यिर्मयाह 50

बाबेलेरे खलाफ नबूवत

1 बाबेल नगर ते कसदी केरे मुल्खेरे बारे मां यहोवा मीं सेइं ज़ोवं: 2 "कौमन मां ज़ोथ, शुनाथ ते झण्डो खड़ो केरा; शुनाथ, न छ़ुपाथ कि बाबेल नगरे पुड़ कब्ज़ो कियो जेव, बेल देबतेरू तुत्तर कालू भोवं, मरोदक देबतो हैरान भोइ जेव। बाबेलेरी मूरती शरमिन्दा भोइ ते तैसेरी बेडौल मूरती ट्लोड़ी जेई। 3 किजोकि उत्तरेरे पासेरां अक कौम तैस पुड़ चढ़ाई केरतां तैसेरे मुल्खे इड़ी तगर उज़ाड़ेली, कि कुन मैन्हु, कुन जानबर, तैस मां कोई भी न रालो; सब नेश्शी गाले।

4 "यहोवा एन ज़ोते, कि तैन दिहाड़न मां इस्राएल ते यहूदारे लोक साथी एज्जेले, तैना लेरां देंते अपने परमेशर यहोवा तोप्पने लेई च़ले एज्जेले। 5 तैना सिय्योनेरे पासे तुत्तर केरतां तैसेरी बत्तां पुछ़ते ते एप्पु मांमेइं एन ज़ोते एज्जेले, ‘एज्जा अस यहोवा सेइं मेल केरम, तैस सेइं एरहो करार केरम ज़ै कधे बिसरो न गाए, पन हमेशा कायम राए।’

6 "मेरे लोक हेरोरि भैड्डां केरे ज़ेरेन; तैन केरे पुहालेईं तैना टपलाए ते पहाड़न पुड़ भटकाए; तैना पहाड़े-पहाड़े ते पहैड़ी-पहैड़ी पुड़ हंठते-हंठते अपने बिशनेरी ठार बिसरी जेवरेन।✝50:6 मत. 10:6. 7 ज़ैन्न तैना मैल्ही तैनेईं तैना खेइ; ते तैन केरे सतानेबालेईं ज़ोवं, ‘एसमां इश्शो किछ कसूर नईं, किजोकि तैनेईं यहोवारे खलाफ पाप कियोरोए ज़ै तैन केरे धार्मिकतातो आधारे, ते तैन केरे दादे-पड़दादां केरि उमीद थियो।’

8 "बाबेले मरां नश्शा, कसदी केरे मुल्खे मरां च़ले एज्जा। ज़ेन्च़रे थाव्वे अपने केन्नी मां प्रधान भोतन, तेन्च़रे बना। 9 किजोकि हेरा, अवं उत्तरेरे मुल्खे मरां बेड़ी कौमां उभैरतां तैन केरि मेण्डली बाबेले पुड़ आनेलो, ते तैना तैसेरे खलाफ जंग केरनेरे लेई तियार भोल्हे; ते तैस्से पासेरां तैस पुड़ कब्ज़ो कियो गालो। तैन केरे तीर माहिर सिपेही केरे ज़ेरे भोल्हे; तैन केरो हर निशानो लग्गेलो। 10 कसदी लोकां केरो मुल्ख एरहो लुट्टो गालो कि सब लुटने बालां केरू पेट भेरतां भोइ गालू, यहोवा एन ज़ोते।

11 "हे मेरे हिस्से*50:11 मेरे हिस्से मतलब मेरे लोक लुटने बालव, तुस ज़ैना मेरे लोकन पुड़ खुशी भोतथ ते बड़ू घमण्ड केरथ, ते घास च़रने बाली बेछ़रे ज़ेरे ते ताकतबर घोड़ां केरे ज़ेरे खिनकनथ, 12 तुश्शी अम्मा बड़ी शरमिन्दा भोल्ही ते तुश्शी अम्मरू तुत्तर कालू भोइ गालू। किजोकि तै सेभी कौमन मां नीच़ भोल्ही, तै सुनसान जगाह ते खुशक मुल्ख भोइ गाली। 13 यहोवारे क्रोधेरे वजाई सेइं, तै मुल्खे गैर आबाद रालो, तै बेरान भोइ गालो; ज़ैन कोई बाबेले मांमेइं च़लेलो तै हैरान भोल्हो, ते तैसेरे सब दुख हेरतां च़ैड़ी देलो। 14 हे सब तीर च़लाने बालव, बाबेलेरे च़ेवरे पासन तैसेरे खलाफ हमलो केरनेरे लेई तियारी केरा; तैस पुड़ तीर च़लाथ, तैन न रखा, किजोकि तैनी यहोवारे खलाफ पाप कियोरोए। 15 च़ेवरे पासना तैस पुड़ ललकारा, तैनी हार मन्नी; तैसेरी बुनियादां बिछ़ोड़ी जेई, तैसेरी शहरपनाह बिछ़ड़ी जेई। किजोकि यहोवा तैस करां अपनो बदलो नेने पुड़े; एल्हेरेलेइ तुस भी तैस करां अपनो-अपनो बदलो नेथ, ज़ेन्च़रे तैनी कियूं, तेन्च़रे तुस भी तैस सेइं केरा।✝50:15 प्रका. 18:6. 16 बाबेले मरां बेनेबाले ते कटनेबाले दूईये नाश केरा, तैना दुख देनेबाली तलवारारे डरेरे मारे अपने-अपने लोकां केरे पासे फिरन, ते अपने-अपने मुल्खे जो नेश्शी गान।

