यशायाह 37

हिजकिय्याह राज़ो यशायाह नेबी करां सलाह मगते

1 ज़ैखन हिजकिय्याह राज़े इनां गल्‍लां शुनी, तैखन तै दुखेरे मारे अपना लिगड़ां छ़िंदतां, ते टाट पलेटतां यहोवारे भवने मां जेव। 2 ते तैनी एलयाकीम ज़ै राज़ेरे मेहलेरो अधिकारी थियो, ते शेबना मंत्री, ते याजक केरे बुज़ुर्ग, ज़ैना सारे टाट पलेटतां थिये, आमोसेरे मट्ठे यशायाह नेबी कां भेज़े। 3 तैन अधिकैरेईं यशायाह नेबी कां गेइतां ज़ोवं, "हिजकिय्याह राज़ो इन ज़ोते, अज़ दिहाड़ी मुसीबत ते सज़ाह ते निन्दारी दिहाड़ीए; इश्शी हालते तैस कौन्शरी ज़ेरि ज़ेसेरो बच्‍चो ज़र्मनेरो मौके त एवरोए पन ज़र्म देनेरी ताकत नईं। 4 भोइ सकते कि तेरे परमेशर यहोवा रबशाकेरी शुनी, ज़ैस सेइं तैसेरे मालिक अश्शूरेरे राज़े ज़ींते परमेशरेरी निन्दा केरने जो भेज़ोरोए, ते ज़ैना गल्‍लां तेरे परमेशर यहोवा शुनोरिन तैन सज़ाह दे; एल्हेरेलेइ तू एन थोड़े बच़ोरां केरे लेई ज़ैना रेई जेवरेन तैन केरे लेई प्राथना केर ज़ैना यरूशलेम नगरे मां बच़ोरेन।"

5 ज़ैखन हिजकिय्याह राज़ेरे अधिकारी यशायाह नेबी कां आए। 6 तैखन यशायाह नेबे तैन सेइं ज़ोवं, "अपने मालिके सेइं ज़ोथ, ‘यहोवा इन ज़ोते, कि ज़ैना गल्‍लां तीं शुनोरिन, ज़ैन केरे वजाई सेइं अश्शूरेरे राज़ेरे लोकेईं मेरी निन्दा कियोरीए, तैन केरे वजाई सेइं न डर। 7 शुन, अवं अश्शूरेरे राज़ेरो इरादो बदलेलो ते तै कोई अफवा शुन्तां अपने मुल्खे जो वापस च़लो गालो, ते अवं तैस तैसेरे मुल्खे मां तलवारी सेइं मारेइलो।’"

सन्हेरीबेरी चिट्ठी

8 तैखन रबशाके वापस एइतां अश्शूरेरो राज़ो लिब्ना नगर हमलो केरनेरे च़लोरो मैल्हो, किजोकि तैनी शुनोरू थियूं कि तै लाकीश नगरे मरां च़लो जेवरोए। 9 ज़ैखन तैनी कूश मुल्खेरे राज़े तिर्हाकारेरे बारे मां एन शुनू, "कि तै मीं सेइं लड़नेरे लेई एवरोए," तैखन तैनी हिजकिय्याह कांजो मैन्हु भेज़तां चिट्ठी भेज़ी, 10 "तुस यहूदारे राज़े हिजकिय्याहे सेइं इन ज़ोइयथ, ‘तेरो परमेशर ज़ैस पुड़ तू भरोसो केरतस, एन ज़ोइतां तीं धोखो न देइ सखे, कि यरूशलेम नगर अश्शूरेरे राज़ेरे कब्ज़े मां न भोल्हु। 11 हेर, तीं त शुनेरूए कि अश्शूरेरे राज़ेईं सारे मुल्खन सेइं केरहो बर्ताव कियोरोए ते तैन केरो सत्यानाश कियोरोए। 12 फिरी कुन तू बच़ेलो? गोजान ते हारान ते रेसेप ते तलस्सार नगरन मां रानेबाले एदेनी ज़ैना कौमां मेरे दादे-पड़दादेईं नाश केरतां छ़ेडी, कुन तैन नगरन मरां कोन्ची कौमरे देबतेईं तैन मरां कोई बच़ाव? 13 हमात नगरेरो राज़ो, ते अर्पाद नगरेरो राज़ो, ते सपर्वैम नगरेरो राज़ो, ते हेना ते इव्वा नगरां केरो राज़ो एना सब कोरहां जे?’"

