यिर्मयाह 51

बाबेले सज़ाह

1 यहोवा एन ज़ोते, अवं बाबेलेरे ते लेबकामैरे लोकां केरे खलाफ अक नाश केरनेबालो बात च़लेइलो; 2 ते अवं बाबेले कां एरे लोकन भेज़ेलो ज़ैना तैस ट्लेट्टी-ट्लेट्टी उडारेले, ते एस तरीके सेइं तैसेरे मुल्खे बेरान केरेले; ते मुसीबतरे दिहाड़े च़ेवरे पासना तैसेरे खलाफ भोल्हे। 3 तीर च़लाने बाला केरे खलाफ ते ज़ैनेईं अपनि झिलम लेवरीए तीर च़लानेबाले धनुष ट्लेइतां खड़े भोए; तैसेरे जुवानन सेइं किछ नरमी न केरा; तैसेरी सारी सेनारो सत्यानाश केरा। 4 कसदी केरे मुल्खे मां मरोरे ते तैसेरी सड़कन मां ज़खमी बिछ़ड़ेले। 5 किजोकि अगर इस्राएल ते यहूदारे मुल्खे, इस्राएलेरे पवित्र परमेशरेरे खलाफ कियोरे पापन सेइं भरपूर भोइ जेवरेन, फिरी भी तैन केरे परमेशर, सेना केरे यहोवा तैना न शारे।

6 "बाबेले मरां नश्शा, अपनि-अपनि जान बच़ाथ! तैसेरे अधर्मे मां शामल भोइतां तुस भी न मिटी गाथ; किजोकि ई यहोवारो बदलो नेनेरो वक्ते, तै तैस बदलो देने पुड़े।✝51:6 प्रका. 18:4. 7 बाबेल यहोवारे हथ्थे मां सोन्नेरो कुटोरो थियो, ज़ैस सेइं सारे दुनियारे लोक मसत भोते थिये; कौमां-कौमां केरे लोकेईं तैसेरे दाछ़रे रस्से मरां पियूं, एल्हेरेलेइ तैना भी बाबरे भोइ जे।✝51:7 प्रका. 14:8;17:2-4;18:3. 8 बाबेल अचानक नी जेई ते नाश कीजेई। तैसेरे लेई हाय-हाय केरा! तैसेरे ज़खमां केरे लेई बलसान दूवाई आनां; भोइ सकते तै बेझ़ोई गाए।✝51:8 प्रका. 14:8;18:2. 9 असां बाबेलेरो आलाज़ केरते त थिये, पन तै बेझ़ोई न। एल्हेरेलेइ एज्जा, असां तैस शैरतां अपने-अपने मुल्खे जो च़ले गाम; किजोकि तैस पुड़ कियोरो न्यायेरो फैसलो अम्बर बल्के सुर्गे तगर भी पुज़्ज़ी जेवरोए। 10 यहोवा इश्शे धार्मिकतारां कम्मां बांदां कियोरन; एल्हेरेलेइ एज्जा, असां सिय्योने मां अपने परमेशर यहोवारे कम्मां केरू बियान केरम।

11 "तीरन तेज़ केरा! ढालन ठेमतां रखा! किजोकि यहोवा मादी राज़ां केरो मन उभारोरोए, तैनी बाबेल खतम केरनेरी योजना कियोरीए, किजोकि यहोवा मतलब तैसेरे भवनेरो ईए बदलोए। 12 बाबेलेरे शहरपनाहरे खलाफ झण्डो खड़ो केरा; बड़े पहरदार बिशाला; हमलो केरनेबालन बिशाला; किजोकि यहोवा बाबेलेरे लोकां केरे खलाफ ज़ैन किछ ज़ोवरू थियूं, तैन हुनी केरने पुड़े बल्के कियोरू भी आहे। 13 हे बड़े नहरां केरे मझ़ाटे बस्सोरी ते बड़े भण्डार रखने बाली, तेरो अन्त एज्जी अव, तेरे लालच़ेरी हद पुज़ोरीए। 14 सेना केरे यहोवा अपनि कसम खेवरीए, कि सच़्च़े अवं तीं टिट्टां केरे ज़ेरे बेशुमार मैन्हेइं सेइं भेरि देलो, ते तैना तेरे खलाफ ललकारेले।

