1 यहोवा याकूबेरे कुले* पुड़ महरबानी केरेलो, फिरी एक्‍की फेरे इस्राएली लोकन च़ुनेलो, ते तैन्ना केरे अपने मुल्खे मां बसालो, परदेशी तैन सेइं मिली गाले, ते अपने आपे याकूबेरे घराने सेइं मिलाले। 2 मुल्खे-मुल्खेरे लोक तैन्न, तैन केरे ठारी पुज़ाले, ते इस्राएलेरो घरानो यहोवारी ज़मीनी पुड़ तैन अधिकारी बनेइतां तैन दास ते दैसी बनालो; किजोकि तैना अपने गुलैमी मां नेनेबालन गुलाम बनाले, ते ज़ैना तैन पुड़ ज़ुलम केरते थिये, तैन पुड़ तैना राज़ केरेले।

3 ज़ैस दिहाड़े यहोवा परमेशर तीं तकलीफ, घबराहट ते सखत ज़ुलमेरे गुलैमी करां आज़ाद केरेलो। 4 तैस मौके तू बाबेलेरे राज़े सेइं तानो मैरतां ज़ोलो, "ज़ुलमे सेइं गुलामी कराने बालो तू केन्च़रे नाश भोइ जेवरोस, सोन्नेरे मन्दरन सेइं भरोरी नगरी केन्च़रे नाश भोइ! 5 यहोवा दुष्टां केरि सोटी ते बे न्याय सेइं राज़ केरनेबालां केरि लट्ठ ट्लोड़ी छ़डी, 6 ज़ैस सेइं तैना क्रोधे मां एइतां लोकन लगातार मडते रहते थिये, ते कौमन पुड़ क्रोध केरतां लगातार तैन सताते थिये। 7 पन हुनी सैरी धेरतरे लोकन आराम मैल्होरोए, तैन चैने; लोक ज़ोरे सेइं गीतां ज़ोने लगोरेन। 8 सनोवर बुट ते लबानोनेरे गैइड़ेरे बुट खुशी भोइतां तीं सेइं ज़ोतन, ‘ज़ेइसेरो तू बिछ़ोड़ोरोस, तैखन करां असन कटने कोई नईं एवरो।’ 9 पाताले हैठ अधलोके मां तीं सेइं मिलनेरे लेई हलचल भोइ राहोरीए; तै तेरे लेई मुड़दन मतलब धेरतरे सब प्रधान्न बींझ़ाते, ते तै कौमां-कौमां केरे सब मरोरे राज़न तेरे सुवागतेरे लेई तखते पुड़ेरां खड़े कराते। 10 तैना सब तीं सेइं चिन्डां मैरतां ज़ोले, ‘कुन तू भी इश्शो ज़ेरो कमज़ोर भोवरोस? कुन तू इश्शो ज़ेरो बेनि जेवरोस?’ 11 तेरी सारी शान-ओ-शोकत तेरी सैन्गी केरि आवाज़ अधलोके मां छ़डी जेई, हुनी कीड़े तेरू बिछ़ान ते धरतमल तेरू छ़ुंहूं आन।"