इस्राएली लोकां केरि वापसी

17 "इस्राएल भैड्डरो ज़ेरोए, ज़ै शेरेईं निशानोरीए। पेइले त अश्शूरेरे राज़े तै खाई, ते फिरी बाबेलेरे राज़े नबूकदनेस्सरे तैसेरी हेड्डी ट्लोड़ी। 18 एल्हेरेलेइ इस्राएलेरो परमेशर, सेना केरो यहोवा एन ज़ोते, हेरा, ज़ेन्च़रे मीं अश्शूरेरे राज़े सज़ाह दित्तोरी थी, तेन्च़रे हुनी मुल्खे समेत बाबेलेरे राज़े सज़ाह देइलो। 19 अवं इस्राएले तैसेरे चरागाई मां वापस आनेलो, ते तै कर्मेल पहाड़ ते बाशान प्रादेशे मां फिरी च़ारेलो, ते एप्रैमेरे पहाड़न पुड़ ते गिलाद प्रादेशे मां फिरी पेट भेरतां खालो। 20 यहोवा एन ज़ोते, कि तैन दिहाड़न मां इस्राएलेरो अधर्म तोप्पने पुड़ भी न मैल्हेलो, ते यहूदारे पापी तोप्पने पुड़ भी न मैल्हेले; किजोकि ज़ैन अवं बच़ेइ, तैन केरे पाप भी माफ़ केरेलो।"

परमेशर बाबेलेरो न्याय केरते

21 यहोवा ज़ोते, "तू मरातैम मुल्खे ते पकोद नगरेरे लोकन पुड़ चढ़ाई केर। मैन्हु त मार, ते धनेरो सत्यानाश केर; यहोवा एन ज़ोते, ते ज़ै-ज़ै हुक्म अवं तीं देताईं, तैन सेभी केरे मुताबिक केर। 22 शुना, तैस मुल्खे मां जंग ते सत्यानाशेरो ज़ेरो शब्द भोइ राहोरोए। 23 ज़ै हथोड़ो सारे दुनियारे लोकन चूर-चूर केरतो थियो, तै केन्च़रे कट्टो जेव! बाबेल सेभी कौमां केरे दरमियान बेरान भोइ जेवरोए! 24 हे बाबेल, मीं तेरे लेई फंदो लाव, ते तू अनज़ाने मां तैस मां फेसी भी जेव; तू तोपतां ट्लाव जेव, किजोकि तू यहोवारे खलाफ बगावत केरतो थियो। 25 प्रभु सेना केरे यहोवा अपने हथियारां केरू घर खोलतां, अपनि सरक बांदी केरनेरू सामान कढोरूए; किजोकि सेना केरे प्रभु यहोवा कसदी केरे मुल्खे मां अक कम केरनूए।✝50:25 यशा. 13:5. 26 धेरतरे कूने-कूने मरां एज्जा, ते तैसेरी कोठारन खोल्‍ला; तैस ढेर ही ढेर बना बनाथ; एरहो सत्यानाश केरा कि तैस मां किछ भी न बच़े। 27 तैसेरे सब दांत नाश केरा, तैना कत्ल भोनेरे ठैरी मां उतरी गान। तैन पुड़ अफ़सोस! किजोकि तैन्न सज़ाह मैल्हनेरी दिहाड़ी एवरीए।"

बाबेलेरी बेइज़ती

28 "शुना, बाबेल मुल्खे मरां नशने बालां केरि ज़ेरि आवाज़ शुनोतीए ज़ैना सिय्योने मां ऐह खबर देनेरे लेई दौड़ते एइतन, कि इश्शो परमेशर यहोवा अपने भवनेरो बदलो घिन्ने लगोरोए।

29 "सब तीर च़लानेबालन बाबेलेरे खलाफ अकोट्ठे केरा, तैसेरे च़ेवरे पासन घेरो देथ, कोई मैन्हु नेशतां निस्सी न बटे। तैसेरे कम्मां केरो बदलो तैस देथ, ज़ेन्च़रे तैनी कियूं तेन्च़रे तैस सेइं केरा; किजोकि तैनी यहोवा इस्राएलेरे पवित्रेरे खलाफ घमण्ड कियोरूए।✝50:29 प्रका. 18:6. 30 एल्हेरेलेइ तैसेरे जुवान चौकन मां बिछ़ोड़े गाले, ते सब बहादर सिपाही केरि आवाज़ बन्द भोइ गाली, यहोवा एन ज़ोते।