यहोवारे तारीफ़रू भजन

15 "तैने धरती अपने ताकती सेइं बनाई, ते संसार अपने अक्ली सेइं कायम कियूं; ते अम्बर अपने समझ़ी सेइं फैलाव। 16 ज़ैखन तै ज़ोते तैखन अम्बरे मां बड़े पैनेरी ज़ेरि आवाज़ भोचे, तै झ़ेड़रे लेई बिजली बनाते। ते अपने भण्डारे मरां हवा केढतां आनते। 17 सब मैन्हु जानबरेरे ज़ेरे ज्ञाने बगैर आन; सब सुनारन अपनि बनेवरी मूरती केरे वजाई सेइं शरमिन्दा भोनू पेलू; किजोकि तैन केरि बनेवरी मूरती धोखो देने बैली आन, ते तैना शाह भी न बापरन। 18 तैना मूरती त फुज़ूल ते मज़ाकेरे काबल आन; ज़ैखन तैन केरो नाश भोनेरो वक्त एज्जेलो, तैखन तैना नाश ही भोइ गैली। 19 पन ज़ै याकूबेरो अपनो हिस्सोए, तै तैन केरो ज़ेरो नईं, ते इस्राएल तैसेरो अपनो हिस्सोए; तैसेरू नवं सेना केरो यहोवाए।"

परमेशरेरो हथोड़ो

20 यहोवा ज़ोते, "तू मेरो हथोड़ो ते जंगरे लेई हथियार ठहराव जेवरो आस; तेरे ज़िरिये अवं कौमां-कौमां केरे लोकन तितर-बितर केरेलो; ते तेरे ज़िरिये सेइं रियासतन नाश केरेलो। 21 तेरे ज़िरिये अवं सुवारन समेत घोड़ां केरे टुक्ड़े-टुक्ड़े केरेलो; 22 तेरे ज़िरिये रथ च़लानेबालन समेत रथ्थन भी टुक्ड़े-टुक्ड़े केरेलो; तेरे ज़िरिये अवं कौन्श मड़द दूईयन टुक्ड़े-टुक्ड़े केरेलो; तेरे ज़िरिये अवं बुढे ते मट्ठां दूईयां केरे टुक्ड़े-टुक्ड़े केरेलो, ते जुवान मड़द ते जुवान कौन्श दूईयन अवं टुक्ड़े-टुक्ड़े केरेलो; 23 तेरे ज़िरिये अवं भैड्डां-छ़ेल्‍लन समेत पुहालन टुक्ड़े-टुक्ड़े केरेलो; तेरे ज़िरिये अवं ज़मीनदार ते तैसेरे ज़ोड़ी दांत भी टुक्ड़े-टुक्ड़े केरेलो; अधिकारी ते हाकिमन भी तेरे ज़िरिये अवं टुक्ड़े-टुक्ड़े केरेलो।"

बाबेल बेरान

24 यहोवा ज़ोते, "अवं बाबेल ते सारे कसदी भी तैन सब बुरैई केरो बदलो देइलो, ज़ै तैनेईं तुश्शे सामने सिय्योने मां कियोरिन; यहोवारी एन ज़ोते।

25 "हे नाश केरनेबाले पहाड़ ज़ेसेरे ज़िरिये सारी धरती नाश भोवरीए, यहोवा एन ज़ोते, कि अवं तेरे खलाफ आईं ते हथ खड़ो केरतां छ़ुंड्डे पुड़ां टंगेलो ते फुकोरू पहाड़ बनेइलो।✝51:25 प्रका. 8:8. 26 लोक तीं करां न त घरेरे कूनेरे लेई घोड़ नेले, ते न मुनीयादरे लेई, किजोकि तू हमेशा बेरान रालो, यहोवा एन ज़ोते।

