1 यहोवा इन ज़ोते, "ज़ैनेईं मेरे बारे मां पुछ़ोरू भी नईं तैना मीं तोप्पने बाले भेवरेन, ज़ैना मीं तोपते भी न थी अवं तैन मैल्ही जेव, ते ज़ै कौमी जो मेरी न थी ज़ोते; तैस सेइं भी अवं ज़ोताईं, ‘हेरा, अवं हाज़र आईं।’" 2 अवं एक्‍की ज़िद्दी कौमरे लोकां केरे पासे सैरी दिहैड़ी हथ फैलेइतां खड़ो राव, ज़ैना अपने बुरे कम्मां केरे मुताबिक बुरी बत्तां च़लतन।✝ 3 एरे लोक, ज़ैना मेरे सामने बागन मां मूरतन कां बलि च़ैढ़ी-च़ैढ़तां ते इट्टन पुड़ गुग्गल बैलतां, मीं लगातार सरकातन। 4 एना कब्रन पुड़ बिशतन ते छ़पनेरी ठारी पुड़ रात गुज़ारतन; ज़ैना सूरेरू मास खातन, ते भिट्टी चीज़ां केरो रस अपने भांडन मां रखतन। 5 ते एक्‍की होरि सेइं ज़ोतन, "दूर भोथ, मीं कां नेड़े न एज्जा, किजोकि अवं पवित्र आईं।" एना मेरे नक्‍के मां तूएरे ज़ेरे ते तैस अग्गरे ज़ेरेन ज़ै सैरी दिहैड़ी बलती रहतीए।

6 यहोवा ज़ोते, "ऐह गल मेरे सामने लिखोरीए; अवं च़ुप न रेइलो, अवं सच़्च़े बदलो देइलो बल्के तुश्शे ते तुश्शे दादे-पड़दादां केरे अधर्मेरे कम्मां केरो बदलो तुसन देइलो। 7 किजोकि तैनेईं पहाड़न पुड़ गुग्गल बालो ते पहैड़न पुड़ मेरी निन्दा की, एल्हेरेलेइ अवं यहोवा ज़ोताईं, पेत्रीं कम्मां केरि सज़ाह अवं एन देइलो।"

8 यहोवा एन ज़ोते, "ज़ैस तरीके दाछ़रे कोन्ची घोन्छ़े मां नंव्वो दाछ़रो रस भेरोई गाते, तैखन लोक ज़ोतन, एस बरबाद न केर, किजोकि तैस मां बरकते, एस्से तरीके अवं अपने दासां केरे लेई एन केरेलो कि सेभन नाश न केरेलो। 9 अवं याकूबे मरां अक वंश, ते यहूदा मरां अपने पहाड़ां केरे लेई अक बारस पैदा केरेलो; मेरे च़ुनोरे तैसेरे बारस भोल्हे, ते मेरे दास तैड़ी राले। 10 मेरे लोक ज़ैना मीं तोपतन, तैन केरां गब्बां शारोने मां च़रेलां, ते तैन केरां गोरू आकोर नंव्वेरे वैदी मां आराम केरेलां। 11 पन ज़ैना तुसां यहोवा करां दूर भोतथ ते मेरे पवित्र पहाड़े बिसरी गातथ, ते किस्मतां केरे देबतेरे लेई मेज़े पुड़ खानेरी चीज़ां सज़ातन, ते तकदीरां केरे देबतेरे लेई मसालो मिलावरो दाछ़रो रस भरतथ; 12 अवं तुसन गेनि-गेनि तलवारारे हवाले केरि देइलो, ते तुसां सब मरनेरे लेई झुकी गाले; किजोकि मीं ज़ैखन तुसन जो आवाज़ दित्ती ते तुसेईं जुवाब न दित्तो; ज़ैखन मीं हक़ दित्ती, तैखन तुसेईं मेरी न शुनी; बल्के ज़ैन मीं बुरू लगते तैन्ने तुसेईं लगातार कियूं, ते ज़ैन मीं रोड़ू न लग्गे, तैन्ने तुसेईं कियूं।"

