1 ज़ैखन बाबेलेरो राज़ो नबूकदनेस्सर अपनि सारी सेना समेत ते दुनियारी ज़ेत्री रियासतन पुड़ तै राज़ केरतो थियो, तैन सेभी लोकन समेत यरूशलेम ते तैसेरे सब ड्लाव्वन सेइं लेड़ी राहोरो थियो, तैखन यहोवा मीं सेइं ज़ोवं, 2 "इस्राएलेरो परमेशर यहोवा इन ज़ोते: गेइतां यहूदा प्रदेशेरे राज़े सिदकिय्याह सेइं ज़ो, ‘यहोवा इन ज़ोते: हेर, अवं इस नगरे बाबेलेरे रोज़ेरे कब्ज़े केरनेबालो आईं, ते तै एस फुकेलो। 3 तू तैसेरे हथ्थेरां न बच़ालो, सच़्च़े ट्लाव गालो ते तैसेरे हथ्थे कियो गालो; ते अपने एछ़्छ़न सेइं बाबेलेरे राज़े हेरेलो, ते तुस आमने-सामने गल्‍लां केरेले; ते तू गुलाम बेनतां बाबेल जो गालो।’ 4 फिरी भी हे यहूदा प्रदेशेरे राज़े सिदकिय्याह, यहोवारू इन भी वचन शुन, ज़ैन यहोवा तेरे बारे मां ज़ोते: ‘तू जंगी मां तलवारी सेइं मारो न गालो। 5 तू सुखे सेइं मरेलो। ते ज़ेन्च़रां तेरे दादे-पड़दादां केरे लेई यानी ज़ैना तीं करां पेइले राज़े थिये, तैन केरे लेई खुशबूदार चीज़ां फुक्‍की जेई, तेन्च़रे ही तेरे लेई भी फुक्‍की गैली; ते लोक इन ज़ोइतां, "ओ मेरे मालिक!" तेरे लेई छाती पिट्टेले, यहोवा एन ज़ोते।’"

6 इना सब मीं यहूदारे राज़े सिदकिय्याह सेइं यरूशलेम नगरे मां तैस वक्त ज़ोए, 7 ज़ैखन बाबेलेरे राज़ेरी सेना यरूशलेम ते यहूदारां ज़ेत्रे नगर बच़ोरां थिये, तैन सेइं मतलब लाकीश ते अजेका नगरन सेइं लड़ने लगोरी थी; किजोकि यहूदा प्रदेशेरां ज़ैना क़िले बालां नगर थिये तैन मरां सिर्फ तैन्ना ही रेई जेवरे थिये।

8 यहोवा एन वचन मीं सेइं तैस मौके ज़ोवं, ज़ैखन सिदकिय्याह राज़े सारे लोकन करां ज़ैना यरूशलेमे मां थिये, ई करार कियो कि गुलामां केरो आज़ाद भोनेरो प्रचार कियो गाए, 9 कि सब लोक अपने-अपने इब्रानी गुलाम मड़दन कौन्शन आज़ाद केरतां गाने देन, ते कोई अपने यहूदी ढ्लाए करां फिरी अपनि सेवा न करवाए। 10 तैखन सब हाकिमेईं ते सारे लोकेईं ई वाधो कियो कि असां अपने-अपने गुलाम कौन्शन मड़दन आज़ाद केरमेले ते फिरी तैन करां अपनि सेवा न कराले; एल्हेरेलेइ तैस वाधेरे मुताबिक तैना आज़ाद किये। 11 पन किछ वक्तेरां बाद तैनेईं अपनो मन बदलो ते ज़ैना गुलाम मड़द कौन्शां तैनेईं आज़ाद केरतां गाने दित्तोरे थिये, तैना फिरी अपने-अपने अधीन केरतां गुलाम बनाए। 12 तैखन यहोवा मीं सेइं ज़ोवं, 13 "इस्राएलेरो परमेशर यहोवा तुसन सेइं इन ज़ोते, ज़ैस मौके मीं तुश्शे दादे-पड़दादे गुलैमरे घरे यानी मिस्र मुल्खे मरां केढतां आनोरे थिये, तैस मौके मीं तैन सेइं इन ज़ोइतां करार कियो, 14 ‘तुश्शो ज़ै इब्रि ढ्ला तुसन जो बेच़ो गाए तैस तुस सत्तोवं सालेरे आखरी मां आज़ाद केरथ; शा साल त तै तुश्शी सेवा केरे पन एसेरां बाद तुस तैस आज़ाद केरतां एप्पु करां गाने देइयथ।’ पन तुश्शे दादे-पड़दादेईं मेरी न शुनी, ते मेरे गल्‍लन पुड़ ध्यान न दित्तू। 15 तुसेईं हुन्ना मन त फिरावरो थियो ते अपने-अपने ढ्लाए आज़ाद केरनेरो प्रचार केरतां ज़ैन कम मेरी नज़री मां भलूए तैन तुसेईं कियोरू थियूं, ते ज़ैस भवने जो मेरो ज़ोतन तैस मां मेरे सामने करार भी कियोरो थियो; 16 पन तुस टेपलोइ जे ते मेरू नवं एस तरीके सेइं अशुद्ध कियूं कि ज़ैना गुलाम मड़द कौन्शां तुसेईं आज़ाद केरतां तैन केरि इच्छाई पुड़ छ़डोरे थिये, तैना तुसेईं फिरी अपने कैबू किये, ते तैना फिरी तुश्शे गुलाम बेनि जे। 17 एल्हेरेलेइ यहोवा इन ज़ोते: तुसेईं ज़ै मेरे हुक्मेरे मुताबिक अपने-अपने ढ्लाएरे आज़ाद भोनेरो प्रचार न कियो, एल्हेरेलेइ यहोवा इन ज़ोते, शुना, अवं तुश्शे एन्च़रे सेइं आज़ाद भोनेरो प्रचार केरताईं कि तुस तलवार, मरी ते काले मां पेले; ते अवं एरू केरेलो कि तुस दुनियारे अलग-अलग मुल्खन मां दरबदर फिरेले। 18 ज़ैना लोक मेरे करारे ट्लोड़तन ते ज़ै वाधो तैनेईं मेरे सामने ते बछ़ड़ेरे दूई हिस्से केरतां तैसेरे दूईये हिस्सां केरे मझ़ाटे भोइतां कियो पन तै पूरो न कियो, 19 मतलब यहूदा प्रदेश ते यरूशलेम नगरेरे हाकिम, खोजे, याजक ते आम लोक ज़ैन बछ़ड़ेरे हिस्सां केरे मझ़ामेई भोइतां जेवरे थिये, 20 तैन्न अवं तैन केरे दुश्मना यानी ज़ैना तैन्न जाना मारने चातन तैन केरे अधीन केरेलो ते तैन केरि लाश अम्बरेरे च़ुड़ोलू ते मैइदानेरे जानबरां केरि खूराक भोल्ही। 21 अवं यहूदारो राज़ो सिदकिय्याह ते तैसेरे हाकिमन तैन केरे जानरे दुश्मना केरे यानी बाबेलेरे राज़ेरे सेनारे कब्ज़े मां केरेलो, ज़ैन तुश्शे सामनेरां च़ली जेवरी 22 यहोवा एन ज़ोते कि हेरा, अवं तैन हुक्म देइतां इस नगरे कां वापस आनेलो ते तैना लेड़तां एस पुड़ कब्ज़ो केरेले ते एस फुकेले ते यहूदारे नगरन अवं एन्च़रे उज़ाड़ेलो कि कोई तैन मां न रालो।"