1 हुनी अवं अपने ट्लारे ते तैसेरी दाछ़री बागरे बारे मां गीत ज़ोइलो: मेरे बड़े फल दाने बाले पहैड़ी पुड़ मेरे ट्लारेरी अक दाछ़री बाग थी। 2 तैनी तैसेरी मित्ती घड़ी ते तैस मरां घोड़ अलग किये ते तैस मां खूब रोड़ी किसमेरी दाछ़ लाई; तैनी तैस मां पेरहो देनेरे लेई अक कूड़ी बनाई, ते दाछ़रो रस कढनेरे लेई अक कुण्ड भी बनावं; तैखन तैनी दाछ़री उमीद रखी, पन तैस मां बेकार दाछ़ां लेग्गी।

3 हुनी मेरो ट्लारो यहोवा ज़ोते, हे यरूशलेमेरे रानेबालव ते हे यहूदारे लोकव, मेरे ते मेरी दाछ़री बागरे बारे मां न्याय केरा। 4 मेरी दाछ़री बागरे बारे मां हुनी कुन केरनू रेई जेवं ज़ैन मीं तैसारे लेई न कियोरू भोए? फिरी कुन वजा भोइ कि मीं दाछ़री उमीद रखी ते तैस मां अमली दाछ़ लग्गी?

5 हुनी अवं तुसन सेइं ज़ोताईं कि एपनी दाछ़री बागी सेइं कुन केरेलो। अवं तैसारो कंटन बालो बाड़ पुटतां छ़डेलो कि तैस मां जानबर एज्जन, अवं तैसारे डंख भी डोलतां छ़डेलो कि तै ढ्लेन्च़ी गाए। 6 अवं तैस उज़ैड़तां छ़डेलो; न तैस फिरी छ़िमपेले ते न तैस निदेलो ते तैस मां किसमे किसमेरे कंटन बाले बुट लग्गेले; ते अवं बिदलारी भी हुक्म देलो कि तैस पुड़ झ़ड़ी न बखेली।

7 किजोकि सेना केरे यहोवारी दाछ़री बाग इस्राएलेरो घरानो, ते तैसेरो ट्लारो पौदो यहूदारे लोकन; तैनी तैन मां न्यायेरी उमीद रखी पन अन्याये लेइहोते; तैनी धार्मिकतारी उमीद रखी, पन तैस चिन्डां केरि शोरे शुनोतीए!✝

8 अफ़सोस तैन पुड़ ज़ैना घरे सेइं घर, ते उडारे सेइं ऊडार एड़ी तगर मिलातन कि थोड़ी ज़ेरि भी ठार न बंच़े, कि तुसां लोक मुल्खे मां अकैल्‍ले रेई गाथ। 9 सेना केरो यहोवा मीं इन ज़ोते शुनो: "सच़्च़े बड़ां घरां सुनसान भोइ गालां, ते बड़ां-बड़ां ते खूब रोड़ां घरां भी उज़ड़ी गालां।✝ 10 किजोकि दश बीघे बागी मरां 8 लीटर दाछ़रो रस मैल्हेलो, ते 100 किल्‍लो बीज़े सेइं सिर्फ 10 किल्‍लो अन्नेरी पैदावार निसेली।"

11 अफ़सोस तैन पुड़ ज़ैना झ़ेझ़ां उठतां नशो केरने शुरू भोतन ते एध्धी राती तगर शराब पीते रहतन; एड़ी तगर कि शराबरे नशे मां खूब मसत न भोइ गान! 12 तैन केरि धामन मां सितार, सारंगी, डफली, ते बेइशोई ते शराब, एन सब किछ तैस मां मैलते; पन तैना यहोवारे कम्मां केरे पासे ध्यान न देन, ते तैसेरे हथ्थां केरे कम्मन पुड़ ध्यान न देन।

13 एल्हेरेलेइ मेरे बारे मां ज्ञान न भोनेरे वजाई सेइं मेरे लोक गुलैमी मां च़ले गातन, तैन केरे इज़्ज़तदार मड़द ढ्लुखी सेइं मरतन ते आम मैन्हु ट्लिशी सेइं परेशान भोतन। 14 एल्हेरेलेइ पाताले बड़ी खुवैइश रेखतां अपनु आशी एत्रू खोलोरूए, कि तैन केरू वैभव ते भीड़ ते आनन्द केरनेबाले सब तैसेरे ऐशी मां गातन। 15 आम लोक दबाए गातन ते बड़े लोक पस्त किये गातन, ते अभिमानी लोकां केरि एछ़्छ़ी उन्ढी भोइ गैतिन। 16 पन सेना केरो यहोवा न्याय केरनेरे वजाई सेइं बड़ो महान ठहरते, ते पवित्र परमेशर धर्मी भोनेरे वजाई सेइं पवित्र ठहरते! 17 तैखन गबड़ां ज़ेन्च़रे कि अपने उडारे मां च़रेलां, पन सझ़रां केरि उज़ड़ोरी ठारां परदेशी लोकन च़ारनेरे लेई मैल्हेली।

