यिर्मयाह 22

पापी राज़ेरे खलाफ न्याय

1 यहोवा मीं सेइं एन ज़ोवं, "यहूदारे राज़ेरे मेहले मां गेइतां इन वचन ज़ो, 2 हे दाऊदेरे तखते पुड़ बिश्शोरे यहूदारे राज़ा, तू अपने अधिकैरन ते अपने लोकन समेत ज़ैना इस फाटके मां भोइतां एइतन, यहोवारू वचन शुन। 3 यहोवा एन ज़ोते, न्याय ते धार्मिकतारां कम्मां केरां; ते ज़ैना लुट्टे जेवरेन तैन्न ज़ुलम केरनेबालेरे हथ्थेरां छुटाथ। ते परदेशी, अनाथ ते विधवा पुड़ अंधेर ते ज़ुलम न केरा, न एस ठैरी मां बेकसूर लोकन मारा। 4 हेरा, अगर तुस एरू केरेले, त एस मेहलेरे फाटके मांमेइं भोइतां दाऊद राज़ेरे तखते पुड़ बिश्शोरे राज़ेरे रथ्थन ते घोड़न पुड़ च़ेढ़तां अपने-अपने अधिकैरन समेत ते लोकन समेत दाखल केरेले। 5 पन अगर तुस एन गल्‍लन न मन्नथ त, अवं अपनि कसम खेइतां ज़ोताईं, यहोवा एन ज़ोते, कि ई मेहल उज़ाड़ो गालो।✝22:5 मत. 23:38;लूक. 13:35. 6 किजोकि यहोवा यहूदारे राज़ेरे एस मेहलेरे बारे मां एन ज़ोते, तू मीं गिलाद प्रदेशेरे जंगलेरो ज़ेरो ते लबानोनेरे पहाड़ां केरो ज़ेरो खूबसूरत लेइहोतस, पन सच़्च़े अवं तीं सुनसान ठार ते अक गैर आबाद नगर बनेइलो। 7 पन अवं नाश केरनेबालन हथियार देइतां तेरे खलाफ भेज़ेलो; तैना तेरे खूबसूरत गैइड़न केटतां अग्गी मां छ़ेडतां फुकेले। 8 ज़ैखन कौमां-कौमां केरे लोक एस नगरेरे सामने निस्सेले तैखन एक्‍की होरि पुछ़ेले, ‘यहोवा इस बड़े नगरेरी हालत एरी किजो कियोरीए?’ 9 तैखन लोक ज़ोले, ‘एसेरी वजा ई आहे कि तैनेईं अपने परमेशर यहोवारो करार ट्लोड़तां होरि देबतां केरि पूज़ा की ते तैन केरि सेवा की।’"

शल्‍लूम राज़ेरे बारे मां यिर्मयाह नेबेरो सन्देश

10 यहोवा एन भी ज़ोते, मरोरे राज़े योशियाहेरे लेई लेरां न देथ, तैसेरे लेई मातम न केरा। बल्के शल्‍लूम राज़ेरे लेई ज़ोरे सेइं लेरां देथ ज़ै गुलैमी मां च़लो जेवरोए, किजोकि तै वापस गेइतां अपनि ज़र्म धेरती फिरी कधी न हेरी बटेलो। 11 किजोकि यहूदारे राज़े योशिय्याहेरू मट्ठू शल्‍लूम अपने बाजी केरे ठारी पुड़ राज़ो बनोरू थियूं ते इस ठैरारां च़लू जेवं, तैसेरे बारे मां यहोवा एन ज़ोते, "तै फिरी इड़ी वापस कधी न एज्जी बटेलो। 12 तै ज़ैस ठारी कैदी भोइतां जेवरोए तैस्से मां मेरि गालो, ते एस मुल्खे फिरी कधी न लेही बटेलो।"

