1 दर्शनेरे वैदरे* बारे मां सन्देश। तुसन कुन भोवं कि सारे लान पुड़ च़ेढ़ी जेवरे भोन, 2 हे हंगामे ते शौरी सेइं भरोरी नगरी? तीं मां ज़ैना मर्रोरेन तैना न त तलवारी सेइं ते न लड़ैई मां मारे जेवरेन। 3 तेरे सारे राज़ केरनेबाले अकोट्ठे नश्शोरेन ते तैना बगैर धनुषे कैदी बनाए जेवरेन। तेरे ज़ेत्रे बाकी राए जे अकोट्ठे कैदी बनाए जे, अगर तैना दूर नश्शोरे थिये। 4 एल्हेरेलेइ मीं ज़ोवरूए, "मीं करां दूर भोथ मीं ज़ोरे-ज़ोरे लेरां देने देथ; मेरे लोक नाश भोनेरे दुखे मां मीं तसल्‍ली देनेरी कोशिश न केरा।"

5 किजोकि सेना केरे प्रभु यहोवारी ठहरावरी दिहाड़ी भोल्ही, ज़ैखन दर्शनेरी वैदी मां हंगामो ते ढ्लेन्च़ू गानू ते बेचैनी भोल्ही; शहरपनाही मां सुरंग लाई गाली ते मद्दतरे लेई फरियाद पहाड़न तगर पुज़ेली। 6 एलामेरे सिपाही घोड़न पुड़ सुवार भोइतां धनुष ते तीर घिन्तां एवरेन, ते कीर नगरेरे सिपाही ढालां घिन्तां तियारन। 7 तेरी खूबसूरत वैदी रथ्थन सेइं भेरतां भोल्ही ते सुवार फाटकां केरे सामने मोरच़ो लेइतां बिशोरेन। 8 तैने यहूदारू घुंघट खोल्‍लू। तैस दिहाड़े तीं बन नंव्वेरे भवनेरे हथियार याद किये।

9 ते तीं दाऊदपुरेरे* शहरपनाहरी दरज़ां लेही कि तैना बेड़ी आन, ते तीं बुनीयें पैनेरू कुण्डू अकोट्ठू कियूं। 10 ते यरूशलेम नगरेरे घरां गेनतां शहरपनाह मज़बूत केरनेरे लेई घरां डोलतां छ़डां। 11 तीं दूई दिवारां केरे मझ़ाटे अक कुण्ड बनाव। पन तीं तैसेरो बनानेबाले परमेशरेरे पासे ध्यान न दित्तू, ज़ैनी पेइलो तै ठहरेइतां रखोरोए, ते न तैसेरे पासे तीं नज़र की।

12 तैस मौके सेना केरे प्रभु यहोवा लेरां देने ते पिटने ते टिन्ड बनाने ते टाट लानेरे लेई ज़ोवं; 13 पन हेरू कि खुशी ते आनन्द मनाने लगोरेन, गोरू ते गब्बां मारने लगोरेन, मास खाने ते दाछ़रो रस पीने लगोरेन। ते ज़ोतन, "एज्जा खाम-पीम, किजोकि कालां त असेईं मरनू आहे।"✝ 14 सेना केरे यहोवा एप्पु मीं सेइं ज़ोवरूए, "तुश्शे मरनेरे दिहाड़े तगर एस पापेरो हरज़ानो न भोल्हो," सेना केरे प्रभु यहोवा एन मीं सेइं ज़ोवरूए।

15 सेना केरो प्रभु यहोवारू एन ज़ोनूए: "गा मेहलेरे मुख्तियार शेबना सेइं ज़ो, 16 ‘तू कौन आस? ते इड़ी तेरो कौने कि तीं अपनि कब्र इड़ी घड़ावरीए ते रानेरी ठार चट्टानी मां घड़ावरीए? 17 हेर, यहोवा तीं बेड़ी ताकती सेइं ट्लेइतां दूर शैरतां छ़डेलो। 18 यहोवा तीं मोड़तां बालेरो ज़ेरो लम्मे चौड़े मुल्खे मां शैरतां छ़डेलो; हे अपने मालिकेरे घराने शरमिन्दा केरनेबाले तैड़ी तू मरेलो ते तेरे शान-ओ-शोकतरे रथ तैड़ी रेई गाले। 19 अवं तीं तेरी ठारी पुड़ेरां कढेलो, ते तू अपने पदे पुड़ां हटव गालो। 20 तैस मौके अवं अपने दास हिल्किय्याहेरे मट्ठे अपने दास एलयाकीमे कुजेइतां तेरो अंगरखो लुवेइलो, 21 ते तैसेरे लख्खे मां तेरो कमरबन्ध केस्तां बन्धेलो, ते तेरी हुकूमत तैसेरे हथ्थे मां देलो। ते तै यरूशलेमेरे रानेबाले ते यहूदारे घरानेरो बाजी भोल्हो। 22 अवं दाऊदेरे घरानेरी चाबी तैसेरे कंधे पुड़ रखेलो, ते तै खोलेलो ते होरो कोई बन्द न केरि बटेलो ते न कोई बन्द केरि सकेलो।✝ 23 ते अवं तैस मज़बूत ठारी पुड़ खीलेरो ज़ेरो खूब डोबतां छ़डेलो, ते तै अपने बाजी केरे घरानेरे लेई इज़्ज़तरी वजा भोल्हो। 24 ते तैसेरे बाजेरे घरानेरी सारी शान-ओ-शोकत, खानदाने ते औलादी, सब निक्‍कां-निक्‍कां भांडां, कुन कुटोरे कुन गेड़बी, सब तैस पुड़ टेंगतां छ़डेले। 25 सेना केरे यहोवारू एन ज़ोनूए कि तैस मौके तै खीलो ज़ै मज़बूत ठारी पुड़ डोबतां छ़डोरो थियो, तै ढिल्‍लो भोइ गालो, ते केटतां बुछ़ोड़तां छ़डेले; ते तैस पुड़ेरो बोझ बिछ़ड़ी गालो, किजोकि यहोवा एन ज़ोवरूए।’"