1 अफ़सोस तैस ताजे पुड़! ज़ैन एप्रैमेरे मतवालां केरूए, ते अफ़सोस तैन केरि भड़कीली खूबसूरती पुड़ ज़ैन शुकने बालू फूड़ोंव आहे, ज़ै बड़े फलदार वैदरे दोग्गे पुड़ दाछ़रे रस्से सेइं मसत भोवरे केरि आहे। 2 हेरा, प्रभु कां ताकतबर ते निगरे*, ज़ै आण ते उज़ाड़ने बाली आंधरी ज़ेरि बड़ी धारे तै बड़े सेखती सेइं तल्‍ले जो बिछ़ोड़ेलो। 3 एप्रैमी मतवालां केरे घमण्डेरू ताज पव्वन हैठ ढ्लेन्च़ू गालू; 4 ते तैन केरि भड़कीली खूबसूरती ट्लकने बालू फूड़ोंव, ज़ैन खूबसूरत वैदरे च़ोटी पुड़ रख्खू जेवरूए, तैन रिती करां पेइले पकोरे फैगेरू ज़ेरू भोल्हु, ज़ैस कोई तकते बार ने, ते तैस खाए।

5 तैस मौके सेना केरो यहोवा अपने बच़ोरे लोकां केरे लेई अक खूबसूरत महिमा बालू ताज भोल्हो। 6 ते ज़ैना न्याय केरनेरे लेई बिशतन तैन केरे लेई न्याय केरनेबाली आत्मा; ते ज़ैना हमलो केरते दुश्मन्न नगरेरे फाटकन करां हटाते, तैन केरे लेई ई ताकत भोल्ही।

7 इना धार्मिक अगुवे भी दाछ़रे रस्सेरे वजाई सेइं थरकतन ते शराब पीतां ढ्लैकां खातन, दाछ़रे रस्से तैन्न बिसरावरूए, तैना शराबी सेइं ढ्लैकां खातन ते दर्शन मैलते वक्त भेटकी गातन, ते ठीक न्याय न केरन। 8 किजोकि सारे मेज़ उलटी सेइं गन्दे भेवरेन, कोई साफ ठार नईं बंच़ोरीए।

9 "तैना एप्पु मांमेइं ज़ोतन, ऐह मैन्हु कैस सेइं एरी गल्‍लां केरते? तै असन एन्च़रे प्रभुएरे सन्देशेरो मतलब समझ़ाते कि ज़ेन्च़रे अस निक्‍के बच्‍चे भोम ज़ैन केरू दुद्ध मसां हुन्ना छुटेवरू भोए। 10 किजोकि हुक्मे पुड़ हुक्म, हुक्मे पुड़ हुक्म, नियमे पुड़ नियम, नियमे पुड़ नियम, थोड़ू इड़ी थोड़ू उड़ी।"

11 अगर तुस मेरी गल न शुनेले त परमेशर तुसन लोकन सेइं परदेशी बोली मां ते बेखली बोली मां गल्‍लां केरेलो। 12 ज़ैन सेइं तैनी ज़ोवं, "आरामेरी ठार ईए; थकोरे लोकन आराम केरने देथ; पन तैनेईं न शुनू।" 13 एल्हेरेलेइ यहोवारू वचन तैन कां हुक्मे पुड़ हुक्म, हुक्मे पुड़ हुक्म, कानूने पुड़ कानून, कानूने पुड़ कानून थोड़ू इड़ी, थोड़ू उड़ी, ताके तैना च़ले गान, ज़ैस सेइं तैना ठोकर खेइतां बिछ़ड़न ते ज़खमी भोन, ते फंदे मां फेसतां ट्लाए गान।

