1 रोड़ू भोथू कि हे यहोवा तू अम्बर छ़िन्दतां उतरी एज्जेथो ते पहाड़ां तेरे सामने थेरकी गान। 2 ज़ेन्च़रे अग शुक्‍कोरी शेंमोड़न फुक्‍की छ़डतीए ते पानी उबालतीए, तैस्से तरीके तू अपने दुश्मन पुड़ अपनु नवं एन्च़रे बांदू केर कि कौमां-कौमां केरे लोक तेरे महिमाई सेइं थेरकी गान। 3 किजोकि ज़ैखन तीं एरां भयानक कम्मां कियां ज़ैन केरि असन उमीद न थी; तैखन तू बुन अव ते पहाड़ां तेरे सामने थरकने लगां। 4 किजोकि पुराने ज़माने करां लेइतां कोई एरहो परमेशर न त कधी लाहोरोए ते न कन्न सेइं शुनोरोए ज़ै अपने बलगने बालां केरे लेई कम केरे।✝ 5 तू त तैन लोकां केरि मद्दत केरनेरे लेई अग्रोवं निस्तस ज़ैना खुशी सेइं नेकी केरतन, ते तेरे बत्तन पुड़ च़लते तीं याद केरतन। हेर तू क्रोधे भोवरो थियो, किजोकि असेईं पाप कियो; इश्शी ई हालत बड़े च़िरेरी देतीए, कुन इश्शो छुटकारो भोइ सकते? 6 असां त सब अशुद्ध भोइ जेवरेम, ते इश्शी धार्मिकतारां सारां कम्मां मेले सेइं खिन्थां केरे ज़ेरां आन। असां सारे पट्लां केरे ज़ेरे शुक्‍की जेवरेम, ते इश्शे अधर्मेरे कम्मां केरि वजाई सेइं असां हवारे ज़ेरे उडरी गातम। 7 कोई भी तीं कां प्राथना न केरे, ते न कोई तीं करां मद्दत घिन्नेरे लेई चौकसी केरे कि तीं सेइं लिपटोरो राए; किजोकि इश्शे अधर्मेरे कम्मां केरि वजाई सेइं तीं असन करां अपनु तुत्तर छ़ुपेइतां रखेरूए, ते असां एपनी बुरैई केरे बस्से मां छ़डोरेम।

8 फिरी भी, हे यहोवा तू इश्शो बाजी आस; हेर, असां त मित्ती अहम, ते तू इश्शो कुम्हार आस; ते असां सब तेरे हथ्थेरी कारीगिरी अहम। 9 एल्हेरेलेइ हे यहोवा, बड़ो क्रोध न केर, ते हमेशा तगर इश्शो अधर्म याद न रेखां। सोचतां हेर, असां तीं कां बिनती केरतम, असां सब तेरे प्रजारे लोक अहम। 10 हेर, तेरे पवित्र नगर सुनसान बेनि गाले, सिय्योन बेरान भोइ गालू, इड़ी तगर कि यरूशलेम उज़ड़ी जेवरूए। 11 इश्शो पवित्र ते शोभने बालो भवन ज़ैस मां इश्शे दादे-पड़दादे तेरी आराधना केरते थिये, अग्गी सेइं फुकोरोए ते इश्शी मन पसंद चीज़ां सब नाश भोइ जेई। 12 हे यहोवा, कुन इना गल्‍लां केरे भोंते संते भी तू अपनो आप रोकेलो? कुन तू असन लोकन इस बुरी हालती मां राने देलो?