यिर्मयाह 40

यिर्मयाह यहूदा प्रदेशे मां रहते

1 ज़ैखन अंगरक्षकां केरे प्रधान नबूजरदाने अवं रामाह नगरे मां तैन सब यरूशलेम ते यहूदारे कैदन मां हथकेड़ीन सेइं बन्धोरो मैल्हो ज़ैना बाबेल जो गानेबाले थिये छुटाव, तैसेरे पत्ती यहोवा तैस सेइं ज़ोवं। 2 अंगरक्षकां केरे प्रधान नबूजरदाने यिर्मयाह तैस वक्त एप्पु कां कुजव, ते ज़ोवं, "एस ठैरी*40:2 एस ठैरी यहूदा ते यरूशलेमे पुड़। पुड़ ज़ै आफत पेवरीए तैसेरे बारे मां तेरे परमेशर यहोवा ज़ोवरू थियूं। 3 ज़ेन्च़रे यहोवा ज़ोवरू थियूं तेन्च़रे तैनी पूरू भी कियूं। तुसेईं लोकेईं ज़ै यहोवारे खलाफ पाप कियो ते तैसेरे हुक्म न मन्ने, एल्हेरेलेइ तुश्शी ऐह हालत भोवरीए। 4 हुनी अवं एना हथकेड़ी कटेलो, ते अगर मीं सेइं साथी बाबेले मां गानू तीं रोड़ू लगे त च़ल, तैड़ी अवं तीं पुड़ सिद्धी नज़र रखेलो; ते अगर मीं साथी बाबेल गानू तीं रोड़ू न लग्गे, त इड़ी रा। हेर, सारो मुल्खे तेरे सामने, ज़ेरां गानू तीं रोड़ू ते ठीक लग्गे तरहां च़लो गा।" 5 अवं हेजू तैड़ी थियो कि नबूजरदाने फिरी तैस सेइं ज़ोवं, "गदल्याह ज़ैन अहीकामेरू मट्ठू ते शापानेरू पोट्लड़ूए, ज़ै बाबेलेरे राज़े यहूदारे नगरन पुड़ अधिकारी ठहरावरोए, तैस कां वापस गा ते तैस सेइं साथी लोकन मां रा, या ज़ैड़ी कोन्ची तीं गानू ठीक लग्गे तैट्ठी च़लो गा।" एल्हेरेलेइ अंगरक्षकां केरे प्रधाने मीं खाने पीनेरी चीज़ां दित्ती ते किछ तोफे भी देइतां भेज़ो। 6 तैखन अवं अहीकामेरे मट्ठे गदल्याहे कां मिस्पा नगरे जो जेव, ते तैड़ी तैट्ठेरे लोकन सेइं साथी राने लगो।

गदल्याह अधिकारी ठहराव गानो

7 सेनारे ज़ैना सिपाही ड्लाव्वन मां रहते थिये, ज़ैखन तैन केरे प्रधानेईं अपने सेना समेत शुनू कि बाबेलेरे राज़े अहीकामेरू मट्ठू गदल्याह मुल्खेरू अधिकारी ठहरावरूए, ते मुल्खेरे ज़ैना गरीब लोक तैनी बाबेले न ने, सब मड़द, कौन्श ते बाल-बच्‍चे, तैना सब तैनी तैस सौंफोरेन, 8 तैखन नतन्याहेरू मट्ठू इश्माएल, कारेहेरां मट्ठां योहानान, योनातान ते तन्हूमेततेरू मट्ठू सरायाह, एपै नतोपारे राने बालेरू मट्ठू ते कोन्ची माकारे राने बालेरू मट्ठू याजन्याह अपने लोकन समेत गदल्याहेरे मिस्पा मांए। 9 गदल्याह ज़ैन अहीकामेरू मट्ठू ते शापानेरू पोट्लड़ू थियूं, तैनी तैन सेइं ते तैन केरे लोकन सेइं कसम खेइतां ज़ोवं, "कसदी केरे अधीन राने करां न डरा। इस मुल्खे मां रेइतां बाबेलेरे राज़ेरे अधीन राथ तैखन तुश्शू भलू भोल्हु। 10 अवं त एल्हेरेलेइ मिस्पा मां रहताईं कि ज़ैना कसदी लोक इश्शे इड़ी एज्जन, तैन केरे सामने हाज़र भोईं; पन तुस दाछ़रो रस ते रितरो फल ते तेल अकोट्ठो केरतां अपने भांडन मां रखा ते तैन नगरन मां राथ ज़ैन पुड़ तुसेईं कब्ज़ो कियोरोए।" 11 फिरी ज़ैखन मोआबी, अम्मोनी, एदोमी ते बाकी सेभी कौमां केरे दरमियान रानेबाले सब यहूदी लोकेईं शुनू कि बाबेलेरे राज़े यहूदी लोकन मरां किछ लोक बच़ाए ते तैन पुड़ गदल्याह ज़ैन अहीकामेरू मट्ठू ते शापानेरू पोट्लड़ूए अधिकारी ठहरावं, 12 तैखन सब यहूदी ज़ैन-ज़ैन ठारन मां तितर-बितर भोइ जेवरे थिये, तैट्ठां वापस गेइतां यहूदा प्रदेशेरे मिस्पा नगरे मां गदल्याहे कां आए, ते बड़ो दाछ़रो रस ते रितरे फल अकोट्ठे केरने लगे।

13 तैखन कारेहेरू मट्ठू योहानान ते मैइदाने मां रानेबाले सिपाही केरि सब टोली केरे प्रधान मिस्पा मां गदल्याहे कां एइतां ज़ोने लगे, 14 "कुन नईं पतो कि अम्मोनी केरे राज़े बालीसे नतन्याहेरू मट्ठू इश्माएल तीं जाना मारनेरे लेई भेज़ोरूए?" पन अहीकामेरे मट्ठे गदल्याहे तैन पुड़ विश्वास न कियो। 15 फिरी कारेहेरे मट्ठे योहानाने गदल्याहे सेइं मिस्पा मां छ़ेपतां ज़ोवं, "मीं गेइतां नतन्याहेरे मट्ठे इश्माएले मारने दे ते कोन्ची इस गल्‍लरे बारे मां पतो न लग्गेलो। तै तीं किजो मारे, ते ज़ेत्रे यहूदी लोक तीं कां अकोट्ठे भेवरेन तैना किजो तितर-बितर भोन ते बच़ोरे यहूदी किजो नाश भोन?" 16 अहीकामेरे मट्ठे गदल्याहे कारेहेरे मट्ठे योहानाने सेइं ज़ोवं, "एरू कम न केर, तू इश्माएलेरे बारे मां झूठ ज़ोतस।"