14 एल्हेरेलेइ हे मज़ाक बनाने बालाव, तुस ज़ैना यरूशलेमेरे लोकन पुड़ हुकूमत केरतथ, यहोवारू एन वचन शुना! 15 तुस ज़ोतथ, "असेईं मौती सेइं करार कियोरोए, ते पाताले सेइं कसम खेवरीए; एल्हेरेलेइ ज़ैखन सज़ारो ज़बरदस्त सैलाब एज्जेलो त तै असन तगर न पुज़ेलो; किजोकि असेईं झूठ अपने छ़पनेरी ठार बनेवरूए, ते धोखेरी आड़ी मां छ़ेप्पी जेवरेम।" 16 एल्हेरेलेइ प्रभु यहोवा एन ज़ोते, "हेरा, मीं सिय्योने मां मुनीयादरो घोड़ रखोरोए, अक परखोरो घोड़, कूनेरो कीमती घोड़ ते मज़बूत मुनीयादरो घोड़ ज़ै कोई तैस पुड़ विश्वास केरेलो तै कधी न हिलेलो।✝ 17 अवं न्याय सूत ते धार्मिकता साहल बनेइलो, ते तुश्शी झूठेरी छ़पनेरी ठार आणी सेइं रुड़ेली; ते तुश्शे छ़पनेरी ठार पैनी मां डुब्बेली। 18 तैखन ज़ै करार तुसेईं मौती सेइं कियोरो थियो, ते ज़ै समझोतो तुसेईं अधलोके सेइं कियो तै भी बनोरो न रालो, ते ज़ैखन आफत हड़ैइअरी ज़ेरि एज्जे तैखन तुस तैस मां डुब्बी गाले। 19 तै ज़ैखन भी एज्जे तुसन तैखन रुड़ेइतां छ़डेली; चाहे दीस भोए या चाहे रात, ई खबर शुन्नी तुश्शे लेई परेशान भोनेरी वजा भोल्ही। 20 किजोकि बिछ़ान ज़ंघां सिद्धी केरनेरे लेई घटे, ते छ़ुंहूं घिन्नेरे लेई घटे।"

21 किजोकि यहोवा एन्च़रे खड़ो भोल्हो ज़ेन्च़रे तै पराजीम पहाड़े पुड़ खड़ो भोवरो थियो, ते ज़ेन्च़रे गिबोन वैदी मां तैनी अपनो क्रोध हिरावरो थियो; तै हुनी फिरी क्रोध हिरालो, ताके तै फिरी अपनु कम केरे, ज़ैन हैरान केरनेबालोए, ते तैन कम केरे ज़ैन आजीब आहे। 22 एल्हेरेलेइ हुनी तुसां मज़ाक न बनाथ, नईं त तुश्शां बन्धां होरां भी कस्सा गालां, किजोकि सेना केरे प्रभु यहोवा मीं सेइं ज़ोवरूए कि तैनी सारे मुल्खां केरो सत्यानाश केरनेरो इरादो कियोरोए।

23 ध्यान देथ कि अवं कुन लगोरोईं ज़ोने। 24 ज़ैखन ज़मीनदार बीज़ बेनेरे लेई दांत लाते? त कुन तै लगातार दांत लातो रहते? ते कुन तै हमेशा ऊडार घड़तो रहते ते ढैल्‍लां भन्तो रहते 25 ज़ैखन ज़मीनदारेरू ऊडार तियार भोते, तैखन सौंफ ते ज़िरेरू बीज़ शारते, ते अपने-अपने ठैरी गेहुं ते जौआं केरू बीज़ बेते? 26 ज़मीनदार रोड़ेच़ारे पतो भोते कि कुन-कुन केरनूए, किजोकि तैसेरे परमेशरे तैस सही तरीको शिखालो।

27 सौंफ मडनेरे लेई भारी चीज़रो इस्तेमाल न केरन, बल्के सौंफ लट्ठी सेइं ते ज़ीरो सोटे सेइं मड्डो गाते। 28 अन्न मड्डू गाते, पन तैस कोई लगातार मडतो न राए, ते गेड्डरो पेइहो न घोड़े तैस पुड़ च़लाए, तै तैस चूर-चूर न केरे। 29 एन सब किछ सेना केरे यहोवारे तरफां रख्खू जेवरूए, तै अद्भुत सलाह देते ते बड़ो अक्लमन्दे।