1 आमोसेरे मट्ठे यशायाह नेबेरू दर्शन, ज़ैन तैस यहूदा प्रदेश ते यरूशलेम नगरेरे लोकां केरे बारे मां उज्जियाह, योताम, आहाज, ते हिजकिय्याह नंव्वेरे यहूदा प्रदेशेरे राज़ां केरे राज़ केरनेरे वक्ते मां मैल्होरू थियूं।

2 हे आसमान शुन, ते हे धरती ध्यान दे, किजोकि यहोवा ज़ोते, "मीं बाल बच्‍चे पाले, ते तैना बडाए भी, पन तैना मेरे खलाफ भोए। 3 दांत त अपने मालिके पिशानते, ते गधो ज़ानते कि तैसेरो मालिक तैस कोड़ि खुवालो, पन इस्राएली लोक मीं न पिशानन, मेरे लोक किछ भी न समझ़न।"

4 अफ़सोस, ऐह कौम केत्री पापीए! ऐह समाज अधर्मे सेइं भेरतांए! एस वंशेरे लोक केत्रे कुकर्मी आन, एना बाल बच्‍चे केत्रे बिगड़ोरेन! तैनेईं यहोवा शारोरोए, तैनेईं इस्राएलेरो पवित्र परमेशर घटिया समझ़ोरोए! एना बखले बेनतां दूर भेवरेन।

5 तुसां बगावत केरतां किजो जादे यहोवा करां सज़ारे हकदार बन्ने चातथ? तुश्शी क्रोड़ी ज़खमेईं सेइं भेरतांए, ते तुश्शो दिल दुखे सेइं भेरतांए। 6 पव्वां केरे तले करां लेइतां च़ोटोलू तगर कोन्च सहेत नईं, सिर्फ ज़खम ते कोड़ेरे मारारे निशान ते शड़ोरे ज़खमन, ज़ैना न त धोए जे, न बन्धे जे, ते न तैन पुड़ ज़ैतूनेरो तेल मेलतां नर्म किये जे। 7 तुश्शो मुल्ख दुश्मनेईं उज़ाड़ोरोए, तुश्शे नगर अग लेइतां भस्म कियोरेन। परदेशी लोक तुश्शे सामने तुश्शे ऊडारां केरि फसल बरबाद केरतन। तैना परदेशी केरे नाश कियोरे मुल्खेरे ज़ेरे उज़ड़ोरेन। 8 सिय्योनेरी कुई *दाछ़री बागी मां झोफड़री ज़ेरि शारी जेवरीए, ते कैकड़ी केरे उडारेरे छपरेरी ज़ेरि भोवरीए, या घिरोरे नगरेरी ज़ेरि अकैल्‍ली खड़ीए। 9 अगर सेना केरो यहोवा इश्शे लेई किछ लोकन ज़ींते न रखेथो, त असां भी सदोम ते गमोरा* नगरां केरे ज़ेरे नाश भोथे।✝ 10 हे सदोम नगरेरे ज़ेरे दुष्ट हाकिमव यहोवारू वचन शुना! हे गमोरा नगरेरे ज़ेरे कुकर्मी लोकव, इश्शे परमेशरेरे कानूने पुड़ ध्यान देथ।✝ 11 यहोवा एन ज़ोते, "तुश्शी एत्री मेलबलि मेरे कोस कम्मेरी आन? अवं त हुड़ां केरि होमबेलेईं सेइं ते पालोरे जानबरां केरि चेर्भी सेइं खुश नईं; अवं बछ़ड़न या गबड़न या थाव्वां केरे खूने सेइं खुश न भोईं। 12 ज़ैखन तुसां मीं कां आराधना केरनेरे लेई मेरे भवने मां एइतथ, त तैखन एन कौन चाते कि तुसां मेरे अंगन्न अपने पांवेइं सेइं ढ्लेन्च़थ? 13 बगैर मतलबेरी अन्नबेलि न आनां; गुग्गले सेइं त मीं नफरते। नंव्वे चाँदेरी दिहाड़ी ते थैकरी दिहाड़ी मनानी, ते सभां केरो प्रचार केरनो, मीं बड़ो बुरो लगते। ते महासभान सेइं साथी-साथी अनर्थ कम केरनू मीं करां बरदाशत न भोए। 14 तुश्शे नंव्वे चाँदेरां तिहारां ते तुश्शे ठहरावरे तिहारन सेइं अवं नफरत केरताईं, तैन सब मेरे लेई अक बोझ बेनि जेवरन, अवं तैन बरदाशत केरते-केरते थेकी जेवरोईं। 15 ज़ैखन तुस मेरे पासे प्राथना केरनेरे लेई अपने हथ फैलाले, तैखन अवं तुश्शे पासे ध्यान न देइलो; चाए तुस ज़ेत्री प्राथना किना न केरथ, अवं तुश्शी प्राथना न शुनेलो; किजोकि तुश्शे हथ बेकसूर लोकां केरे खूने सेइं भेरोरेन।✝ 16 अपनो आप धोइतां पवित्र केरा: मेरी एछ़्छ़ी केरे सामनेरां अपना बुरां कम्मां दूर केरा। अग्रोवं जो बुराई केरनी शारा,✝ 17 भलियाई केरनी शिखा; लोकां केरो न्याय केरा, ज़ुलम केरनेबाले सुधारा, अनाथां केरो न्याय केरा ते विधवा कौन्शां केरो मुकदमो लड़ा।" 18 यहोवा एन ज़ोते, "एज्जा असां मिलतां गल-बात केरम: तुश्शे पाप चाहे लाल रंगेरे कि न भोन, फिरी भी तैना हिंवेरे ज़ेरे छ़ित्ते सुफेद भोइ गाले; ते चाहे गूड़े लाल रंगेरे कि न भोन, फिरी भी तैना उन्ना केरे ज़ेरे छ़ित्ते भोइ गाले। 19 अगर तुस हुक्म मन्नेबाले बेनतां मेरी मन्नथ, 20 त तुसां इस मुल्खेरी रोड़ी-रोड़ी चीज़ां खाएले। पन अगर तुसां न मन्नेले ते बगावत केरेले, त तुसां तलवारी सेइं मारे गाले। यहोवारू एन्ने ज़ोनूए।"

