1 आमोसेरे मट्ठे यशायाह नेबे यहूदा प्रदेश ते यरूशलेम नगरेरे लोकां केरे बारे मां इन दर्शन लाव: 2 एक्‍की दिहाड़े भोल्हु कि यहोवारे भवनेरू पहाड़ सेभी पहाड़न पुड़ मज़बूत कियूं गालू, ते सेभी पहाड़न करां उच्‍चु कियूं गालू। ते दुनियारे सारे लोक पैनेरे गड्डां केरे ज़ेरे तैसेरे पासे एज्जेले। 3 ते बड़े मुल्खां केरे लोक एज्जेले, ते एक्‍की होरि सेइं ज़ोले: "एज्जा, असां यहोवारे पहाड़े पुड़ च़ेढ़तां, याकूबेरे परमेशरेरे भवने मां गाम; तैखन तै असन अपनि बत्तां शिखालेलो, ते असां तैसेरी बत्तन पुड़ च़लमेले।" किजोकि यहोवारो कानून सिय्योने मरां, ते तैसेरू वचन यरूशलेम नगरे मरां निसेलू।✝ 4 यहोवा कौमां-कौमां केरो न्याय केरेलो, ते मुल्खे-मुल्खेरे लोकां केरो झगड़ो मिटालो। ते तैना एपनी तलवारां झ़ुसतां हली जो फाल ते भाले झ़ुसतां ड्लेती बनाले; तैखन अक कौम होरि कौमरे खलाफ तलवार न च़लाली, ते एजने बाले वक्ते मां लोक जंग केरनी शिखेले।✝

5 हे याकूबेरे घरानेरे लोकव, एज्जा, असां यहोवारी लोई मां च़लम।

6 हे यहोवा, तीं अपने लोक याकूबेरो घरानो शारोरोए, किजोकि तैना अपने दादे पड़दादां केरे तरीके पुड़ तने मने सेइं च़लतन ते पलिश्ती केरे ज़ेरे एजनेबालो वक्त ज़ान्नेरे लेई जैदू केरो इस्तेमाल केरतन, ते पूर्वी मुल्खां केरे लोकां केरि रीतन अपनातन। 7 इस्राएल मुल्ख सोन्ने चैंदी सेइं भरपूरे, ते तैन केरे रखोरे धनेरी कोई हद नईं। तैन केरे मुल्खे मां बेहिसाब घोड़ेन, ते तैन केरां रथां बड़े जादे थियां। 8 पन तैन केरो मुल्ख मूरतन सेइं भेरतांए; ते तैना अपने हथ्थां केरि बनेवरी मूरतन कां मथ्थो टेकतन। ज़ैना तैनेईं अपने एंगलोयन सेइं बनेवरिन। 9 तैन कां लोक झुकतन, ते बड़े मैन्हु उन्ढे किये जे, एल्हेरेलेइ तैन माफ़ न केर! 10 यहोवारे डरेरे वजाई सेइं ते तैसेरी महिमारे प्रतापे सेइं चट्टानी मां छ़ेप्पी गा, ते मित्ती मां छ़ेप्पी गा।✝ 11 किजोकि न्यायेरे दिहाड़े घमण्डी मैन्हु केरि एछ़्छ़ी उन्ढी की गैली ते हर मैन्हेरू घमण्ड दूर कियूं गालू। ते तैस दिहाड़े सिर्फ यहोवा उच्‍ची जगाई पुड़ बिशोरो भोल्हो।

12 किजोकि सेना केरे यहोवारी दिहाड़ी सेभी घमण्डी लोकन पुड़ ते क्रोड़ी खड़ी केरनेबालन पुड़ ते तरक्‍की सेइं घमण्ड केरनेबालन पुड़ एज्जेली। ते तैना झुकाए गाले। 13 ते लबानोनेरे सेभी गैइड़न पुड़ ज़ैना उच्‍चे ते बड्डेन; 14 बाशानेरे सेभी बंज़ेरे बुट्टन पुड़; ते सब उच्‍चे पहाड़न ते सेभी उच्‍ची पहैड़न पुड़; 15 ते सेभी उच्‍चे गुम्मटन पुड़ ते सेभी उच्‍ची नगरेरी दिवारन पुड़; 16 तर्शीशेरे सेभी समुन्दरी ज़िहाज़न पुड़ ते समुन्दरेरी सेभी खूबसूरत किश्तन पुड़ तै दिहाड़ी एइतीए। 17 मैन्हेरू अहंकार मिटव गालू, ते मैन्हेरू घमण्ड नाश कियूं गालू; ते तैस दिहाड़े सिर्फ यहोवारी इज़्ज़त की गाली। 18 ते सब मूरती नष्ट की गैली। 19 ज़ैखन यहोवा धेरती हिलानेरे लेई खड़ो भोल्हो, तैखन तैसेरे डरेरे वजाई सेइं ते तैसेरी महिमारे प्रतापे सेइं लोक चिट्टानां केरे कुढन मां ते धेरतरे गत्तन मां छ़ेप्पी गाले।

20 तैस दिहाड़े लोक अपनि चाँदी ते सोन्नेरी मूरती ज़ैना तैनेईं पूज़ा केरनेरे लेई बनेवरी थी, छछून्दरन, ते रैइतोकन कां शैरी छ़डेले। 21 ज़ैखन यहोवा धेरती हिलानेरे लेई खड़ो भोल्हो, तैखन तैना तैसेरे डरेरे वजाई सेइं ते तैसेरी महिमारे प्रतापे सेइं चिट्टानां केरि दरज़न मां ते पहैड़ी केरे गत्तन मां छ़ेप्पी गाले। 22 एल्हेरेलेइ मैन्हु पुड़ भरोसो केरनो छ़ेडी देथ, ज़ेसेरी सांस नक्‍के मांए: किजोकि तैसेरी कीमत आहे कुन?