यहोयाकीम राज़ेरे बारे मां यिर्मयाह नेबेरो सन्देश

13 "तैस पुड़ अफ़सोस ज़ै अपने घरे अधर्मे सेइं ते अपनि बेहीं छत्तां अन्याये सेइं बनावाते; ज़ै अपने पड़ोसी सेइं ज़बरदस्ती कम कराते ते तैसेरी मज़दूरी न दे। 14 तै ज़ोते, ‘अवं अपने खुल्‍लू डुल्‍लू घर ते हवाई बाली बेइयें छत बनेइलो,’ ते दैरी बनेइतां तैन्न गैइड़ेरी लकड़ी लाते, ते तैन लाल रंग लाते। 15 तू ज़ै गैइड़ेरी लेकड़री खुवैइश रखतस, कुन एस तरीके सेइं तेरू राज़ मज़बूत रालू। हेर, तेरो बाजी न्याय ते धार्मिकतारां कम्मां केरतो थियो, ते तै खातो पीतो ते सुखे सेइं भी रहतो थियो! 16 तै एल्हेरेलेइ सुखे सेइं रहतो थियो, किजोकि तै गरीब ते ज़रूरतमन्द लोकां केरो न्याय केरतो थियो। कुन इन्ने मेरू ज्ञान रखनू नईं? यहोवा एन ज़ोते। 17 पन तू सिर्फ अपनो ही फैइदो हेरतस, ते बेकसूरे मारने ते अंधेर ते ज़ुलम केरने मां अपनो मन ते ध्यान देतस।"

18 एल्हेरेलेइ योशिय्याहेरे मट्ठे यहूदारे राज़े यहोयाकीमेरे बारे मां यहोवा एन ज़ोते: "ज़ेन्च़रे लोक इस तरीके सेइं ज़ोइतां लेरां देतन, ‘ओ मेरे ढ्ला, ओ मेरी बेइन!’ एन्च़रे सेइं कोई ‘ओ मेरे मालिक,’ या ‘ओ तेरी शान-ओ-शोकत,’ ज़ोइतां तैसेरे लेई मातम न केरेलो। 19 बल्के तै गधेरो ज़ेरो दब्बो गालो, तै दीलतां यरूशलेम नगरेरे फाटकां केरे बेइर शारो गालो।"

20 "लबानोने पुड़ पेइतां हाय-हाय केर, तैखन बाशाने मां गेइतां उच्‍ची आवाज़ी सेइं चिन्डां मार; फिरी अबारीम पहाड़े पुड़ गेइतां हाय-हाय केर, किजोकि तेरे सब दोस्त नाश भोइ जेवरेन। 21 तेरे सुखेरे वक्त मीं तू खबरदार कियोरो थियो, ‘पन तीं मेरी शुन्ने करां इन्कार कियो।’ जुवान भोनेरे वक्ते करां तेरी चाल एरी आहे कि तू मेरी गल न शुनस। 22 तेरे सब पुहाल*22:22 पुहाल अगुवे बाते सेइं उडरेले, ते तेरे दोस्त गुलैमी मां च़ले गाले; सच़्च़े तू तैस मौके अपने सारे बुरैई केरे वजाई सेइं शरमिन्दा भोल्ही। 23 हे लबानोनेरी रानेबाली, हे गैइड़न मां अपनो आल्हो बनाने बाली, ज़ैखन तीं गल्हे बिशने बाले कौन्शरी ज़ेरि तकलीफ भोए तैखन तू परेशान भोइ गाली!"

यहोयाकीम राज़े यहोवा सज़ाह देते

24 यहोवा एन ज़ोते: "मीं अपनि कसम, चाहे यहोयाकीमेरू मट्ठू यहूदा प्रदेशेरो राज़ो कोन्याह, मेरे देइने हथ्थेरे मोहोरी बाली आंवठी भी भोथो, फिरी भी अवं तैस खोलतां शैरेथो। 25 अवं तीं तेरे जानरे दुश्मना केरे हथ्थे, ते ज़ैन करां तू डरतस तैन केरे मतलब बाबेलेरे राज़े नबूकदनेस्सर ते कसदी लोकां केरे हथ्थे केरि देइलो। 26 अवं तीं तेरी अम्मा समेत एक्‍की बखले मुल्खे मां शैरी छ़डेलो ज़ै तुश्शी ज़र्म धेरतली नईं, ते तुस तैड़ी मेरि गाले। 27 पन ज़ैस मुल्खे मां तैना वापस एजनेरी बड़ी इच्छा केरतन, तैड़ी कधे वापस एज्जी न सकेले।"

28 कुन, ऐह मड़द कोन्याह घटिया ते ट्लुटोरू भांडे? कुन एन निकम्मू भांडे? फिरी तै खानदाने समेत अनज़ाने मुल्खे मां किजो केढतां शारो गालो? 29 हे धरती, धरती, हे धरती, यहोवारू वचन शुन! 30 यहोवा एन ज़ोते, "इस मैन्हु बेऔलाद लिख, एसेरे ज़िन्दगरे दिहाड़े सुखे सेइं न बीतेले; ते न तैसेरे खानदाने मरां कोई कामयाब भोइतां दाऊदेरे तखते पुड़ बिशेलो या यहूदा प्रदेशेरे लोकन पुड़ राज़ केरनेबालो भोल्हो।"