21 ज़ै नगरी वफादार थी तै केन्च़रे बदचलन भोइ जेई! तै न्याय सेइं भेरतां थी ते तैस मां धार्मिकता थी, पन हुनी तैस मां खूनी आन। 22 तेरी चाँदी मेली भोइ जेवरीए, ते तेरे दाछ़रे रस्से मां पानी मिली जेवरूए। 23 तेरे हाकिम बगावत केरनेबाले ते च़ोरन सेइं मिलोरेन। तैना सारे रिश्पत खानेबाले भेवरेन, ते तोफां केरे लालच़ी आन। तैना अनाथ लोकां केरो न्याय न केरन, ते विधवा कौन्शरो मुकदमो एप्पु कां एजने न देन।

24 एल्हेरेलेइ प्रभु सेना केरो यहोवा, इस्राएलेरे शक्तिमानेरू एन ज़ोनूए: "शुना, अवं अपने दुश्मन्न करां बदलो नेइलो ते अपने दुश्मन दूर केरतां आराम केरेलो। 25 अवं अपनो हथ खड़ो केरतां तुश्शो मैल पूरे तरीके सेइं भस्म केरेलो ते तुश्शी अशुद्धता पूरे तरीके सेइं दूर केरेलो। 26 अवं तुसन मां पेइलेरे ज़ेरे न्यायी ते पेइलेरे ज़ेरे तेरे मंत्री फिरी च़ुनेलो। तैसेरां बाद तींजो धर्मपुरी ते वफादार नगरी ज़ोले।"

27 सिय्योन न्यायेरे ज़िरिये, ते ज़ैना तैस मां बुरैई करां फिरेले तैना धार्मिकतारे ज़िरिये छुटाए गाले। 28 पन बगावत केरनेबाले ते पापी लोक अकोट्ठे नाश भोल्हे, ज़ैनेईं यहोवा शारोरोए, तैन केरो खातमों भोइ गालो। 29 किजोकि ज़ैन बंज़ेरे बुट्टां केरि पूज़ा तुस खुशी सेइं केरते थिये, तैन करां तुस शरमिन्दा भोल्हे, ते ज़ैन बागन मां तुस मूरती पूज़ा केरते थिये, तैन केरि वजाई सेइं तुश्शां तुत्तरां कालां भोल्हां। 30 किजोकि तुस तैन बंज़ेरे बुट्टां केरे ज़ेरे भोल्हे, ज़ैन केरां पट्लां शुकतन, ते बगैर पैनेरे बागरे ज़ेरे भोइ गाले। 31 तुसन मां ज़ैना शक्तिशाली आन सनेरे ज़ेरे ते तैन केरे हथ्थां केरि बनेवरी मूरती च़िंगारी ज़ेरि भोल्ही, ते तैना दूईये साथी फुकोई गाले, ते तैन कोई हिशेई न बटेलो।