यशायाह 35

परमेशरेरी महिमा लेइहोली

1 सुनसान जगाह ते बेरान ठारां खुशी भोल्ही, सुनसान जगाह मघन भोइतां केसरेरी ज़ेरि फुलेली। 2 तै बड़ी खुशी भोल्ही ते आनन्दे सेइं जयजयकार केरेली। तैसेरी शोभा लबानोन पहाड़ां केरि ज़ेरि भोल्ही ते तै कर्मेल ते शारोनेरी ज़ेरि शान भोइ गाली, ते तैना यहोवारी शोभा ते इश्शे परमेशरेरी महिमा हेरेले।

परमेशरेरे ज़िरिये बदलाव ते फल

3 कमज़ोर हथ्थन मज़बूत केरा ते थरकते ज़ैंधन मज़बूत केरा।✝35:3 इब्रा. 12:12. 4 घबराने बालन सेइं ज़ोथ, "हिम्मत केरा, डरा न! हेरा, तुश्शो परमेशर सज़ाह देने ते फल देने एज्जी राहोरोए। हाँ, परमेशर एइतां तुसन बच़ालो।"

5 तैखन कांने लाहेले ते टोंवने शुनेले। 6 तैखन टोन्टे भी हिरनेरी ज़ेरि छालां मारेले ते लट्टे एपनी ज़िभी सेइं जयजयकार केरेले। किजोकि सुनसान ठारी मां पैनेरे नाग निस्सेले ते सुनसान ठैरी मां पैनेरे दरिया बगेले;✝35:6 मत. 11:5;यशा. 41:17-18. 7 गर्म रेती बाली ज़मीन मां पैनेरे तालाब बेनि गाले ते खुशक ज़मीनी मां पैनेरे नाग बगेले; ते ज़ैड़ी पेइलां गिद्दां बिशतां थियां तैड़ी घास ते नरकट निरैठी भोल्ही।

परमेशरेरी पवित्र सड़कां

8 तैड़ी अक सड़क भोल्ही, ज़ैस जो पवित्र सड़क ज़ोले, ते कोई अशुद्ध मैन्हु तैस बत्तां न च़ेलि बटेलो तै बत सिर्फ धर्मी लोकां केरे लेई भोल्ही ते बेवकूफ लोक तैस बत्तां न च़ेलि बटेले। 9 तैड़ी शेर न भोल्हो ते न कोई हमलो केरनेबालो जानबर तैस बत्तां च़ैढ़ी सकेले ते न तैना तैड़ी भोल्हे, सिर्फ तैना लोक तैस बत्तां सफर केरेले ज़ैन गुलैमी मरां छुटकारो मैल्होरोए। 10 ते यहोवारे छुटेवरे लोक वापस एइतां जयजयकार केरते सिय्योने मां एज्जेले; ते तैन केरे दोग्गे पुड़ हमेशारो आनन्द भोल्हो; तैना खुशी ते आनन्दे हासिल केरेले ते तैन केरे दुखेरो अन्त भोल्हो।✝35:10 प्रका. 21:4.