यिर्मयाह 45

बारूकेरे लेई यहोवारो सन्देश

1 योशिय्याहेरे मट्ठे यहूदारे राज़े यहोयाकीमेरे राज़ केरनेरे च़ेवरोवं साले मां, ज़ैखन नेरिय्याहेरू मट्ठू बारूक मीं करां नबूवतरे इना वचन शुन्तां किताबी मां लिखे, 2 तैखन मीं तैस सेइं इन वचन ज़ोवं: "इस्राएलेरो परमेशर यहोवा, तीं सेइं एन ज़ोते, 3 हे बारूक, तीं ज़ोवं, ‘अफ़सोस मीं पुड़! किजोकि यहोवा मीं दुखे पुड़ दुख दित्तोरोए; अवं ट्लसतो-ट्लसतो थेकी जेव ते मीं कोई आराम न मैल्हो।’ 4 तू एन्च़रे सेइं ज़ो, यहोवा एन ज़ोते: हेर, ऐह सारो यहूदा प्रदेश ज़ै मीं बनेवरोए, तैस अवं एप्पु बिछ़ोड़ेलो, ते ज़ै मीं लेवरो थियो, तैस एप्पु ढ्लूड़ेलो। 5 एल्हेरेलेइ शुन, कुन तू अपने लेई तारीफ़री गल्‍लां लगोरोस तोप्पने? तैस न तोप; किजोकि यहोवा एन ज़ोते, कि अवं सारे लोकन पुड़ मुसीबत छ़डेलो; पन ज़ैड़ी भी तू गालो तैड़ी अवं तेरी जान बच़ेइतां तीं ज़ींतो रखेलो।"