1 यहोवा परमेशर अपने अभिषिक्त कुस्रू राज़ेरे बारे मां एन ज़ोते, मीं तैसेरो देइनो हथ एल्हेरेलेइ ठमोरोए कि तैसेरे सामने कौमन अधीन केरेलो, ते राज़ां केरि कमर ढिल्‍ली केरीं, ते तैसेरे सामने फाटकन एन्च़रे खोल्‍ली कि तैना फाटक फिरी कधे बन्द न किये गान। 2 अवं तीं अग्री-अग्री च़लेलो ते धेरतरे उच्‍ची-उच्‍ची ठारन पेट्ठी केरेलो, ते अवं पितलरे फाटकन ट्लोड़तां छ़डेलो ते लोंहेरे बेंड़न टुक्ड़े-टुक्ड़े केरेलो। 3 अवं तीं आंधरे मां छ़पोरू ते छ़ुपेइतां रखोरू धन तीं देइलो, ज़ैस सेइं तू बुझ़स कि अवं इस्राएलेरो परमेशर यहोवा आईं ज़ैनी तू नवं घिन्तां कुजावरोस।✝ 4 अपने दास याकूब ते अपने ट्लारे इस्राएलेरे लेई तू नवं घिन्तां कुजावरोस; अगर तू मीं न भी ज़ानस, फिरी भी मीं तीं अक पदवी दित्तोरिए। 5 अवं यहोवा आईं मेरे अलावा होरो कोई परमेशर नईं, मेरे अलावा होरो कोई परमेशर नईं; अगर तू मीं न भी ज़ानस, फिरी भी अवं तेरी कमर कस्सेलो, 6 ते दिहाड़ो निसने करां ते दिहाड़ो डुबनेरे ठारी तगर सारे लोक मीं ज़ानेले कि मेरे बगैर कोई अथ्थी नईं; अवं यहोवा आईं होरो कोई नईं। 7 अव्वें लौअरो बनानेबालो ते आंधरेरो रच़ना केरनेबालोईं, ते अव्वें रोड़े बुरे हालात पैदा केरताईं, अवं यहोवाए एन सब केरनेबालोईं। 8 हे आसमान बैंधोरां धार्मिकता बख्खा, आकाशमण्डले मरां धार्मिकतारी झ़ड़ी भोए; धरती खुल्‍ले ते मुक्ति पैदा भोए; ते धार्मिकता भी तैस सेइं साथी उगे; मीं यहोवा तैन पैदा कियोरूए।

9 "अफ़सोस तैस पुड़ ज़ै अपने बनानेबाले परमेशरे सेइं लड़ते! तै त मित्तरे ट्लुटोरे एक्‍की भांडे मरां अक कपरी आहे! कुन कारीगरिरेरू बनेवरू कम तैसेरे बारे मां ज़ोलू, ‘तैसेरे हथ नईं?’ 10 अफ़सोस तैस पुड़ ज़ै अपने बाजी सेइं ज़ोए, ‘कि तू बाजी किजो बनो? ते एपनी अम्मा सेइं ज़ोए, कि तू केसेरी अम्मा आस?’" 11 यहोवा ज़ै इस्राएलेरो पवित्र परमेशर ते तैसेरो बनानेबालोए तै एन ज़ोते, "कुन तुस एजने बैली चीज़ां केरे बारे मां मीं करां पुछ़ेले? कुन तुस मेरे बच्‍चां केरे बारे मां मीं सेइं सवाल केरेले या मेरे कम्मां केरे बारे मां मीं हुक्म देले? 12 मीएं धरती बनेवरीए ते तैस पुड़ मैन्हु बनेवरेन; ते मीं अपने हथ्थे सेइं अम्बर फैलाव ते तैसेरे सारे तारन हुक्म दित्तोरोए। 13 मीं कुस्रू धार्मिकताई मां उभारो ते अवं तैसेरे सब बत्तन सिद्धी केरेलो; तै मेरे नगरन फिरी बसालो ते मेरे कैदी लोकन बगैर कीमत या बदलो घिन्तां छुटालो," सेना केरे यहोवारू एन्ने ज़ोनूए।

