यशायाह 10

1 अफ़सोस तैन पुड़ ज़ैना बुरैई सेइं न्याय केरतन, ते तैन पुड़ ज़ुलम केरनेरो हुक्म लिखतां जारी केरतन, 2 कि तैना कंगालां केरो न्याय बिगाड़न, ते मेरे गरीब लोकां केरू हक़ मारन, ते विधवा कौन्शन लुटतन ते अनाथां केरे माले पुड़ कब्ज़ो केरन! 3 तुस तैस सज़ारे दिहाड़े ते तैस मुसीबतरे दिहाड़े ज़ै तुसन पुड़ दूरेरां एज्जेली तेइस कुन केरेले? तुस मद्दतरे लेई कैस कां दौड़ते गाले? ते अपनि धन-दौलत छ़ुपेइतां कोड़ि रखेले?✝10:3 अय्यू. 31:14;1 पत. 2:12. 4 तैना सिर्फ कैदी लोकां केरे पव्वन पुड़ेरां खड़े न भोल्हे, ते लाशां पेवरी रहेली। फिरी भी यहोवारो क्रोध ठंडो न भोव ते तैसेरो हथ हुना तगर भी तैन केरे खलाफ खड़ोए।

अश्शूरेरू घमण्ड

5 अश्शूरे पुड़ अफ़सोस, ज़ै मेरे क्रोधेरी लट्ठ ते मेरे हथ्थेरी सोटीए! तैसेरे ज़िरिये अवं अपनो क्रोध हरेइलो। 6 अवं तैस एक्‍की भक्ति न केरनेबैली कौमरे खलाफ भेज़ेलो, ज़ैन लोकन पुड़ मेरो क्रोध भड़कोरोए तैन केरे खलाफ अवं तैन हुक्म देलो कि तैना थुसोड़तां लुटन ते तैन बत्तरी च़िकरारे ज़ेरे ढ्लेन्च़तां छ़डन। 7 पन अश्शूरेरी मर्ज़ी न भोल्ही, ते न तैसेरे मने मां एरहो खियाले, किजोकि तैसेरे मने मां एन्ने कि अवं केही कौमां केरो नाश ते खातमो केरतां छ़ेडी। 8 किजोकि अश्शूरेरो राज़ो घमण्डे सेइं ज़ोते, "कुन मेरे सारे हाकिम राज़ेरे ज़ेरे नईं? 9 कुन कलनो नगर कर्कमीश नगरेरू ज़ेरू नईं? कुन हमात नगर अर्पाद नगरेरू ते सामरिया दमिश्क नगरेरू ज़ेरे नईं? 10 ज़ेन्च़रे मीं मूरतन सेइं भेरतां तैन रियासतन पुड़ कब्ज़ो कियो, ज़ैन केरि मूरती यरूशलेम ते सामरियारे मूरतन करां जादे थी, ते ज़ैस तरीके सेइं मीं सामरिया ते तैसेरी मूरतन सेइं कियूं, 11 त कुन अवं यरूशलेम ते तैसेरी मूरतन सेइं भी एरहो सलूख न केरेलो?"

अश्शूरे पुड़ न्याय

12 एल्हेरेलेइ ज़ैखन प्रभु सिय्योन पहाड़े ते यरूशलेम नगरे मां अपनु सारू कम केरेलो, तैखन तै अश्शूरेरे राज़ेरी घमण्डेरी गल्‍लां केरो ते तैसेरी घमण्डी एछ़्छ़ी केरो बदलो देलो। 13 तैनी ज़ोवरूए, "मीं एपनी पेखड़ी केरि ताकती सेइं ते एपनी अक्ली सेइं एन कम कियोरूए, किजोकि अवं अक्लमन्द आईं, मीं मुल्ख-मुल्खेरी हद हटेवरीए, ते तैन केरू रखेरू धन लुटेरूए; मीं बहादरेरे ज़ेरे गेद्दी पुड़ बिशने बाले उसाले। 14 मुल्खे-मुल्खेरे लोकां केरि धन-दौलत, च़ुड़ोलू केरे आल्हां केरि ज़ेरि, मेरे हथ्थे मां अई, ते ज़ेरो कोई शारोरे ठूलन अकोट्ठे केरते तेन्च़रे मीं सारी धरती अकोट्ठी कियोरीए; ते कोई फंघां फड़फड़ाने बालो या च़ुंच़ खोलने बालो या चीं-चीं केरनेबालो न थियो।"

