1 तैन दिहाड़न मां हिजकिय्याह राज़ो एत्रो बिमार भोइ जेव कि मरने बालो थियो, ते आमोसेरे मट्ठे यशायाह नेबी तैस कां गेइतां ज़ोवं, "यहोवा एन ज़ोते, कि अपने घराने ज़ै हुक्म देनो भोए तै दे; किजोकि तू बिमैरी करां न बच़ेलो बल्के मेरि गालो।" 2 तैखन हिजकिय्याह दिवारारे पासे तुत्तर फिरेइतां यहोवा कां प्राथना केरतां ज़ोवं, 3 "हे यहोवा! याद केर। कि अवं तेरी हज़ूरी मां वफादैरी सेइं ते साफ मने सेइं च़लतो एवरोईं; अवं तैन केरतो एवरोईं ज़ैन तीं रोड़ू लगते।" तैखन हिजकिय्याह बेड़ि लेरां देने लगो। 4 तैखन यहोवा यशायाह नेबी सेइं ज़ोवं, 5 "वापस गेइतां हिजकिय्याह सेइं ज़ो, कि तेरे पूर्वज दाऊदेरो परमेशर यहोवा इन ज़ोते, ‘मीं तेरी प्राथना शुनी ते तेरां ऐंखरू हेरां; एल्हेरेलेइ हेर, अवं तेरी उमर 15 साल बधेइलो, 6 ते अश्शूरेरे राज़ेरे हथ्थे मरां तीं ते एस यरूशलेम नगरे बच़ेइलो।’"

7 ते यहोवा अपने ज़ोवरे वचने पूरे केरेलो, 8 ते यहोवारी तरफां एस गल्‍लरे तेरे लेई ऐह निशान भोल्हो कि धुप्पारी छाव ज़ै आहाज राज़ेरे धुप्पारी घड़ी ढेली जेवरीए, अवं दश अंश पत्रोवं केरेलो। ते तै छाव ज़ै ढेली जेवरी थी वापस जेई।

9 यहूदारे राज़े हिजकिय्याह तारीफ़रू गीत ज़ैन तैनी लिखू कि ज़ैखन तै बिमार भोइतां ठीक भोव, तैन इन आहे;

10 मीं सोचोरू थियूं, अवं अपने अधे उमरी मां अधलोकेरे फाटकन मां दाखल भोइलो,

किजोकि मेरी बाकी उमर यहोवा नेवरीए।✝

11 मीं ज़ोवं, अवं फिरी यहोवा ज़ींतां केरे दुनियाई मां न लेही बटेलो;

इस दुनियारे लोकन अवं फिरी न लेही बटेलो।

12 मेरू घर पुहालेरे डेरेरू ज़ेरू बुछ़ोड़तां छ़डेरूए,

मीं ज़ुलाहेरी ज़ेरि अपनि ज़िन्दगी पलेटतां छ़डोरीए;

तै मीं ताँती करां कटेलो;

एक्सां तू मेरो अन्त केरतां छ़डेलो।

13 अवं झ़ेझ़ां तगर अपने मने शान्त केरतो* राव;

परमेशर मेरे हेड्डन शेरेरो ज़ेरो ट्लोड़ते

एक्सां तू मेरो खातमो केरतां छ़डेलो।

14 अवं च़ुड़ोली या सारसेरो ज़ेरो चीं-चीं केरतो, अवं कबूतरेरो ज़ेरो मातम केरताईं।

मेरी एछ़्छ़ी उबरे तेक्‍की-तेक्‍की थेकी जेवरिन।

हे यहोवा मीं पुड़ ज़ुलम भोइ राहोरोए; तूए परमेशर मेरो सहारो बन!

15 पन अवं कुन ज़ोईं? परमेशरे मीं सेइं वाधो कियो ते पूरो भी कियो।

अवं अपने इस दुखेरे वजाई सेइं बल्हे-बल्हे च़लतो रालो।

16 हे प्रभु, एन्ने गल्‍लन सेइं लोक ज़ींते आन, ते इन सेभन सेइं मेरी आत्माई ज़िन्दगी मैलतीए।

तू मीं चंगाई दे ते मीं ज़ींते रख।

17 हेर, ज़ै तकलीफ मीं झ़लोरीए, सच़्च़े तै मेरे लेई रोड़ी निस्सी,

पन तीं प्यार केरतां अवं नाश भोनेरे खड्डे मरां कढो।

किजोकि तीं मेरे सारे पाप माफ़ कियोरेन।

18 किजोकि अधलोके मां मुड़दे तेरू शुक्र न केरि सखन, ते न तैना तेरी तारीफ़ केरि सखन;

ज़ैना कब्री मां भोतन तैना तेरी वफादैरारी उमीद न रेखी सखन।

19 ज़ींते, हाँ ज़ींते तेरू शुक्र केरतन, ज़ेन्च़रे अवं अज़ लगोरोइं केरने;

बाजी तेरी वफादैरारी खबर अपने मट्ठन देतन।

20 यहोवा मेरो छुटकारो केरेलो, एल्हेरेलेइ असां ज़िन्दगी भर यहोवारे भवने मां

तारधार बाज़न पुड़ तेरां गीतां ज़ोंते रहमेले।

21 यशायाह नेबे ज़ोवरू थियूं, "फैगू केरि अक टिकी बनेइतां हिजकिय्याहेरे फोड़े पुड़ लाथ, तैखन तै बच़ेलो।" 22 तैखन हिजकिय्याहे यशायाह पुछ़ोरू थियूं, "एसेरो कुन निशान भोल्हो कि अवं यहोवारे भवने मां फिरी गेइ बटेलो?"