यशायाह 25

यहोवारी तारीफ़ केरा

1 हे यहोवा, तू मेरो परमेशरस; अवं तेरी तारीफ़ केरेलो, अवं तेरे नंव्वेरू शुक्र केरेलो। किजोकि तीं चमत्कार कियोरेन, शुरू मरां केरनेरो पूरे सच़्च़ैई सेइं इरादो कियोरो थियो। 2 तीं दुश्मना केरे नगर ढेर बनेइतां छ़डे, ते तैन क़िले बालू नगर उज़ाड़ु; ते परदेशी केरि राज़ कुइयां एन्च़रे उज़ैड़ी कि तैन नगर न राव; तैन फिरी कधी बसाव न गालू। 3 एल्हेरेलेइ तैन ताकतबर मुल्खां केरे लोक तेरी तारीफ़ केरेले; ते बड़े ज़ालम कौमां केरे नगरन मां तेरो डर मन्नो गालो। 4 किजोकि तू गरीबां केरे लेई मुसीबती मां गढ़, ते ज़ैखन भयानक लोकां केरो झोंको दिवारी पुड़ तूफानेरो ज़ेरो भोतो थियो, तैखन तू गरीबां केरे लेई छ़पनेरी ठार, ते गेर्मी मां छावरी ठार भोइ। 5 ज़ेन्च़रे बेरान मुल्खे मां बिदलारारी छाव सेइं गर्मी ठंडी भोतीए तेन्च़रे तू परदेशी केरि नरमी ते सखत लोकां केरू जयजयकार बन्द केरतस।

यहोवारे ज़िरिये धाम तियार

6 सेना केरो यहोवा इस पहाड़े*25:6 पहाड़े सिय्योन पहाड़ पुड़ सेभी मुल्खां केरे लोकां केरे लेई एरी धाम तियार केरेलो, ज़ैड़ी बड़ू रोड़ू मास ते पुरानी दाछ़रो रस भोल्हो। 7 ते ज़ै पड़दो सेभी मुल्खां केरे लोकन पुड़ पेवरोए, ज़ैन घुंघट सब कौमन पुड़ लटकोरूए, तैस तै इस्से पहाड़े पुड़ हटालो।✝25:7 इफि. 4:18. 8 यहोवा मौती हमेशारे लेई नाश केरेलो, ते सेभी लोकां केरे एछ़्छ़ी केरां ऐंखरू पूंछ़ेलो, ते अपने लोकां केरि बदनामी सारे धेरती पुड़ां खतम केरतां छ़डेलो, किजोकि यहोवा एन्च़रे ज़ोवरूए।✝25:8 1 कुरि. 15:54;प्रका. 7:17;21:4.

9 तैस मौके एन लोक एन ज़ोले, "हेरा, इश्शो परमेशर ईहीए; असां एस बलगते एवरेम, कि ऐह असन छुटकारो दे। यहोवा ईहीए; असां एस बलगते एवरेम। असां तैस करां छुटकारो हासिल केरतां मघन ते खुश भोमेले।"

यहोवा मोआब मुल्खे सज़ाह देलो

10 किजोकि इस पहाड़े*25:10 पहाड़े सिय्योन पहाड़ पुड़ यहोवारो हथ हमेशा तगर बनोरो रालो, पन मोआब मुल्ख अपने ठैरी मां एरहो ढ्लन्च़ो गालो ज़ेन्च़रे गोबरे मां भूंस ढ्लन्च़ो गालो। 11 तै तैस मां अपने हथ एन्च़रे सेइं खिलारेलो, ज़ेन्च़रे कोई तारी देंते बार फैलाते; पन तै तैसेरे घमण्डे ट्लोड़ेलो; ते तैसेरी च़लाकी बेफल केरेलो। 12 तैसेरी उच्‍ची-उच्‍ची मज़बूत शहरपनाहन तै बिछ़ोड़ेलो, बल्के मित्ती मां मिलालो।