27 "मुल्खे मां जंगरे लेई झण्डो खड़ो केरा, कौमन-कौमन मां नरशिंगो बज़ाथ; तैसेरे खलाफ कौमां-कौमां तियार केरा; अरारात, मिन्नी ते अश्कनज नंव्वेरे रियासतन तैसेरे खलाफ कुजाथ, तैसेरे खलाफ सेनापति भी ठहराथ; घोड़न च़ोटी पुड़ेरे टिट्टां केरे ज़ेरे बेशुमार आनां। 28 तैसेरे खलाफ कौमन तियार केरा; मादी राज़न तैन केरे अधिकारी सब हाकिमन सेइं ते तैस रियासतरे सारे मुल्खे तियार केरा। 29 यहोवा सोचोरूए कि तै बाबेलेरे मुल्खे एरहो बेरान केरेलो कि तैस मां कोई भी न राए; एल्हेरेलेइ धरती थरकतीए ते दुखी भोतीए, 30 बाबेलेरे बहादर सूरमा क़िलन मां रेइतां लड़ने करां इन्कार केरतन, तैन केरि बहादरी च़ली गाली; ते एन हेरतां तैन केरि रानेरी ठारन मां अग लेग्गी जेई तैना कौन्शां केरे ज़ेरे कमज़ोर बेनि जे; तैसेरे फाटकां केरे खुन्डे ट्लोड़े जे। 31 अक सन्देश देनेबालो होरि सन्देश देनेबाले सेइं ते अक खबर देनेबालो होरि खबर देनेबाले सेइं मिलने ते बाबेलेरे राज़े ऐह खबर देनेरे लेई दौड़ेलो कि तेरू नगर च़ेवरे पासन निव गालू; 32 ते घाट दुश्मना केरे कब्ज़े मां भोइ जेवरेन, तालाब भी शुक्‍की जे, ते बहादर सिपाही घेमरोई जे। 33 किजोकि इस्राएलेरो परमेशर, सेना केरो यहोवा एन ज़ोते: बाबेलेरी कुई फसल मडनेरे खलाड़री ज़ेरिए, थोड़े दिहाड़न मां तैसेरो कटनेरो वक्त एज्जेलो।"

34 "बाबेलेरे राज़े नबूकदनेस्सरे अवं खेइ छ़डो, अवं पीहतां छ़डो; तैनी अवं खाली भांडां केरो ज़ेरो कियो, तैनी मगरमच्छेरो ज़ेरो निगली छ़डो; ते अवं मज़ेदार रोट्टी बुझ़तां अपनु पेट मीं सेइं भरू, तैनी अवं ज़बरदस्ती कढो।" 35 सिय्योनेरे रानेबाली ज़ोली, "ज़ै ज़ुलम मीं पुड़ ते मेरे जिसमे पुड़ भोवरोए, तै बाबेल पुड़ उलटोए।" ते यरूशलेम ज़ोली, "मीं मां कियोरो कत्लेरो दोष कसदी लोकां केरे मुल्खेरे रानेबालन पुड़ लग्गे।"

परमेशर इस्राएलेरी मद्दत केरेलो

36 एल्हेरेलेइ यहोवा ज़ोते, "अवं तेरो मुकदमो लड़ेलो ते तेरो बदलो घिन्नेलो। अवं तैसेरे तालाबे ते तैसेरे नागन शुकेई देइलो; 37 ते बाबेल उज़ड़ेलो, ते तैस मां गिद्दां रालां; ते लोक तैस हेरतां हैरान भोल्हे ते च़ैड़ी देले, ते तैस मां कोई न रालो।

