यशायाह 16

मोआब मुल्खेरी बुरी हालत

1 सुनसान ठारारे बत्तां सेला नगरे मरां सिय्योनेरी कुइयरे पहाड़े*16:1 सिय्योनेरी कुइयरे पहाड़े मतलब यरूशलेमेरू पहाड़ पुड़ मुल्खेरे हाकिमेरे लेई गबड़ां भेज़ा। 2 मोआबेरी कुइयां अर्नोन दरियारे घाटे पुड़ उज़ड़ोरे आलहेरे च़ुड़ोलू ते तैन केरे भटकोरे बच्‍चां केरि ज़ेरि आन। 3 सलाह केरा; न्याय केरा, दुपहरेईं अपनो सैयो रातरो ज़ेरो केरा, घरेरां कढोरे लोकन छ़ुपेई छ़डा, ज़ैना दरबदर भटकतन तैन न ट्लुवाथ। 4 मेरे लोक ज़ैना कढोरेन तैना तेरे दरमियाने मां रान; नाश केरनेबाले मोआबे करां असन बच़ाथ। ढ्लन्च़ने बालो न राव, लूट पाट फिरी न भोल्ही; किजोकि मुल्खे मां ज़ुलम केरनेबाले नाश भोइ जेवरेन। 5 तैखन दयाई सेइं अक तखत कायम कियो गालो ते तैस पुड़ दाऊदेरे तेम्बु मां सच़्च़ैई सेइं अक मैन्हु तखते पुड़ बिशेलो ज़ै सोच विचार केरतां सच़्च़े सेइं न्याय केरेलो ते धार्मिकताई सेइं कम केरनेरे लेई तियार रालो।

6 यहूदारे लोक ज़ोतन असेईं मोआबेरे घमण्डेरे बारे मां शुनेरूए, कि तै बड़ो अभिमानी थियो; तैसेरू अभिमान ते घमण्ड ते रोषेरे बारे मां भी शुनेरूए, पन तैसेरू बड़ू घमण्ड बेकारे। 7 किजोकि मोआब मुल्ख हाय! हाय! केरेलो; सब मोआबेरे लेई मातम केरेले। कीरहरासत नगरेरे दाछ़री टिकी केरे लेई तैना बड़े उदास भोइतां ओशा छ़डेले।

8 किजोकि हेशबोन नगरेरां ऊडारां ते सिबमा नगरेरी दाछ़री बागां शुक्‍की जेई; कौमां-कौमां केरे अधिकारी लोकेईं तैन केरि रोड़ी-रोड़ी दाछ़ां केट्टी-केट्टी बिछ़ोड़ी, तैना याजेर नगरे तगर पुज़्ज़ी जेई ते जंगले मां भी फैलती जेई; तैना बेडोते-बेडोते समुन्दरेरे पार दूर तगर फैली जेवरी थी। 9 एल्हेरेलेइ अवं याजेर नगरेरे लेई ते सिबमा नगरेरी दाछ़ां केरे लेई भी लेरां देइलो; हे हेशबोन ते एलाले अवं तुसन अपने ऐंखरेईं सेइं सगेलो; किजोकि तुश्शे रितरे दिहाड़ां केरे फलां केरे ते फसल कटनेरे वक्तेरी आनन्देरी आवाज़ शुनोरीए। 10 फल देनेबाले बागन मरां आनन्द ते खुशी च़ली जेई; दाछ़री बागन मां कोई गीतां न ज़ोलो, ते न कोई खुशरी आवाज़ शुनोली; ते दाछ़रे कुण्डे मां कोई दाछ़ न ढ्लेन्च़ेलो, किजोकि अवं तैन केरे खुशरी आवाज़ बन्द केरेलो। 11 एल्हेरेलेइ मेरो दिल मोआबेरे वजाई सेइं ते मेरो ज़मीर कीरहेरेसेरे वजाई सेइं सितारारो ज़ेरो मातम केरते।

12 ते ज़ैखन मोआब उच्‍चे ठैरी पुड़ तुत्तर हिराते-हिराते थेकी गाए, ते प्राथना केरनेरे लेई अपने पवित्र ठैरी मां एज्जे, त तैस किछ फैइदो न भोल्हो। 13 ऐह तैए गल्‍ले ज़ै यहोवा मोआबेरे बारे मां ज़ोवरी थी। 14 पन हुनी यहोवा मोआबेरे बारे मां एन ज़ोवरूए, "मज़दूरां केरे सालां केरे ज़ेरे ट्लाई सालां केरे अन्तर मोआबेरी शान-ओ-शोकत ते तैसेरी भीड़ सब मुक्‍की गाली; ते थोड़े ज़ैना बच़ेले तैन केरि कोई ताकत न भोल्ही।"