12 "हे झ़ेझ़ेरे चमकने बाले तारां* तू केन्च़रे अम्बरेरां बिछ़ड़ोरोस? ज़ै कौमी-कौमी हारातो थियो, तू केन्च़रे केटतां ज़मीनी पुड़ बिछ़ड़ोरोस?✝ 13 तू अपने मने मां ज़ोतो थियो, ‘अवं सुर्गे मां च़ेढ़ी गालो अवं अपनो तखत परमेशरेरे तारन करां उच्‍चो बनेइलो; अवं उत्तरेरे पासे बन्ने पुड़ सभारे पहाड़े पुड़ बिशेलो;✝ 14 अवं बिदलारी करां भी जादे उच्‍चो च़ैढ़ी गालो, अवं परमप्रधान परमेशरेरो ज़ेरो बेनि गालो।’ 15 पन तू पाताले मां तैस खडेरो ज़ेरो उसालो गालो। 16 ज़ैना मुड़दे तेरे पासे तकेले तेरे पासे तेकतां तेरे बारे मां सोचतां ज़ोले, ‘कुन ऐह तैए मैन्हुए, ज़ै धेरती सुखे सेइं राने न थियो देतो ते रियासतन मां घबराहट छ़डतो थियो; 17 ज़ै दुनियाई जंगल बनातो ते तैसेरे नगरन बुछ़ोड़तो थियो; ते अपने कैदन घरे गाने न थियो देतो?’ 18 दुनियारे सब राज़े एपनी-एपनी शाही कब्री मां आरामे सेइं पेवरेन; 19 पन तू एक्‍की शल्हेरो ज़ेरो अपने कब्री मरां बेइरोवं शैरी छ़डो; ते तू लाशन हैठ घिरोरोस, तैन केरि लाशन हैठ ज़ैना तलवारी सेइं मारे जेवरेन, ज़ैना गत्तेरे घोड़न मां बिछ़ड़ोरेन, एक्‍की ढ्लेन्च़ोरी लाशरे ज़ेरे पेवरेन। 20 तू बाकी राज़ां केरो ज़ेरो कब्री मां दब्बो न जेव, किजोकि तीं अपनो मुल्ख उज़ाड़ोरोए, तीं अपने प्रजारे लोक मारोरेन। कुकर्मी लोकां केरे वंशेरू कधे कोई नवं न घिन्नेलो। 21 तैन केरे दादे-पड़दादां केरे अधर्मेरे वजाई सेइं तैन केरे मट्ठन मारनेरी तियारी केरा, एरू न भोए कि तैना फिरी उठतां धेरतरे अधिकारी भोइ गान, ते दुनियाई मां बड़े नगर बसान।"

22 सेना केरे यहोवारू एन ज़ोनूए, "अवं बाबेलेरे खलाफ खड़ो भोल्हो, ते तैन केरो नामो निशान मिटेइतां छ़डेलो, ते मट्ठन पोट्लड़न केटतां छ़डेलो।" यहोवारू एन ज़ोनूए। 23 "अवं तैस बुल्‍लू केरो अड्डो ते पैनेरी झीलां बनेइतां छ़डेलो, ते तैस सत्यानाश केरनेरी धूनी देइतां छ़डेलो" सेना केरे यहोवारू एन ज़ोनूए।

24 सेना केरे यहोवा ऐह कसम खेवरीए, "सच़्च़े ज़ैन मीं सोचोरूए, तेरहु भोल्हु, ते ज़ेरि मीं योजना बनेवरीए, तेन्च़रे भोल्हु, 25 कि अवं अश्शूरे अपने मुल्खे मां नाश केरेलो, ते अपने पहाड़न पुड़ ढ्लेन्च़तां छ़डेलो; तैखन इस्राएली लोकां केरू जियूं तैन केरे मेट्टू पुड़ेरां ते तैन केरो बोझ तैन केरे कंधन पुड़ेरां उतारेलो।" 26 ऐह योजना सैरी दुनियारे लेई ठहराई जेई; ते ऐह तैए हथ्थे ज़ै सैरी कौमन सज़ाह देनेरे लेई खड़ो कियोरोए। 27 किजोकि सेना केरे यहोवा योजना बनेवरीए, ते तैस कौन टैली सखते? ते तैनी हथ खड़ो कियोरोए, ते तैस कौन रोकी सखते?

28 ज़ैस साले मां आहाज राज़ो मेरि जेव तैस्से साले मां ऐह नबूवत भोइ,

29 "हे सारे पलिश्ती लोकव तुस एल्हेरेलेइ आनन्द न केरा, कि तुश्शे मारने बालेरी लट्ठ ट्लुटी जेवरीए, किजोकि सप्पे सेइं अक कालो नाग पैदा भोल्हो, तैसेरो फल अक उज़ाड़ने बालो भोल्हो ते तै बड़े ज़ेरहे बालो भोल्हो। 30 तैखन कंगालां केरां बड्डां मट्ठां खालां ते गरीब लोक निडर भोइतां बिश्शी बटेले, पन अवं तेरे खानदाने ढ्लुखी सेइं मैरेलो, ते तेरे बच़ोरे लोक मारे गाले। 31 हे फाटक, तू अफ़सोस! अफ़सोस! केर; हे नगर, तू शोर केर! हे पलिश्तीन तू गेली गा! किजोकि उत्तरेरे पासेरां तू निसेलो ते तैसेरी सेनाई मरां कोई पत्रोवं न रालो।"

32 तैखन कौमां-कौमां केरे दूतन कुन जुवाब दित्तो गालो? एन कि "यहोवाए सिय्योनेरी बुनीयाद रख्खोरीए, ते तैसेरी प्रजारे गरीब लोक तैस मां छ़पेले।"