1 यहोवा मीं सेइं इन ज़ोवं, 2 "एस मुल्खे मां ड्लाह बनेइतां मट्ठां-कुइयां पैदा न केर। 3 किजोकि ज़ैना मट्ठां-कुइयां एस ठैरी मां पैदा भोन ते ज़ैना अम्मा तैन्न ज़ान ते ज़ैना बाजी तैन एस मुल्खे मां पैदा केरन, 4 तैन केरे बारे मां यहोवा एन ज़ोते, तैना बुरी-बुरी बिमैरी सेइं मरेले। तैन केरे लेई कोई छाती न कुटेलो, ते न तैन्न कोई दबेले; तैना ज़मीनी पुड़ खादरे ज़ेरे पेवरे राले। तैना तलवारी ते काले सेइं मारेले, ते तैन केरि लाशां अम्बरे च़ुड़ोलू केरि ते मैइदानेरे जानबर केरि खूराक भोल्ही।

5 "यहोवा इन भी ज़ोवं: ज़ैस घरे मां लेरां देनी भोन तैस मां न गेइयां, ते न छाती पिटनेरे लेई कोन्च गेइयां ते न इन लोकां केरे लेई मातम केरां; किजोकि यहोवा एन ज़ोते कि मीं अपनि शान्ति ते दया ते महरबानी एन लोकन पुड़ां सलहोरीए। 6 एल्हेरेलेइ एस मुल्खेरे निक्‍के-बड्डे सब मरेले, तैना न दब्बे गाले, ते न लोक छाती पिटेले, न अपनि जान छ़िंदेले ते टिन्ड बनाले। इन केरे लेई मातम केरनेबालन कोई रोट्टी न बंटेलो ते दुखे मां तैन्न तसल्‍ली दे; 7 ते न लोक अम्मा-बाजी केरे मरने पुड़ कोन्ची तसल्‍ली देनेरे लेई कुटोरे मां दाछ़रो रस पियाले। 8 तू धांमरे घरे मां तैन सेइं साथी खाने-पीनेरे लेई न गेइयां। 9 किजोकि सेना केरो यहोवा, इस्राएलेरो परमेशर एन ज़ोते: हेर, तुश्शे हेरने ते तुश्शे ही दिहाड़न मां अवं एरू केरेलो कि एस मुल्खे मां न त खुशी ते न आनन्देरी आवाज़ शुनोली, न मारहवेरी ते न मारहैनरी आवाज़।✝

10 "ज़ैखन तू एन लोकन सेइं इना सब गल्‍लां ज़ोस, ते तैना तीं पुछ़न कि ‘यहोवा असन पुड़ ई सारी मुसीबत छ़डनेरे लेई किजो ज़ोवरूए? इश्शो अधर्म कुने ते असेईं अपने परमेशर यहोवारे खलाफ को ज़ेरो पाप कियोरोए?’ 11 त तू एन लोकन सेइं ज़ोइयां, ‘यहोवा एन ज़ोते, किजोकि तुश्शे दादे-पड़दादेईं अवं शारो ते होरि देबतां केरि पूज़ा केरने लगे, ते तैन केरि आराधना केरतां तैन कां मथ्थो टेको, ते मीं करां दूर भोए ते मेरो कानून न मन्नो, 12 ते ज़ेत्री बुराई तुश्शे दादे-पड़दादेईं कियोरी थी, तैस करां भी जादे तुस केरतथ, किजोकि तुस अपने बुरे मनेरी ज़िद्दी पुड़ च़लतथ ते मेरी न शुनथ; 13 एल्हेरेलेइ अवं तुसन इस मुल्खे मरां केढतां एरे मुल्खे मांजो शैरेलो, ज़ैस न त तुस ज़ानथ ते न तुश्शे दादे-पड़दादे ज़ानते थिये; ते तैड़ी तुस रात-दिहैड़ी होरि देबतां केरि पूज़ा केरते राले, ते तैड़ी अवं तुस पुड़ दया न केरेलो।’"

14 फिरी यहोवा मीं सेइं एन ज़ोवं, "हेर, एरे दिहाड़े एजने बाले आन ज़ैन मां फिरी एन न ज़ोवं गालू, ‘यहोवा ज़ैनी इस्राएली लोक मिस्र मुल्खे मरां छुटेइतां आने तैसेरी कसम,’ 15 बल्के एन ज़ोवं गालू, ‘यहोवा ज़ै इस्राएली लोकन उत्तर मुल्खे मरां ते तैन सेभी मुल्खन मरां ज़ैड़ी तैनी तैना गुलाम बनेवरे थिये छुटेइतां आने, तैसेरी कसम।’ किजोकि अवं तैन्न तैन केरे अपने मुल्खे मां वापस आनेलो, ज़ै मीं तैन केरे दादे-पड़दादन दित्तोरो थियो।

16 "हेरा, यहोवा इन ज़ोते कि अवं बड़े मेछ़ली ट्लानेबालन कुजालो कि तैना एन लोकन ट्लान, ते फिरी अवं शिकैरन कुजालो कि तैना तैन्न शिकार केरतां सब पहाड़न ते पहैड़न पुड़ां ते चट्टानां केरि दरज़न मरां कढन। 17 किजोकि तैन केरो पूरो चाल चलन मेरे सामने बांदोए; तै मेरी नज़री करां छ़पोरो नईं, ते न तैन केरे अधर्म मेरी एछ़्छ़न करां छ़पोरेन। एल्हेरेलेइ अवं तैन केरे अधर्म ते पापेरी दुगनी सज़ाह देइलो, 18 किजोकि तैनेईं मेरो मुल्ख अपने भिट्टे चीज़ां केरे लाशन सेइं अशुद्ध कियो, ते मेरो अपनो हिस्सो एपनी अशुद्धता सेइं भेरि छ़डो।"

19 हे यहोवा, मेरी ताकत ते मज़बूत गढ़, मुसीबतरे वक्ते मेरे छ़पनेरी ठार, कौमां-कौमां केरे लोक धेरतरे च़ेवरे पासना तीं कां एइतां ज़ोले, "सच़्च़े इश्शे दादे-पड़दादे झूठे देबते ते फुज़ूल मूरती केरि पूज़ा केरते एवरेन।✝ 20 कुन मैन्हु देबते बनाए? नईं, तैना ईश्वर न भोइ सकन!"

21 यहोवा ज़ोते, "एल्हेरेलेइ, एक्‍की बार, अवं एन लोकन अपनि ताकत ते शक्ति हरेइलो, ते तैना ज़ानेले कि मेरू नवं यहोवा आहे।"