13 एल्हेरेलेइ यहोवा परमेशर एन ज़ोते; मेरे दास खाएले, पन तुसां नियन्ने राले; मेरे दास पीले, पन तुसां ट्लिशोरे राले; मेरे दास आनन्द केरेले, पन तुसां शरमिन्दे भोल्हे; 14 हेरा, मेरे दास खुशी सेइं जयजयकार केरेले, पन तुसां दुखेरे मारे चिन्डां मारेले ते हाय! हाय! केरेले। 15 मेरे च़ुनोरे लोक तुश्शी मसाल देइ-देइ तुसन श्राप देले, ते प्रभु यहोवा तुसन नाश केरेलो; पन अपने दासां केरू नंव्वू नवं रखेलो।✝ 16 तैखन सारे मुल्खे मां ज़ै कोई अपने-आपे जो धन ज़ोलो तै सच़्च़े परमेशरेरू नवं घिन्तां अपने-आपे जो धन ज़ोलो, ते ज़ै कोई मुल्खेरी कसम खालो तै सच़्च़े परमेशरेरे नंव्वेरी कसम खालो; किजोकि पेत्रियों दुख दूर भोइ जेव ते तै मेरी एछ़्छ़न करां दूर भोइ जेवरोए।

17 "किजोकि हेरा, अवं नंव्वू अम्बर ते नंव्वी धरती पैदा केरताईं; पेइली गल्‍लां याद न रहेली ते सोच विचारे मां भी न एज्जेली।✝ 18 एल्हेरेलेइ ज़ैन किछ अवं बनाने बालोईं, तैसेरी वजाई सेइं हमेशा मघन राथ ते खुशी मनाथ, किजोकि अवं यरूशलेमे खुशी ते अपने लोकन सेइं मघन केरेलो। 19 अवं यरूशलेमेरे वजाई सेइं मघन ते अपने लोकन सेइं खुश भोइलो; ते तैस मां लेरां केरि आवाज़ फिरी कधे न शुनोली।✝ 20 तैड़ी फिरी कधे एरहो बच्‍चो न भोल्हो ज़ै थोड़े दिहाड़े ज़ींतो राए; ते बुढो अपनि पूरी उमर खेइतां मरेलो ज़ै 100 केरो भोइतां मारेलो, पन ज़ै मैन्हु 100 सालन करां पेइलो मरेलो तै श्रापित समझ़ो गालो। 21 तैना घरां बनेइतां तैन मां बस्सेले; ते दाछ़री बागां लेइतां तैन केरो फल खाएले। 22 एरू न भोल्हु कि तैना बनान ते होरे तैन मां बस्सन; या तैना लान, ते होरे खान; किजोकि मेरी प्रजारे लोकां केरी उमर बुट्टां केरि भोल्ही, ते मेरे च़ुनोरे लोक अपने कम्मां केरो पूरो फैइदो उठाले। 23 तैन केरि मेहनत बेकार न भोल्ही, ते न तैन केरे बच्‍चे घबराटरे लेई पैदा न भोल्हे, किजोकि तैना यहोवारे धन लोकां केरू खानदान ठहरेले, ते तैन केरे बच्‍चे तैन करां अलग न भोल्हे।✝ 24 तैन केरे प्राथनाई करां पेइले अवं तैन जुवाब देइलो, तैना हेजू ज़ोते भोल्हे त अवं तैन केरि शुनेलो। 25 गिद्दां ते गबड़ां अकोट्ठे च़रेले, ते शेर दांतेरो ज़ेरो घास खालो; ते सप मित्ती खालो। ते मेरे पवित्र सिय्योन पहाड़े पुड़ न त कोई कोन्ची दुख देलो ते न केन्चेरो नुकसान केरेलो, यहोवारू एन्ने ज़ोनूए।"