14 यहोवा एन ज़ोते, "मिस्रेरी लोकां केरि कमाई ते कूशी केरो बुपारेरो फैइदो ते सबाई लोक तीं कां एज्जेले ज़ैना बड़े लम्मे-चोड़ेन, तीं कां एज्जन, ते तेरे भोइ गान, तैना तीं पत्पती च़लेले; तैना शंगलन सेइं बन्धोरे च़ले एज्जेले ते तीं कां झुकतां तीं कां बिनती केरतां ज़ोले, ‘पक्‍को परमेशर तीं सेइं साथीए ते होरो कोई नईं; तैसेरे अलावा होरो कोई परमेशर नईं।’"✝

15 हे इस्राएलेरे परमेशर, हे मुक्ति देनेबाला! सच़्च़े तू एरहो परमेशर आस ज़ै अपने आपे छ़ुपेइतां रखते। 16 मूरती बनानेबाले सारे कारीगिर शरमिन्दा ते हैरान भोल्हे, तैना सारे शरमिन्दा भोल्हे। 17 पन इस्राएले यहोवारे ज़िरिये जुगे-जुगेरो छुटकारो भोल्हो ते तुसां हमेशा तगर कधी शरमिन्दा ते न परेशान भोल्हे।✝

18 किजोकि यहोवा ज़ै अम्बरेरो बनानेबालोए, तैए परमेशरे; तैन्नी धरती रच़ी ते बनाई, तैन्नी धरती कायम की; तैनी तै खाली रखनेरे लेई नईं बल्के आबाद भोनेरे लेई बनाई, तैए एन ज़ोते, "अवं यहोवा आईं, मेरे अलावा होरो कोई परमेशर नईं। 19 मीं न कोन्ची छ़ेपोरी ठारी, ते न कोन्ची आंधरेरे मुल्खे मां गल्‍लां की; मीं याकूबेरे खानदाने सेइं नईं ज़ोवरू, ‘मीं बेकारे मां तोप्पा।’ अवं यहोवा सच़्च़े ज़ोताईं, अवं जाइज़ गल्‍लां ज़ोताईं।

20 "हे कौमां-कौमां केरे बच़ोरे लोकव, अकोट्ठे भोइतां एज्जा! साथी मिलतां नेड़े एज्जा! ज़ैना लेकड़री बनेवरी मूरती च़लातन ते एरे देबतां केरे ज़िरिये ज़ैन करां किछ न बने, तैन कां प्राथना केरतन, तैना न समझ़ आन। 21 तुसां प्रचार केरा ते तैन इरां आनां; हाँ तैना एप्पु मांमेइं सलाह केरन कि केनी पुराने ज़माने मां एन बांदू कियोरू थियूं? पुराने ज़माने मां ऐह इतला पेइले दित्तोरी थी? कुन मीं यहोवा एन नईं कियोरू? एल्हेरेलेइ मेरे अलावा होरो कोई परमेशर नईं, धर्मी ते छुटानेबालो परमेशर मेरे अलावा होरो कोई नईं।

22 "हे धेरतरे दूर-दूर मुल्खां केरे लोकव, तुसां मेरे पासे फिरा ताके तुसन मुक्ति मैल्हे! किजोकि अव्वें परमेशर आईं मेरे अलावा होरो कोई परमेशर नईं।

23 "मीं अपनि ही कसम खई, धार्मिकतारे मुताबिक मीं एन ज़ोवरूए ते तैन न टलेलू, ‘हर अक ज़ैधू मीं कां झुकेलो! ते हर अक मेरी कसम खाएलो।’✝

24 "लोक मेरे बारे मां ज़ोले, सिर्फ यहोवा मां धार्मिकता ते शक्ति आहे। तैस्से कां लोक एज्जेले, ते ज़ै तैस सेइं रुशेलो, तैस शरमिन्दा भोनू पेनूए। 25 इस्राएलेरे सारे खानदानेरे लोक यहोवारी वजाई सेइं धर्मी ठहरेले, ते तैसेरी महिमा केरेले।"