1 मिस्रेरे बारे मां नबूवत। "हेरा, यहोवा लूशी उडरने बाली बिदलारी पुड़ च़ेढ़तां मिस्रे मां एज्जी राहोरोए। ते मिस्रेरी मूरती तैसेरे एजने सेइं हिलने लग्गेली, ते मिस्री लोकां केरो दिल डरे सेइं पानी-पानी भोइ गालो।✝ 2 यहोवा ज़ोते, अवं मिस्री लोकन एक्‍की होरेरे खलाफ खड़े केरेलो, ते तैना एप्पु मांमेइं लड़ेले, हर अक अपने ढ्लाए सेइं ते अपने पड़ोसी सेइं लड़ेलो, नगर-नगरे मां ते रियासती-रियासती मां जंग छ़िड़ी गाली।✝ 3 ते मिस्री लोकां केरि अक्ल च़ली गाली ते तैना ज़ैन भी केरनेरे लेई सोचेले अवं तैन बेकार केरेलो; ते तैना एपनी मूरतन कां ते जैदूगिरन ते मन्ट्लां देनेबाले ते टूनो केरनेबाले कां गेइतां पुछ़ेले; 4 पन अवं मिस्री लोकन एक्‍की सखत राज़ेरे हथ्थे मां केरि देलो; ते अक सखत राज़ो तैन पुड़ हुकूमत केरेलो।" सेना केरे यहोवारू एन्ने ज़ोनूए।

5 तैखन नील दरियाए पानी शुक्‍की गालू, तै दरिया खाली भोइ जेव; 6 ते तैसेरे नाले मरां मुशक च़लेली, ते मिस्रेरी नहरां भी शुक्‍की गैली, ते निरैठी ते लम्मो-लम्मो घास भी शुक्‍की गालो। 7 नील दरिया उज़ड़ी गालो आसे-पासेरो घास भी शुक्‍की गालो ते ज़ैन किछ नील दरियाए कां बेव गालू तैन शुकतां खतम भोइ गालू, ते तैसेरो पतो भी लग्गेलो। 8 तैना सारे मेछ़ली ट्लानेबाले ज़ैना नील दरियाए मां मेछ़ली ट्लानेरे लेई कंटे छ़डतन, तैना मातम केरेले ते ओशा छ़डेले, ते ज़ैना पैनी पुड़ जाल छ़डतन, तैना उदास भोइ गाले। 9 फिरी ज़ैना लोक मिस्रे मां सने सेइं कम केरतन, तैना मायूस भोइ गाले, ते सूते सेइं बुनतन तैन केरि उमीद ट्लूटी गाली। 10 मिस्रेरे सारे अमीर त परेशान ते तैसेरे सब मज़दूर उदास भोल्हे।

11 सोअन नगरेरे हाकिम पक्‍के बेवकूफन, फ़िरौनेरे अक्लमन्द सलहकारां केरि योजना जानबरां केरि ज़ेरि ठहरी। फिरी तुस फ़िरौने सेइं केन्च़रे ज़ोई सकतथ कि अवं अक्लमन्दा केरू मट्ठू ते पुराने राज़ां केरि औलाद आईं? 12 हे मिस्रेरे राज़ा तेरे अक्लमन्द लोक कोड़ि आन? सेना केरे यहोवा मिस्रेरे बारे मां ज़ै योजना बनेवरीए, अगर तैस तैना ज़ानते भोन त तीं सेइं ज़ोन।✝ 13 सोअन नगरेरे हाकिम बेवकूफ बेनि जेवरेन, ते नोप नगरेरे हाकिमेईं धोखो खेवरोए; ते ज़ैन पुड़ मिस्रेरे प्रधानेईं भरोसो रखोरो थियो, तैनेईं मिस्र टपलव। 14 यहोवा तैन मां गड़बड़ी छ़डोरीए; तैनेईं मिस्र तैसेरे सारे कम्मन मां तैन मसत भोवरे लोकां केरो ज़ेरो कियोरोए ज़ैना उलटी केरते थरकतन। 15 ते मिस्रेरे लेई कोई एरू कम न रालू ज़ैन क्रोड़ी या पौंछ़ड़े करां ते कने खजूरेरे डैलड़न या निरैठन सेइं भोइ सके।

16 तैस मौके मिस्री लोक कौन्शां केरे ज़ेरे डेरि गाले, ते सेना केरो यहोवा अपनो हथ तैन केरे खलाफ खड़ो केरेलो, त तैना डेरतां थरकेले। 17 ते यहूदा प्रदेश मिस्रेरे लेई इड़ी तगर डरेरी वजा भोल्हो कि ज़ै कोई तैसेरी गल शुनेलो तैस थर्क लग्गेली; सेना केरे यहोवारे योजनारो एहे फल भोल्हो ज़ै मिस्री केरे खलाफ भोल्हो।

18 तैस मौके मिस्र मुल्खे मां पंच़ नगर भोल्हे ज़ैना कनानेरी भाषा केरेले ते यहोवारी कसम खाएले। तैन मरां एक्‍केरू नवं नाश नगर रख्खू गालू।

19 तैस मौके मिस्र मुल्खे मां यहोवारे लेई अक वेदी भोल्ही, ते तैसेरी सरहद्दी तगर यहोवारे लेई अक खम्भो खड़ो भोल्हो। 20 तै मिस्र मुल्खे मां सेना केरे यहोवा परमेशरेरे लेई अक निशान ते शहादत भोल्हो; ते फिरी तैना अंधेर केरनेबालां केरि वजाई सेइं यहोवा कां मद्दतरे लेई फरियाद केरेले, तैखन तै तैन कां अक छुटानेबालो ते तैन केरि हिफाज़त केरनेबालो भेज़ेलो, ते तैन आज़ाद केरेलो। 21 तैखन यहोवा मिस्री लोकन पुड़ अपनो आप बांदो केरेलो; ते तैना तैस मौके यहोवा पिशानेले ते मेलबलि ते अन्नबलि च़ैढ़तां तैसेरी आराधना केरेले, ते यहोवा कां मिन्नत मेगतां तैस पूरी भी केरेले। 22 ते यहोवा मिस्री लोकन सज़ाह देलो, तै सज़ाह भी देलो ते बझ़ालो भी, तैना परमेशरेरे पासे फिरेले ते तै तैन केरि प्राथना शुनेलो ते तै बझ़ालो।

23 तैस मौके मिस्रेरां अश्शूरे तगर गानेरी अक सड़क भी भोल्ही, ते अश्शूरी मिस्रे मां एज्जेले ते मिस्री लोक अश्शूरे जो गाले, ते मिस्री लोक अश्शूरी लोकन सेइं मिलतां यहोवारी आराधना केरेले।

24 तैस मौके इस्राएल, मिस्र ते अश्शूर ट्लाईए मुल्खां केरे लोक मिलतां धेरतरे लेई बरकतरो ज़िरियो बनेले। 25 किजोकि सेना केरो यहोवा तैन ट्लेइने एन ज़ोइतां बरकत देलो, धन भोए मेरी प्रजा मिस्र, ते मेरो बनेवरो अश्शूर, ते मेरो अपनो हिस्सो इस्राएल।