31 "प्रभु सेना केरो यहोवा एन भी ज़ोते, हे घमण्डी, अवं तेरे खलाफ आईं; तीं सज़ाह मैल्हनेरी दिहाड़ी एवरीए। 32 घमण्डी ठोकर खेइतां बिछ़ड़ेलो ते कोई तैस फिरी खड़ो न केरेलो; ते अवं तैसेरे नगरन मां अग लेइलो ज़ैस सेइं तैसेरे च़ेवरे पासन सब किछ भस्म भोइ गालू।

बाबेलेरी तुबाही

33 "सेना केरो यहोवा एन ज़ोते, इस्राएल ते यहूदा दूईने पुड़ ज़ुलम भोवरोए; ते ज़ेत्रेइं तैना गुलाम बनाए तैना तैन्न ट्लेइतां रखेले। 34 तैन केरो छुटानेबालो शक्तिशाली आहे; सेना केरो यहोवा, एन्ने तैसेरू नंव्वे। तै तैन केरो मुकदमो रोड़ेच़ारे लड़ेलो कि धेरती चैन दे पन बाबेलेरे लोकन परेशान केरे।✝50:34 प्रका. 18:8.

35 "यहोवा एन ज़ोते, कसदी ते बाबेलेरे हाकिम, सेभी ज्ञानी ते रानेबालन पुड़ तलवार च़लेली! 36 झूठे नेबन पुड़ तलवार च़लेली, ते तैना बेवकूफ बनेले! तैसेरे बहादरन पुड़ भी तलवार च़लेली, ते तैना हैरान भोइ गाले! 37 तैसेरे सुवारन ते रथ च़लानेबालन पुड़ ते सब मिले जुलोरे लोकन पुड़ भी तलवार च़लेली, ते तैना कौन्शां केरे ज़ेरे कमज़ोर बेनि गाले! तैसेरे भण्डारन पुड़ तलवार च़लेली, ते तैना लुटोई गाले! 38 तैसेरे पैनेरी नहरां खुश भोइ गैली, ते तैना शुक्‍की गैली! किजोकि तै घड़ाई कियोरी मूरतन सेइं भरोरे मुल्ख आन, ते तै अपनि भयानक मूरतन पुड़ बाबरेन।✝50:38 प्रका. 16:12.

39 "एल्हेरेलेइ खुशक मुल्खेरे जानबर गिद्दन सेइं साथी मिलतां तैड़ी बस्सेले, ते शुतुर्मुर्ग तैस मां राले, ते तै फिरी हमेशा तगर बसाव न गालो, न जुग-जुग तैस मां कोई रेई सकेलो।✝50:39 प्रका. 18:2. 40 यहोवा एन ज़ोते, कि सदोम ते गमोरा ते तैन केरे आसे-पासेरे नगरां केरि ज़ेरि हालत तैस मौके भोवरी थी ज़ैखन परमेशरे तैना उलटावरे थिये, तेरही हालत बाबलेरी भी भोल्ही, इड़ी तगर कि कोई मैन्हु तैस मां न रेई सकेलो, ते न कोई मैन्हु तैस मां टिकेलो।

41 "शुना, उत्तरेरे पासेरां एक्‍की मुल्खेरे लोक एइतन, ते धेरतरे कूने-कूने करां अक बड़ी कौम ते बड़े राज़े उठतां चढ़ाई केरेले। 42 तैना धनुष ते भालो ट्लेइतां आन; तैना ज़ालम ते दया न केरनेबाले आन; तैना समुन्दरेरे ज़ेरे गरज़ेले; ते घोड़न पुड़ च़ेढ़तां तीं बाबेलेरी कुइअरे खलाफ जंग लड़नेरे लेई तियार भोवरे केरे ज़ेरे एज्जेले। 43 तैन केरि खबर शुनते बाबेलेरे राज़ेरे हथ पव ढिल्‍ले पेई जे, ते तैस गल्हे बिशने बैली कौन्शरी ज़ेरि तकलीफां उठी।

44 "शुना, तै शेरेरो ज़ेरो एज्जेलो ज़ै यरदनेरे आसे-पासेरे घने जंगल सेइं निस्तां मज़बूत बाड़न पुड़ च़ढ़े, पन अवं तैन तैसेरे सामनेरां लूशी कढेलो; तैखन ज़ैस अवं च़ुनी, तैस्से तैन पुड़ अधिकारी ठहरेइलो। हेरा, मेरे बराबर कौने? कौन मीं पुड़ मुकदमो च़लालो? तै पुहाल कोड़िए ज़ै मेरो मुकाबलो केरि सकेलो?" 45 एल्हेरेलेइ शुना कि यहोवा बाबेलेरे खलाफ कुन योजना कियोरीए ते कसदी केरो मुल्खेरे खलाफ कौ ज़ेरि कल्पना कियोरीए: सच़्च़े तै भैड्डां-छ़ेल्‍ली केरे बच्‍चन दीलतां नेलो, सच़्च़े तै तैन केरि भैड्डां-छ़ेल्‍लन करां खाली केरेलो। 46 बाबेलेरे लुट्टे गानेरे शब्दे सेइं धरती हिलोरीए, ते तैसेरी चिन्डां केरि शौर कौमन मां शुनोतीए।