38 "लोक अकोट्ठे गरज़ेले ते किचकैले, ज़ेरो जुवाब शेर ते शेरेरे बच्‍चे शिकारे पुड़ केरतन। 39 पन ज़ैखन-ज़ैखन तै मसत भोन, तैखन अवं धाम तियार केरतां तैन एन्च़रे मसत केरेलो, कि तैना हमेशारे निड्ली मां पेले ते कधे न बींझ़ेले, यहोवा एन ज़ोते। 40 अवं तैन्न, गबड़ां, हुड़न ते थाव्वां केरो ज़ेरो मारेइलो।"

हारनेरे बाद बाबेलेरी हालत

41 "शेशक, ज़ेसेरी तारीफ़ सारे दुनियाई मां भोती थी केन्च़रे तैस पुड़ कब्ज़ो कियो जेव? तै केन्च़रे ट्लाव जेव? बाबेल कौमां केरे मझ़ाटे केरो बेरान भोइ जेव? 42 बाबेले पुड़ समुन्दर च़ेढ़ी जेवरोए, तै तैसेरी बेड़ि छ़ेलहन मां डुबी जेवरोए। 43 तैसेरे नगर उज़ड़ी जे, तैसेरो मुल्ख गैर आबाद ते खुशक भोइ जेवरोए, तैस मां कोई मैन्हु न राए, ते तैस मांमेइं भोइतां कोई मैन्हु न च़ले। 44 अवं बाबेले मां बेल देबते सज़ाह देइलो, ते तैनी ज़ैन किछ निगलोरूए, तै तैसेरे ऐशी मरां उतारालो। कौमां केरे लोक फिरी तैसेरे पासे पूज़ा केरनेरे लेई न एज्जेले; बाबेलेरी शहरपनाह बिछ़ोड़ी गाली। 45 हे मेरे लोकव, तैस मरां च़ले एज्जा! अपनि-अपनि जान यहोवारे भड़कोरे क्रोधे करां बच़ाथ!✝51:45 2 कुरि. 6:17. 46 ज़ैखन उडरती गल तैस मुल्खे मां शुनाई गाए, तैखन तुश्शो मन न घबराए; ते ज़ै उडरती चर्चा धेरती पुड़ शुनी गाली तुस तैस करां न डेरथ: तैसेरे एक्‍की सालेरे बाद अक होरि गल उडरती एज्जेली, तैखन तैसेरे बाद होरि साले मां अक होरि गल उडरती एज्जेली, ते तैस मुल्खे मां ज़ुलम भोल्हो, ते अक हाकिम होरेरे खलाफ भोल्हो।

47 "एल्हेरेलेइ हेर, तैना दिहाड़े एइतन ज़ैखन अवं बाबेलेरी बनेवरी मूरती पुड़ सज़ारो हुक्म देलो; तैस सारे मुल्खेरे लोकां केरू तुत्तर कालू भोइ गालू, ते तैसेरे सब मारोरे लोकां केरि लाशां तैस्से मां पेवरी रहेली। 48 तैखन सुर्ग ते धेरतरे सारे रानेबाले बाबेले पुड़ जयजयकार केरेले; किजोकि उत्तरेरे पासेरां नाश केरनेबाले तैस पुड़ चढ़ाई केरेले, यहोवा एन ज़ोते।✝51:48 प्रका. 18:20. 49 ज़ेन्च़रे बाबेले इस्राएलेरे लोक मारे, तेन्च़रे सारे मुल्खेरे लोक तैस मां मारे गाले।"

कैदी यहूदी लोकन जो परमेशरेरो सन्देश

50 "हे तलवारी करां बच़ोरे लोकव, नश्शा, खड़खड़े न राथ! यहोवा दूरेरां याद केरा, ते यरूशलेमेरो भी खियाल केरा: 51 ‘असां परेशान अहम, किजोकि असेईं अपनि बदनामी शुनोरीए; यहोवारे पवित्र भवने मां विधर्मी एवरेन, एल्हेरेलेइ असां शरमिन्दा आम।’

