यशायाह 62

सिय्योनेरो छुटकारो

1 सिय्योनेरे लेई अवं च़ुप न रेइलो, ते यरूशलेमेरे लेई अवं चैने सेइं न बिशेलो, ज़ांतगर तैसेरी धार्मिकता झ़ेझ़ेरे लौअरी ज़ेरि न चमके ते तैसेरो छुटकारो बेलति मसालरो ज़ेरो न लेइहोए। 2 तैखन कौमां-कौमां केरे लोक तेरी धार्मिकता ते सब राज़े तेरी शान-ओ-शोकत हेरेले, ते यहोवा तेरू अक नंव्वू नवं रखेलो।✝62:2 प्रका. 2:17;3:12. 3 तू यहोवारे हथ्थे मां शोभने बालू ताज ते तैसेरे तेई मां राज़मुकुट ठहरेली। 4 तींजो फिरी शारोरी न ज़ोले, ते तेरी धेरती जो फिरी उज़ड़ोरी न ज़ोले; पन तू हेप्सीबा*62:4 हेप्सीबा मतलब परमेशरेरू खुशरू नगर ते तेरी ज़मीनी जो ब्यूला*62:4 ब्यूला मतलब परमेशरेरी मारहनी ज़ोले; किजोकि यहोवा तीं पुड़ खुशी आहे, ते तेरी धरती साघन भोल्ही। 5 किजोकि ज़ेन्च़रे अक नौजुवान कुवैरी कुइये ड्लेइतां आनते, तेन्च़रे तेरे लोक तीं फिरी रानेरे लेई च़ुनेले; ते ज़ेन्च़रे महराव एपनी महारेनी पुड़ खुशी भोते, तेन्च़रे तेरो परमेशर तेरे वजाई सेइं खुशी भोल्हो। 6 हे यरूशलेम, मीं तेरी शहरपनाही पुड़ पहरदार बिशालोरेन; तैना रात दिहैड़ी कधे च़ुप न राले। हे यहोवाए याद केरने बालाव, च़ुप न राथ,✝62:6 यहे. 3:17-21;इब्रा. 13:17. 7 ते ज़ांतगर यहोवा यरूशलेमे कायम केरतां तैसेरू नवं सैरी दुनियाई मां फैलाए, तांतगर तुसां भी तैस आराम न केरने देथ। 8 यहोवा अपने देइने हथ्थेरी ते एपनी ताकतबर पाखड़री कसम खेवरीए; पक्‍को अवं एजने बाले वक्ते मां तेरू अन हुनी फिरी तेरे दुश्मन्न खानेरे लेई न देइलो, परदेशी केरां मट्ठां तेरो नंव्वो दाछ़रो रस ज़ेसेरे लेई तीं मेहनत कियोरीए, न पी बटेलां, 9 सिर्फ तैन्ना, ज़ैनेईं तै गैल्‍ले मां रखोरो भोए, तैस्से मरां खेइतां यहोवारी तारीफ़ केरेले, ते ज़ैनेईं दाछ़रो रस जम्हां केरतां रखोरो भोए, तैन्ना तैसेरो रस मेरे पवित्र भवनेरे अंगने मां पी बटेले। 10 गाथ, नगरेरे फाटकन मरां निस्सी गाथ, प्रजारे लोकां केरे लेई बत तियार केरा; सड़क बनेइतां उच्‍ची केरा, तैस मरां घोड़ शेरी छ़डा, मुल्खे-मुल्खेरे लोकां केरे लेई झण्डो खड़ो केरा। 11 हेरा, यहोवा धेरतरे कूने-कूने तगर एस हुक्मेरो प्रचार कियोरोए; सिय्योनेरी कुइये सेइं ज़ोथ, "हेर, तेरो छुटकारो केरनेबालो एवरोए, हेर, ज़ै मज़दूरी तैस देनीए तै तैस कांए ते तैसेरू कम तैसेरे सामने।"✝62:11 मत. 21:5;प्रका. 22:12. 12 ते लोक तैन जो पवित्र प्रजा ते यहोवारे छुटेवरे लोक ज़ोले; ते तेरू नवं कबूल कियोरी मतलब न शारोरी नगरी पेलू।