हिजकिय्याह राज़ेरी प्राथना

14 ई चिट्ठी हिजकिय्याहे भेज़ोरे मैन्हु केरे हथ्थे मरां नेइतां पढ़ी। तैखन यहोवारे भवने मां गेइतां तैनी यहोवारे सामने खोल्‍ली। 15 ते यहोवा कां ई प्राथना की, 16 "हे सेना केरे यहोवा! हे करूबन पुड़ बिशने बाला इस्राएलेरे परमेशर! धेरतरे सारे प्रादेशन पुड़ सिर्फ तूए परमेशर आस। अम्बर ते धरती तींए बनेवरीए। 17 हे यहोवा ध्यान देइतां शुन, हे यहोवा एछ़्छ़ी खोलतां हेर, ते सन्हेरीबेरी गल्‍लां शुन ज़ैनी ज़ींते परमेशरेरी निन्दा केरनेरे लेई लिखतां भेज़ोरूए। 18 हे यहोवा, सच़ त आहे, कि अश्शूरेरे राज़े कौमां ते तैन केरे मुल्ख उज़ाड़ोरेन। 19 ते तैन केरे देबतां केरि मूरती अग्गी मां छ़ेडी, किजोकि तैना ईश्वर न थिये: तैना मैन्हु केरि कारीगिरी, लकड़ी ते घोड़े थिये; एल्हेरेलेइ तैना तैन नाश केरि सके।✝37:19 भज. 115:4-8;गल. 4:8. 20 हुनी, हे इश्शे परमेशर यहोवा तू असन तैसेरे हथ्थे करां बच़ा, कि धेरतरे रियासतां-रियासतां केरे लोक बुझ़न कि सिर्फ तूए यहोवा आस।"

सन्हेरीबेरे बारे मां परमेशरेरू वचन

21 तैखन आमोसेरे मट्ठे यशायाह नेबे हिजकिय्याह राज़े कां समाद भेज़ो, "इस्राएलेरो परमेशर यहोवा एन ज़ोते: ज़ै प्राथना तीं अश्शूरेरे राज़े सन्हेरीबेरे बारे मां कियोरीए, 22 तैसेरे बारे मां यहोवा एन ज़ोवरूए, ‘सिय्योनेरी कुवारी*37:22 सिय्योनेरी कुवारी यरूशलेम नगरेरे जुवान लोक कुई तीं घटिया ज़ानती ते तेरो मज़ाक बनातीए, यरूशलेम नगरेरी कुई*37:22 यरूशलेम नगरेरी कुई यरूशलेम नगरेरे लोक, तीं पुड़ क्रोड़ी हिलातीए।

23 "‘तीं केसेरी बदनामी ते निन्दा कियोरीए? ते तीं ज़ै बड्डी गल ज़ोइतां घमण्ड कियोरूए, तैन केसेरे खलाफ कियोरू? इस्राएलेरे पवित्र परमेशरेरे खलाफ! 24 तीं अपने मैन्हु केरे ज़िरिये मेरी निन्दा केरतां ज़ोवरूए, कि बड़े रथ नेइतां अवं पहाड़ां केरि च़ोटन पुड़, बल्के लबानोनेरे मझ़ाटे तगर च़ेढ़तां एवरोईं, ते अवं तैसेरे उच्‍चे-उच्‍चे गैइड़न ते रोड़े-रोड़े सनोवर बुट केट्टी छ़डेलो; ते तैसेरे दूर-दूरेरे उच्‍चे ठारन मां ते तैस मां जंगलेरे फल देने बैली बागन मां दाखल केरेलो। 25 मीं त खुहां घड़ेइतां पानी पियूं; ते मिस्र मुल्खेरे नहरन मां पव रखते तैना शुकेई छ़ेडी। 26 कुन तीं नईं शुनोरू, कि पुराने ज़माने करां लेइतां मीं एन थापेरू आहे ते पुराने ज़माने करां इसेरी तियारी कियोरी थी? ते पुराने ज़माने इसेरी तियारी कियोरीए, तैन हुनी मीं पूरू भी कियोरूए, कि तू क़िले बाले नगर भी खण्डर ही खण्डर केरस, 27 इस्से वजाई सेइं तैन केरे रानेबालां केरि ताकत घेटी जेई; तैना डेरि जे ते शरमिन्दे भोए; तैना मैइदानेरे निक्‍के-निक्‍के बुट्टन ते सब्ज़ घासेरे ते लाए पुड़ेरे घासेरे ते एरे अन्नेरे ज़ेरे भोइ जे, ज़ैन बेडोने करां पेइलू शुक्‍की गाते।

