1 ज़ैखन यिर्मयाह ई नबूवत केरि राहोरो थियो, तैखन इम्मेरेरू मट्ठू पशहूर ज़ै याजक ते यहोवारे भवनेरो प्रधान रखवालो थियो, तैनी सब शुनू। 2 तैखन पशहूरे यिर्मयाह नबी मड्डो ते तै तैस काठे छ़डो ज़ैन यहोवारे भवने करां बा बिन्यामीनेरे फाटके कांए।✝ 3 झ़ेझ़ां ज़ैखन पशहूरे यिर्मयाह काठे मरां कढाव, तैखन यिर्मयाह तैस सेइं ज़ोवं, "यहोवा तेरू नवं पशहूर नईं मागोर्मिस्साबीब* रखोरूए। 4 किजोकि यहोवा इन ज़ोवरूए, हेर, अवं तीं तेरे लेई ते तेरे सब दोस्तां केरे लेई भी डरेरी वजा ठहरेइलो। तैना तेरे सामने अपने दुश्मना केरि तलवारी सेइं मारे गाले। ते अवं सब यहूदी लोकन बाबेलेरे राज़ेरे कब्ज़े मां केरेलो; तै तैन कैदी बनेइतां बाबेले मांजो नेलो, ते तलवारी सेइं मारेलो। 5 फिरी अवं इस यरूशलेम नगरेरी सारी दौलत ते इस मां ज़ै कमाई आहे ते सब कीमती चीज़ां ते यहूदारे राज़ां केरि ज़ेत्री धन-दौलते, तै सब तैन केरे दुश्मना केरे कब्ज़े मां केरेलो; ते तैना तैस लुटतां अपनि बनाले ते बाबेल मांजो नेले। 6 ते हे पशहूर, तू तैन सेभन समेत ज़ैना तेरे घरे मां रहतन गुलैमी मां च़लो गालो; अपने तैन दोस्तन समेत ज़ैन सेइं तीं झूठी नबूवत की, तू बाबेले मां गालो ते तैड़ी मरेलो, ते तैड़ी तू भी ते तैना भी दब्बे गाले।"

7 हे यहोवा, तीं मीं धोखो दित्तो, ते मीं धोखो खाव; तू मीं करां ताकतबर आस, एल्हेरेलेइ तू मीं पुड़ हावी भोइ जेव। सैरी दिहैड़ी मेरो मज़ाक बनाव गाते, सब मेरो मज़ाक उड़ातन। 8 किजोकि ज़ैखन अवं गल्‍लां केरताईं, तैखन अवं ज़ोरे-ज़ोरे सेइं ललकारताईं, "ज़ुलम ते तुबाही भोइ, हाँ तुबाही!" किजोकि यहोवारू वचन सारे दिहैड़ी मेरे लेई निन्दा ते मज़ाकेरी वजा भोतू राव। 9 अगर अवं अपने आपे सेइं ज़ोईं, "अवं तेरी चर्चा न केरेलो न तैसेरे नंव्वे सेइं किछ ज़ोलो," त मेरे दिलेरी हालत एरी भोल्ही ज़ेन्च़रे मेरी हेड्डन मां बलती अग भोए, ते अवं अपने आपे रोकते-रोकते थेकी जेवरोईं पन अवं रेई न बेट्टी।✝ 10 मीं बड़े लोकन करां अपनि निन्दा शुनोरीए। च़ेवरे पासन डरे-डरे! मेरी ज़ान-पिशानरे सब ज़ैना मीं ठोकर लगनी बलगतन, तैना ज़ोतन, "तैसेरे दोष ज़ोथ, तैखन असां तैसेरी चर्चा फैलामेले। अगर तै धोखो खाए, त असां तैस पुड़ हावी भोमेले, ते तैस करां बदलो नेमेले।" 11 पन यहोवा मीं सेइं साथीए, तै खतरनाक सिपेहेरो ज़ेरोए; एल्हेरेलेइ मेरे सतानेबाले मीं पुड़ हावी न भोल्हे, तैना ठोकर खेइतां बिछ़ड़ेले। तैना अक्ली सेइं कम न केरन, एल्हेरेलेइ तैन्न बड़ू शरमिन्दा भोनू पेनूए। तैन केरि बेज़ती हमेशा बनोरी राली ते कधे बिसरी न गाली। 12 हे सेना केरे यहोवा, हे धर्मी लोकां केरे परखने बाला ते दिल ते मने ज़ाने बाला, ज़ैखन तू तैन करां बदलो नेलो, तैस अवं हेरेलो, किजोकि मीं अपनो मुकदमो तीं पुड़ छ़डोरोए।

13 यहोवारे लेई गीत ज़ोथ; यहोवारी तारीफ़ केरा! किजोकि तै गरीब मैन्हेरे प्राण कुकर्मी लोकां केरे हथ्थेरां बच़ाते।

14 ज़ैस दिहाड़े मेरू ज़र्म भोवं तैस पुड़ लानत! ज़ैस दिहाड़े मेरी अम्मा मीं ज़र्म दित्तू तैस जो धन न ज़ोथ! 15 लानती भोए तै मैन्हु ज़ैनी मेरे बाजी ई खबर देइतां तै बड़ो खुश कियो कि तीं मट्ठू भेवरूए। 16 तैस मैन्हेरो हाल तैन नगरां केरो ज़ेरो भोए ज़ैना यहोवा दया न केरतां नाश कियां; तैस झ़ेझ़ां त चिन्डां केरि शौर ते दुपहरेईं जंगरी ललकार शुनोती राए, 17 किजोकि तैनी अवं पेटे मां न मारो कि मेरी अम्मरू पेट मेरी कब्र भोथी, ते अवं तैस्से मां हमेशा पेवरो राथो। 18 अवं किजो दुख तकलीफ ते मातम भोगनेरे लेई ज़र्मो कि अपने ज़िन्दगी मां मेहनत ते दुख हेरी, ते अपने दिहाड़े बदनैमी मां गुज़ैरी?