18 अफ़सोस तैन पुड़ ज़ैना अधर्मे ज़ुलमेरे रेस्सन सेइं ते पापे ज़ेन्च़रे कि गेड्डी पुड़ खिचतां आनतन, 19 ज़ैना ज़ोतन, "तै जल्दी केरे ते अपनु कम लूशी केरे कि असां तैस हेरम; ते इस्राएलेरे पवित्र परमेशरेरी योजना बांदी भोए, तै नेड़े एज्जे कि असां तैस समझ़म!"

20 अफ़सोस तैन पुड़ ज़ैना बुरे जो भलू ते भले जो बुरू ज़ोतन, ज़ैना आंधरे जो लौ ते लौई जो आंधरू ज़ोतन, ते ट्लिठे मिट्ठू ते मिट्ठे ट्लिठू मनतन!

21 अफ़सोस तैन पुड़ ज़ैना अपनो आप एपनी नज़री मां ज्ञानी ते अक्लमन्द समझ़तन!✝

22 अफ़सोस तैन पुड़ ज़ैना शराब पीने मां ज़ोरेबाले ते शराब तेज़ बनाने मां बहादरन, 23 ज़ैना रिश्पत खेइतां दुष्ट लोकन बेकसूर, ते बेकसूरन दोषी करार केरतन!

24 इस वजाई सेइं ज़ेन्च़रे अग्गरी लप्पी सेइं शुकोरो भूंस चट भोइ गाते ते शुकोरो घास अग्गरी लप्पी सेइं फुकोई गाते, तेन्च़रे तैन केरू ज़ील भी शेड़ि गालू ते तैन केरां फूड़ू धूड़ बेनतां उडरी गालां; किजोकि तैनेईं सेना केरे यहोवारो कानून निकम्मो समझ़ो, ते इस्राएलेरे पवित्र परमेशरेरू वचन घटिया समझ़ू। 25 एस वजाई सेइं यहोवारो क्रोध अपने लोकन पुड़ भड़कोरोए, ते तैनी अपनो हथ अग्रोवं रेखतां तैना मारोरेन, पहाड़ां हिलने लगां; ते लोकां केरि लाशां कूड़ेरी ज़ेरि तल्‍ले मां पेवरिन। एत्री सज़ाह देने पुड़ भी तैसेरो क्रोध शान्त न भोवं ते तैनी हथ अग्रोवं कियोरोए।

26 यहोवा दूरे-दूरेरी कौमां केरे लेई झण्डो खड़ो केरेलो, ते सीटी मैरतां तैन धेरतरे होरे पासेरां कुजालो; ते हेरा, तैना लूशी-लूशी यरूशलेमे जो च़ले एज्जेले! 27 तैन दुश्मन सेना मां न कोई थकोरो भोल्हो ते न कोई ठोकर खालो; तैन मां कोई डिगरी देनेबालो या झ़ुलने बालो नईं, केन्चेरू मझ़ न खुल्‍लू, ते केन्चेरे बूटां केरे तसमे न ट्लुटे; 28 तैन केरे तीर शुद्ध ते तैन केरे धनुषे पुड़ च़ाढ़ोरेन, तैन केरे घोड़ां केरे सोन्ने चकमकेरे ज़ेरेन, ते तैन केरे रथां केरे पेइहे ऐंधरे ज़ेरेन। 29 तैना शेर या जुवान शेरेरे ज़ेरे गरज़तन ते शिकार ट्लेइतां नेश्शी गातन, ते तैन करां कोई न छुटेई बटे। 30 तैस मौके तैना तैन पुड़ समुन्दरेरे ज़ेरे गरज़ेले, ते अगर कोई तैस मुल्खे पुड़ नज़र दे, त तैस अंधकार ते मुसीबत लेइहोली, ते लौ काले बिदलारी सेइं छ़ेप्पी गाली।