यिर्मयाह 28

हनन्याहेरी झूठी नबूवत

1 फिरी तैस्से साल, यानी यहूदारे राज़े सिदकिय्याहेरे राज़ केरनेरे च़ेवरोवं सालेरे पंच़ोंव महीने मां, अज्जूरेरू मट्ठू हनन्याह ज़ै गिबोन नगरेरो अक नबी थियो, तैनी मीं सेइं यहोवारे भवने मां, याजकन ते सब लोकां केरे सामने ज़ोवं, 2 "इस्राएलेरो परमेशर सेना केरो यहोवा इन ज़ोते, मीं बाबेलेरे राज़ेरो जुओ*28:2 जुओ शक्ति ट्लोड़ी छ़डोरोए। 3 यहोवारे भवनेरां ज़ेत्रे भांडां बाबेलेरो राज़ो नबूकदनेस्सर इस ठैरी*28:3 इस ठैरी यरूशलेम मरां छ़ुइतां बाबेल जो जेव, तैन्न अवं दूई सालां केरे अन्तर फिरी इस ठारी मां आनेलो। 4 मीं यहूदारे राज़े यहोयाकीमेरू मट्ठू यकोन्याह ते सब यहूदी कैद भोइतां बाबेल जो नेवरेन, तैन भी इस ठैरी मां वापस आनेलो; किजोकि मीं बाबेलेरे राज़ेरो जुओ ट्लोड़ोरोए, यहोवा एन ज़ोते।"

हनन्याह यिर्मयाह नेबेरो जुवाब

5 तैखन यिर्मयाह नेबे हनन्याह नेबी सेइं, याजकां केरे ते तैना सब लोकां केरे सामने ज़ोवं, ज़ैना यहोवारे भवने मां खड़े भोवरे थिये, 6 "आमीन! यहोवा एरू केरे; ज़ैना गल्‍लां तीं नबूवत केरतां ज़ोईं कि यहोवारे भवनेरां भांडां ते सब कैदी बाबेले मरां इस ठैरी मां फिरी वापस एज्जेले, तैन्न यहोवा पूरू केरे। 7 फिरी मेरू इन वचन शुन, ज़ैन अवं तीं ते सब लोकन शुनाताईं। 8 ज़ैना नबी पुराने ज़माने करां मीं करां ते तीं करां पेइले भोते एवरेन, तैनेईं त बड़े मुल्ख ते बड्डे-बड्डे मुल्खां केरे खलाफ जंग ते मुसीबत ते मरी एरे बारे मां नबूवत कियोरी थी। 9 पन ज़ै नबी सुखेरे बारे मां नबूवत केरे, त ज़ैखन तैसेरू ज़ोवरू पूरू भोए, तैखन तैस नेबेरे बारे मां इन पक्‍कू भोल्हु कि ऐह सच़्च़े यहोवारो भेज़ोरोए।"

हनन्याह यिर्मयाह नेबेरू जुऊं ट्लोड़ते

10 तैखन हनन्याह नेबे तैन लेकड़रू जुऊं ज़ैन यिर्मयाह नेबेरे मेट्टू पुड़ थियूं, ओसैलतां ट्लोड़ू। 11 ते हनन्याहे सेभी लोकां केरे सामने ज़ोवं, "यहोवा इन ज़ोते कि एस्से तरीके सेइं अवं पूरे दूई साल केरे अन्तर बाबेलेरे राज़े नबूकदनेस्सरेरू जुऊं सेभी कौमां केरे मेट्टू पुड़ेरां ओसैलतां ट्लोड़ेलो।" तैखन यिर्मयाह नबी तैट्ठां च़लो जेव।

हनन्याहेरे खलाफ यहोवारू वचन

12 ज़ैखन हनन्याह नेबे मेरे मेट्टू पुड़ेरां जुऊं ओसैलतां ट्लोड़ू, तैसेरे बाद यहोवा मीं सेइं ज़ोवं; 13 "गेइतां हनन्याह सेइं इन ज़ो, ‘यहोवा इन ज़ोते कि तीं लेकड़रू जुऊं त ट्लोड़ू, पन एन केरतां तीं तैसेरे बदले लोंहेरो जुओ बनाव। 14 किजोकि इस्राएलेरो परमेशर, सेना केरो यहोवा इन ज़ोते कि अवं एना सब कौमां केरे मेट्टू पुड़ लोंहेरो जुओ रखताईं ते तैना बाबेलेरे राज़े नबूकदनेस्सरेरे अधीन राले, ते एन तैसेरे अधीन भोनू पेलू, किजोकि मैइदानेरे जीप-जन्तू भी अवं तैसेरे कब्ज़े मां केरताईं।’" 15 यिर्मयाह नेबे हनन्याह नेबी सेइं इन भी ज़ोवं, "हे हनन्याह, हेर यहोवा तू नईं भेज़ोरो, तीं एन लोकन झूठी उमीद दित्तोरीए। 16 एल्हेरेलेइ यहोवा तीं सेइं इन ज़ोते, ‘हेर, अवं तीं धरती पुड़ेरां सलहेलो, इस्से साले तू मरेलो; किजोकि तीं लोकन यहोवा करां दूर भोनेरी गल्‍लां ज़ोवरिन।’" 17 एस वचनेरे मुताबिक हनन्याह तैस्से सालेरे सत्तोवं महीने मां मेरि जेव।