15 कुन मैक्‍कु अपने कटनेबाले करां जादे ताकतबर भोइ सखते? या आरो अपने च़लाने बालेरे खलाफ डांकां मैरी सखते? या सोटो अपने च़लानेबाले छ़ुई सखते, या लट्ठी सेइं छ़ूए ज़ै लकड़ी नईं। 16 एल्हेरेलेइ सेना केरो प्रभु तैस राज़ेरे ताकतबर जंग लड़नेबाले सिपेहिन कमज़ोर केरेलो, ते तैसेरी शान-ओ-शोकती हैठ अग्गरी ज़ेरि जलन भोल्ही। 17 इस्राएलेरे यहोवारी लौए अग बेनि गाली, ते इस्राएलेरो पवित्र परमेशर लप बनेलो; ज़ै एक्‍की दिहाड़े मां तैसेरो सारो कूड़ो चट केरतां छ़डेलो। 18 ते ज़ेन्च़रे अक मरीज़ कमज़ोर भोते, तेन्च़रे ऐह अग तैसेरे जंगलन ते फलदार बागां केरि शोभा पूरे तरीके सेइं नाश केरेलो। 19 तैस जंगले मां थोड़े ज़ेरे बुट बाकी राले, ज़ैन अक निकड़ू मट्ठू भी गेनतां लिखी सखेलू।

इस्राएलेरे किछ बच़ोरे लोकां केरि वापसी

20 तैस मौके इस्राएलेरे बच़ोरे लोक ते याकूबेरे घरानेरे नश्शोरे लोक अपने मारनेबाले अश्शूरी सेना पुड़ फिरी कधे भरोसो न केरेले, पन यहोवा ज़ै इस्राएलेरो पवित्र परमेशरे, तैस्से पुड़ सच़्च़ैई सेइं भरोसो रखेले। 21 बाकी बच़ोरे लोक महान परमेशरेरे पासे वापस एज्जेले। 22 किजोकि हे इस्राएल, अगर तेरे लोक समुन्दरेरे रेतरे ज़ेरे बड़े जादे किना भोन, फिरी भी पक्‍कू आहे कि तैन मरां सिर्फ बच़ोरे लोक वापस एज्जेले। नाश त पूरे न्याय सेइं थापोरूए। 23 किजोकि प्रभु सेना केरे यहोवा अपने इरादेरे मुताबिक सारो मुल्ख बरबाद केरनो थापोरोए।✝10:23 रोम. 9:27-28.

परमेशर अश्शूरे सज़ाह देलो

24 सेना केरो यहोवा एन ज़ोते, "हे मेरे लोकव तुसां ज़ैना सिय्योने मां रहतथ, अश्शूरे करां न डेरथ, चाए तै तुसन डण्डे सेइं कि न बाहे, ते तुश्शे खलाफ लट्ठ ट्लाए, ज़ेन्च़रे मिस्री लोकेईं कियोरू थियूं। 25 किजोकि हुनी लूशी मेरी जलन ते सरक तैसेरो सत्यानाश केरतां शान्त भोल्ही। 26 सेना केरे यहोवा तैस्सेरे खलाफ कोड़े सेइं मारेलो, ठीक तेन्च़रे ज़ेन्च़रे ओरेब नंव्वेरे चट्टानी पुड़ मिद्यानी लोक मारोरे थिये, ते ज़ेन्च़रे तैनी मिस्री केरे खलाफ एपनी सोटी सेइं समुन्दरे पुड़ बाहोरी थी; तेन्च़रे तैसेरे खलाफ भी केरेलो।✝10:26 न्या. 7:24-25. 27 तैस वक्ते एरू भोल्हु कि तेरे कंधन पुड़ेरां तैसेरो बोझ, ते तेरे मेट्टू पुड़ेरां तैसेरू जियूं उठाव गालू, ते अभिषेक भोनेरे वजाई सेइं तैन जुऊं ट्लोड़ू गालू।"

अश्शूरेरी सेनारो हमलो

28 अश्शूरेरी सेना अय्यात नगरे मां हमलो कियोरोए, ते मिग्रोन नगरे मांमेइं भोइतां अग्रोवं च़ेलि जेवरीए; ते तैनेईं मिकमाश नगरे मां अपनु सामान रखोरूए। 29 तैना वैदी मरां पार जे, तैनेईं गेबा नगरे मां रात कट्टी; रामाह नगरेरे लोक डेरि जे, शाऊल राज़ेरे गिबा नगरेरे लोक नेश्शी जे। 30 हे गल्‍लीम नगरेरे लोकव चिन्डां मारा! हे लैशा नगरेरे लोकव ध्यान देथ! ओ बेचारे अनातोत नगरेरे लोकव! 31 मदमेना नगरेरे लोक नेश्शी जे, ते गेबीम नगरेरे रानेबाले नशनेरे लेई अपनु-अपनु सामान अकोट्ठू केरि राहोरेन। 32 अज़्ज़ेरे दिहाड़े अश्शूरेरी सेना नोब नगरे मां राली, ते सिय्योन पहाड़े पुड़ यानी यरूशलेमेरे पहाड़ेरे पासे अपनो हथ खड़े केरतां धमकाली।

33 हेरा, सेना केरो यहोवा बुट्टन भयानक रूपे सेइं छ़िमपेलो, बड्डे-बड्डे बुट कट्टे गाले, ते ज़ैना उच्‍चे आन तैना उन्ढे किये गाले। 34 तै घने जंगले मैक्‍कु सेइं कटेलो ते लबानोन एक्‍की प्रतापी एरे हथ्थे सेइं नाश कियो गालो।