताली तगर च़ुप न भोल्ही? तू अपने म्याने मां च़ली गा, च़ुप भोइ गा, ते रुकी गा! 7 तू केन्च़रे रुकी सकतिस? किजोकि यहोवा तू हुक्म देइतां अश्कलोन ते समुन्दरेरे बन्नेरे खलाफ ठहरावरी आस।"