यिर्मयाह 25

70 सालां केरि गुलामी

1 योशिय्याहेरे मट्ठे यहूदारे राज़े यहोयाकीमेरे राज़ केरनेरे च़ेवरोवं साले मां ज़ै बाबेलेरे राज़े नबूकदनेस्सरे रियासतरो पेइलो साल थियो, ज़ैन वचन यहोवा मीं सेइं ज़ोवं, 2 तैन मीं सब यहूदन ते यरूशलेमेरे लोकन सेइं ज़ोवं, तैन एन आहे: 3 आमोनेरे मट्ठे यहूदारे राज़े योशिय्याहेरे राज़ केरनेरे तेरहोवं साले करां लेइतां अज़्ज़ेरे दिहाड़े तगर यानी तरैई सालन करां यहोवा मीं सेइं गल केरतो राव; ते अवं तैस बार-बार तुसन सेइं ज़ोतो एवरोईं; पन तुसेईं तैना गल्‍लां शुन्ने करां इन्कार कियो। 4 यहोवा तुसन कां अपने सारे दासन मतलब नबी भी एन ज़ोनेरे लेई बार-बार भेज़तो एवरोए, 5 कि अपनि-अपनि बुरी चाल ते अपने-अपने बुरे कम्मन करां दूर भोथ: तैखन ज़ै मुल्ख यहोवा पुराने ज़माने मां तुश्शे दादे-पड़दादन ते तुसन भी हमेशारे लेई दित्तोरोए तैस पुड़ बस्सोरे रेई बटेले; पन तुसेईं न त शुनू ते न ध्यान दित्तू। 6 ते होरि देबतन पत्ती भोइतां तैन केरि पूज़ा ते तैन कां मथ्थो भी न टेका, ते न एपनी बनेवरी मूरती केरे ज़िरिये मीं सरकाथ; तैखन अवं तुश्शो कोई नुकसान न केरेलो। 7 एन शुन्ने पुड़ भी तुसेईं मेरी गल न मन्नी, बल्के अपने हथ्थेइं सेइं बनेवरी मूरती केरे ज़िरिये मीं सरकाते एवरे आथ ज़ैस सेइं तुश्शो नुकसान भोइ सकते, यहोवा एन ज़ोते।

8 "एल्हेरेलेइ सेना केरो यहोवा एन ज़ोते: तुसेईं मेरू वचन न मन्नू, 9 एल्हेरेलेइ शुना, अवं उत्तरेरे पासे रानेबाले सब कुलन कुजालो, ते अपने दास बाबेलेरे राज़े नबूकदनेस्सरे जो समाद भेज़ेलो; ते तैन सेभन एस मुल्खे ते एसमां रानेबाले लोकां केरे खलाफ ते एसेरे आसे-पासे एरे सेभी कौमन केरे खलाफ भी आनेलो; ते एन सब मुल्खां केरो अवं सत्यानाश केरतां तैन्न एरहो बेरान केरेलो कि लोक एन्न हेरतां च़ैड़ी देले; बल्के इना हमेशा उज़ड़ोरे राले, यहोवा एन ज़ोते। 10 ते अवं एरू केरेलो कि एन मां न त खुशी ते न आनन्देरी आवाज़ शुनोली, ते न महरावेरो या महरनरी आवाज़ शुनोली, ते न ढ्लाट च़लनेरी आवाज़ एज्जेली ते न इन मां दीयो बलेलो।✝25:10 प्रका. 18:22-23. 11 सैरी कौमां केरो ऐह मुल्ख बेरान भोइ गालो, ते इना सब कौमां 70 सालन तगर बाबेलेरे राज़ेरी गुलाम रहेली। 12 ज़ैखन 70 साल बीतन, तैखन अवं बाबेलेरे राज़े ते तैस कौमरे लोकन ते कसदी लोकां केरे मुल्खेरे सब लोकां केरे अधर्मेरी सज़ाह देइलो; ते तैस मुल्खे हमेशारे लेई बेरान केरेलो, यहोवा एन ज़ोते। 13 अवं तैस मुल्खे मां अपने तैना सब वचन पूरे केरेलो ज़ैना मीं तैसेरे बारे मां ज़ोवरेन, ते ज़ेत्रे वचन यिर्मयाह नेबे सैरी कौमां केरे खलाफ नबूवत केरतां किताबी मां लिखोरेन। 14 किजोकि बड़े कौमां केरे लोक ते बड्डे-बड्डे राज़े भी तैन करां अपनि सेवा कराले; ते अवं तैन्न तैन केरे कम्मां केरि सज़ाह देइलो।"

परमेशरेरे सरकरो कुटोरो

15 इस्राएलेरे परमेशर यहोवा मीं सेइं एन ज़ोवं, "मेरे हथ्थे मरां सरकरे दाछ़रे रसेरो कुटोरो नेइतां तैन सेभी कौमन पीया ज़ैन कां अवं तीं भेज़ताईं।✝25:15 प्रका. 14:10;15:7;16:19. 16 तैना तैस पीतां तैस तलवारारे वजाई ज़ै अवं तैन केरे दरमियान च़लेइलो थरकेले ते बाबरे भोइ गाले।"