52 "एल्हेरेलेइ हेरा, यहोवा एन ज़ोते, एरे दिहाड़े एजने बाले आन कि अवं तैसेरी बनेवरी मूरती पुड़ सज़ाह भेज़ेलो, ते तैसेरे सारे मुल्खे मां लोक ज़खमी भोइतां चिन्डां मारते राले। 53 चाहे बाबेल एरहो उच्‍चो बेनि गाए कि अम्बरे सेइं गल्‍लां केरे ते तैसेरे उच्‍चे क़िले होरे भी मज़बूत किये गान, फिरी भी अवं तै नाश केरनेरे लेई, लोकन भेज़ेलो, यहोवा एन ज़ोते।"

बाबेलेरी तुबाही

54 "बाबेले मरां चिन्डां केरि शौर शुनाई गाचे! कसदी केरो मुल्ख सत्यानाशेरो बड़ो हंगामो शुनोते। 55 किजोकि यहोवा बाबेले नाश केरि राहोरोए ते तैसेरे बड़े शौरी बन्द केरि राहोरोए। एस सेइं तैन केरि शौर बड्डे समुन्दरेरी ज़ेरि शुनोतीए। 56 बाबेले पुड़ भी नाश केरनेबाले च़ेढ़ी आए, ते तैसेरे बहादर शूरबीर ट्लाए जेवरेन ते तैन केरे धनुष ट्लुटी जे; किजोकि यहोवा बदलो देनेबालो परमेशरे, तै ज़रूर बदलो नेलो। 57 अवं तैसेरे हाकिम, पंडत, अधिपति, अमीर, ते शूरबीरन एरहो मसत केरेलो कि तैना हमेशारी निड्ली मां पेले ते फिरी न बींझ़ेले, सेना केरो यहोवा, ज़ेसेरू नवं महाराज़ोए, तै एन ज़ोते।

58 "सेना केरो यहोवा एन भी ज़ोते, बाबेलेरी बिल्‍ली शहरपनाह मुनीयादरां बिछ़ोड़ी गाली, ते तैसेरे उच्‍चे फाटक अग लेइतां फुक्‍के गाले। ते तैस मां रियासतां-रियासतां केरे लोकां केरि मेहनत फुज़ूल ठहरेली, ते कौमां केरि मेहनत अग्गी मां फुकोली ते तैना थेकी गाले।"

यिर्मयाहेरे सन्देश बाबेले जो भेज़नो

59 यहूदारे राज़े सिदकिय्याहेरे राज़ेरे च़ेवरोवं साले मां ज़ैखन तैस सेइं साथी सरायाह भी बाबेले जो जेवरो थियो, ज़ैन नेरिय्याहेरू मट्ठू ते महसेयाहेरू पोट्लड़ू ते राज़ेरे मेहलेरो अधिकारी भी थियो, 60 तैखन मीं तैस इना गल्‍लां ज़ोईं यानी तैना सब गल्‍लां ज़ैना बाबेले पुड़ पेने बाली मुसीबतरे बारे मां लिखोरिन, तैना मीं किताबी मां लिखी दित्ती। 61 मीं सरायाहे सेइं ज़ोवं, "ज़ैखन तू बाबेले मां पुज़स, तैखन ज़रूर इना सब वचन पेढ़थ 62 ते ऐह प्राथना केरा, ‘हे यहोवा तीं त एस ठारारे बारे मां एन ज़ोवरूए कि अवं एस एरहो मिटेई देलो कि एसमां कुन मैन्हु, कुन जानबर, कोई भी न रालो, बल्के एन हमेशा बेरान भोवरू रालू।’ 63 ते ज़ैखन तू एस किताबी पेढ़तां झ़ाड़स, तैखन एस एक्‍की घोड़े सेइं बेन्धतां फरात समुन्दरेरे मझ़ाटे मां शैरां, 64 ते एन ज़ोइयां, ‘एन्च़रे सेइं बाबेल डुबी गालो ते अवं तैस पुड़ एरी मुसीबत छ़डेलो कि तै फिरी कधी न उठेलो ते तैना थकोरे राले।’"

इड़ी तगर यिर्मयाह नेबेरे वचन आन।✝51:64 प्रका. 18:21.