28 "‘पन अवं त तेरू बिशनू, ते अग्रोवं गानू, ते वापस एजनू ज़ानताईं; ते इन भी कि तू मीं पुड़ अपनो क्रोध भड़कातस। 29 एस वजाई सेइं कि तू मीं पुड़ अपनो क्रोध भड़कातस तेरे घमण्डेरी गल्‍लां मेरे शुन्ने मां एवरिन; अवं तेरे नक्‍के मां अपनि नकेल छ़ेडतां ते तेरे ऐशी मां अपनि लगाम लेइतां, ज़ैस बत्तां तू एवरोस, तैस्से बत्तां तीं वापस भेज़ेलो।’

30 "यशायाह नेबे हिजकिय्याह राज़े सेइं ज़ोवं, तेरे लेई ई निशान भोल्हो, कि इस साल तुस ज़ैन अपने आपे उगे तैन खाएले, ते दूइयोवं साले तैस ज़ैन पैदा भोल्हु तैन खाएले; ते ट्लेइयोवं साले बीज़ बेले ते फसल केट्टी बटेले, ते दाछ़री बागां लाले ते तैन केरो फल खेइ बटेले। 31 ते यहूदारे घरानेरे बच़ोरे लोक फिरी ज़ील छ़डेले ते फलेले; 32 किजोकि यरूशलेम नगरे मरां बच़ोरे ते सिय्योन पहाड़ेरे नश्शोरे लोक निसेले। यहोवा इन कम अपने जलनी सेइं केरेलो।

33 "एल्हेरेलेइ यहोवा अश्शूरेरे राज़ेरे बारे मां इन ज़ोते कि तै यरूशलेम नगरे मां दखल न भोइ बटेलो, बल्के इस पुड़ अक तीर भी न मैरी बटेलो, तै न त ढाल नेइतां एसेरे सामने एज्जी बटेलो, ते न एसेरे खलाफ दमदमो बेन्धी बटेलो। 34 बल्के ज़ैस बत्तां तै एवरो, तैस्से बत्तां तै वापस भी गालो, ते इस नगरे मां दाखल न भोइ बटेलो, यहोवा एन ज़ोते। 35 किजोकि अवं अपने खातर ते अपने दास दाऊदे सेइं कियोरे करारेरे वजाई इस नगरेरी हिफाज़त केरतां बच़ेइलो।"

सन्हेरीब राज़ेरी हार ते मौत

36 होरसां झ़ेझ़ां यहोवारो स्वर्गदूत निस्तां अश्शूरी सेनारे डेरन मां 185000 सिपाही मारे, ते झ़ेझ़ां ज़ैखन लोक उठे, तैखन कुन हेरन, कि लाशां ही लाशां पेवरिन। 37 तैखन अश्शूरेरो राज़ो सन्हेरीब वापस च़लो जेव, ते नीनवे नगरे मां राने लगो। 38 एक्सां तैड़ी तै अपने मन्दरे मां निस्रोक देबतेरी पूज़ा केरने लगो, कि तैसेरे मट्ठेईं अद्रम्मेलेक ते शरेसेरे तै तलवारी सेइं मरो, ते अरारात प्रदेशे जो नेश्शी जे। तैखन तैसेरू अक होरू मट्ठू एसर्हद्दोन तैसेरी जगाई पुड़ राज़ो बनू।