17 एल्हेरेलेइ मीं यहोवारे हथ्थे मरां तै कुटोरो नेइतां तैन सेभी कौमन पियाव, ज़ैन कां यहोवा अवं भेज़ो। 18 यानी यरूशलेम नगर ते यहूदा प्रदेशेरे नगरां केरे लोकन, ते तैन केरे राज़न ते हाकिमन पियावं, ताके तैन केरो मुल्ख बेरान भोइ गाए ते लोक च़ैड़ी देन, ते तैसेरी मसाल देइतां लानत देन; ज़ेरू अज़ काल भोते। 19 ते मिस्रेरे राज़े फ़िरौन ते तैसेरे अधिकैरन, हाकिमन, ते सारे लोकन; 20 ते सब परदेशी मैन्हु केरि कौमन ते ऊस मुल्खेरे सेभी राज़न; ते पलिश्ती केरे सेभी राज़न ते अश्कलोन, गाज़ा ते एक्रोन ते अश्दोद इन नगरां केरे बच़ोरे लोकन; 21 ते एदोमी, मोआबी ते अम्मोनी लोकां केरे सारे राज़न; 22 ते सोर ते सीदोन नगरां केरे सेभी राज़न, ते समुन्दरेरे पार मुल्खां केरे राज़न; 23 फिरी ददानी, तेमाई ते बूजी लोकन ते ज़ेत्रे अपने दाड़ी कटतन, तैन सेभन भी पियाव; 24 ते अरब मुल्खेरे सेभी राज़न ते जंगले मां रानेबाले लोकां केरे सेभी राज़न जो; 25 ते जिम्री, एलाम ते मादैरे सेभी राज़न; 26 ते कुन नेड़े कुन दूरेरे उत्तरेरे पासे केरे सेभी राज़न अकोट्ठो पियावं, एन्च़रे सेइं पूरी धेरती मां रानेबाले संसार केरे मुल्खां केरे सब लोकन मीं पियाव। ते एन सेभी केरे बाद शेशकेरे राज़े भी पीनो पेलो।

27 तैखन यहोवा मीं सेइं ज़ोवं, "तैखन तू तैन सेइं एन ज़ोइयां, ‘सेना केरो यहोवा ज़ै इस्राएलेरो परमेशरे, एन ज़ोते, पीथ, ते मसत भोथ ते उलटी केरां, बिछ़ड़ा ते फिरी कधी न उठा, किजोकि एन तैस तलवारारे वजाई सेइं भोल्हु ज़ै अवं तुश्शे दरमियान च़लेइलो।’✝25:27 प्रका. 18:3.

28 "अगर तैना तेरे हथ्थे मरां कुटोरो नेइतां पीनेरे लेई इन्कार केरन त तैन सेइं ज़ोइयां, ‘सेना केरो यहोवा एन ज़ोते कि तुसन ज़रूर पीनो पेलो। 29 हेरा, ज़ैस नगरे जो मेरू ज़ोतन, अवं पेइले तैस्से मां मुसीबत छ़डेलो, फिरी कुन तुस लोक बेकसूर भोइतां बच़ेले? तुस बेकसूर भोइतां न बच़ेले, किजोकि अवं तलवार धेरतरे रानेबालन पुड़ च़लाने पुड़ आईं, सेना केरो यहोवा एन ज़ोते।’"✝25:29 1 पत. 4:17.

पूरी दुनिया पुड़ न्याय

30 "नबूवत केरतां तैन सेइं एन भी ज़ोइयां, ‘यहोवा बा गरज़ेलो, ते अपने तैस्से पवित्र धामे मरां अपनो शब्द शुनालो; तै अपने चरागारे ठारारे खलाफ ज़ोरे सेइं गरज़ेलो; तै धरती सारे रानेबालां केरे खलाफ भी दाछ़ ढ्लन्च़ने बालां केरो ज़ेरो ललकारेलो।’✝25:30 प्रका. 10:11.

31 "धेरतरे कूने-कूने तगर भी हाहाकार भोल्हो, किजोकि सेभी कौमन सेइं यहोवारो मुकदमोए; तै सेभी मैन्हन सेइं बेंस केरेलो, ते दुष्टन तलवारी सेइं नाश केरेलो।

32 "सेना केरो यहोवा इन ज़ोते: हेरा, आफत एक्‍की कौमी करां होरि कौमी मां फैलेली, ते बड़ी आँधी धेरतरे कूने-कूने मरां च़लेली! 33 तैस मौके ज़ैना यहोवा मारे तैन केरि लाशां धेरतरे एक्‍की पासेरां होरि पासे तगर पेवरी रहेली। तैन केरे लेई कोई लेरां देनेबालो न रालो, ते तैन केरि लाशां न अकोट्ठी की गैली ते न देब्बी गैली; तैना ज़मीनी पुड़ खादरी ज़ेरि पेवरी रहेली। 34 हे पुहालव, हाय-हाय केरा ते चिन्डां मारा, हे निगर हुड़व ते थाव्व, मांज़नी मां वापस एज्जा, किजोकि तुश्शे मारे गानेरे दिहाड़े पुज़ोरेन, ते अवं मन पसंद भांडेरो ज़ेरो तुश्शो सत्यानाश केरेलो।✝25:34 याक. 5:5. 35 तैस मौके न त पुहालां केरे लेई नशनेरे लेई कोई ठार राली, ते न निगर हुड़ ते थाव्वे नेश्शी बटेले। 36 पुहालां केरे चिन्डां केरि शौर ते निगर हुड़ ते थाव्वां केरि आवाज़ शुनोतीए! किजोकि यहोवा तैन केरि चरागा नाश केरेलो, 37 ते यहोवारी सरक भड़कनेरे वजाई सेइं शैन्तरी सब ठारां बरबाद भोइ गैली, ज़ैन रानेरी ठारन मां हुन्ना शान्ति आहे, तैना बरबाद भोइ गैली। 38 जुवान शेरेरो ज़ेरो यहोवा अपने कुढी छ़ेडतां निस्ते, किजोकि अंधेर केरनेबाली तलवार ते तैसेरे भड़कोरे क्रोधेरे वजाई सेइं तैन केरो मुल्ख बेरान भोइ जेवरोए।"