1 हे जज़ीरन पुड़ रानेबाले लोकव, मेरी गल ध्याने सेइं शुना; हे दूर-दूर रियासतां केरे लोकव, ध्यान देइतां मेरी गल्‍लां शुना! यहोवाए अवं गर्भे मरां कुजेवरोईं, ज़ैखन अवं अम्मरे पेटे मां थियो, तैखन तैनी मेरू नवं ज़ोवरूए।✝ 2 तैनी मेरू आशी तिख्खी तलवारारू ज़ेरू बनेवरूए, ते अपने हथ्थेरी आड़ी मां अवं छ़ुपावरोईं; तैनी अवं चमकतो तीर बनेइतां अपने तरकशे मां छ़ुपेइतां रख्खो। 3 ते मीं सेइं ज़ोवं, "तू मेरो दास इस्राएल आस, अवं तीं मां अपनि महिमा बांदी केरेलो।"✝ 4 तैखन मीं अपने आपे सेइं ज़ोवं, "मीं त फुज़ूले मां मेहनत की, ते अपनि ताकत फुज़ूल ज़ैया की; फिरी भी पक्‍को मेरो न्याय यहोवा कांए ते मेरे मेहनतरो फल मेरे परमेशरेरे हथ्थे मांए।"

5 ते हुनी यहोवा ज़ैनी अवं गर्भे मां मेरी रच़ना की ताके अवं तैसेरो दास बेनतां याकूबे तैस कां वापस एन्हीं; मतलब इस्राएले तैस कां जम्हां केरीं। किजोकि अवं यहोवारे नज़री मां आदरारे काबल आईं; ते मेरो परमेशर मेरी ताकते। 6 तैन्नी मीं सेइं एन ज़ोवरूए, "ऐह त निकड़ी ज़ेरि गल्‍ले कि तू याकूबेरे गोट्लां केरो छुटकारो केरनेरे लेई ते इस्राएलेरे बच़ोरे लोकन तू फिरी वापस आन ते मेरो दास ठहरस; अवं कौमां-कौमां केरे लेई लौ ठहरेलो कि मेरी मुक्ति धेरतरे एक्‍की पासेरां होरि पासे तगर फैली गाए।"✝

7 ज़ैस मैन्हु घटिया समझ़तन, ज़ैस सेइं कौमन नफरते, ते ज़ै अधिकैरी केरो दासे, इस्राएलेरो छुटानेबालो पवित्र यहोवा इन ज़ोते, "राज़े तैस हेरतां खड़े भोल्हे ते हाकिम तैस कां झुकेले; इन यहोवारे खातर भोल्हु, ज़ै सच़्च़ो ते इस्राएलेरो पवित्रे ते ज़ैने तू च़ुनोरोस।"

8 यहोवा परमेशर एन ज़ोते, "एपनी खुशरे मौके मीं तेरी शुनोरीए, छुटानेरे दिहाड़े मीं तेरी मद्दत कियोरीए; अवं तेरी रक्षा केरतां तीं लोकां केरे लेई अक करार बनेइलो, ताके मुल्खे तू मज़बूत केरस ते उज़ड़ोरी ठारन तैन केरे अधिकारी लोकां केरे हथ्थे मां देस; ते कैदी लोकन सेइं ज़ोस कि कैदखाने मरां बेइर निस्सा।✝ 9 ते ज़ैना आंधरे मां आन तैन सेइं ज़ोस, ‘अपनो आप हिराथ।’ तैना बत्तरे बन्ने-बन्ने पेट भरन, सब नग्गे पहाड़न पुड़ तैन्न चरागा मैल्हेली।✝ 10 तैना इस्राएली गुलैमी मरां वापस एइतां नियन्ने या ट्लिशोरे न राले, न लूह न गर्मी तैन लग्गेली, किजोकि, तै ज़ै तैन पुड़ दया केरते, तैड़ी तैन केरो अगुवो भोल्हो, ते पैनेरे नागे कां तैन नेलो।✝ 11 अवं अपने सैरी पहाड़न पुड़ बत बनेइलो, ते मेरी सड़कां उच्‍ची की गैली। 12 हेरा, एना बड़े दूरेरां एज्जेले, ते, उत्तर ते पश्चिमे करां ते सीनी केरे मुल्खे मरां एज्जेले।" 13 हे अम्बर जयजयकार केर, हे धरती मघन भो; हे पहाड़व गल खोलतां जयजयकार केरा! किजोकि यहोवा शान्ति दित्तोरिए ते अपने दीन लोकन पुड़ दया कियोरीए।✝

14 पन सिय्योने ज़ोवं, "यहोवा अवं शारोरोईं, मेरे प्रभुए अवं बिसरोरोइं।" 15 "कुन एन भोइ सकते कि कोई अम्मा अपने दुद्ध पीते बच्‍चे बिसरी सकतीए ते अपने ज़र्मोरे मट्ठे पुड़ दया न केरे? हाँ तै त बिसरी सकतीए, पन अवं तीं न बिसरी सेखी। 16 हेर, मीं तेरी शकल अपने हथ्थेरी तेई पुड़ घेड़तां बनेवरीए; ते तेरी शहरपनाह हमेशा मेरी नज़री मां मेरे सामने बनोरी रहतीए। 17 तेरे बच्‍चे जल्दी एज्जी राहोरेन ते खण्डर बनानेबाले ते उज़ाड़ने बाले तेरे मझ़ाटेरां निस्सी राहोरेन। 18 एपनी एछ़्छ़ी खेड़ि केरतां च़ेवरे पासन तक, तैना सब अकोट्ठे भोइतां तीं कां एज्जी राहोरेन। यहोवारू एन ज़ोनूए कि मीं अपनि कसम, कि तू सच़्च़े तैन सेभन गेहनेरी ज़ेरि लाएली, ते तू लैड़ारी ज़ेरि अपने जानी मां तैन सेभन बन्धेली।"

19 "तेरी ज़ैना ठारां बेरान ते उज़ड़ोरिन, ते तेरे ज़ैना मुल्ख खण्डर ही खण्डर भेवरेन, तैन मां रानेबाले न लग्गेले, ते तीं नाश केरनेबाले दूर भोइ गाले। 20 तेरां मट्ठां ज़ैना तीं करां थिसोड़ां जेवरां थियां तैना फिरी तेरे कन्ने मां ज़ोले, ‘ई ठार इश्शे लेई घट्टे, असन होरी ठार दे ते असां तैस मां रहम।’ 21 तैखन तू अपने मने मां ज़ोली, ‘केनी एना मेरे लेई ज़र्माना? अवं त बगैर मट्ठन ते बाँझ भोवरी थी, गुलैमी मां अवं इड़ी ते उड़ी हंठती राई, ते एना केनि पाले? हेर, अवं अकैल्‍ली राहोरी थी; फिरी एना कोड़ि थिये?’"

22 प्रभु यहोवा एन ज़ोते, "हेर, अवं अपनो हथ कौमां-कौमां केरे पासे खड़ो केरेलो, ते मुल्खे-मुल्खेरे लोकां केरे सामने अवं अपनो झण्डो खड़ो केरेलो; तैखन तैना तेरां मट्ठां अपने कुम्मे मां आनेले, ते तेरी कुइयन अपने कंधे पुड़ छ़ुइतां तीं कां पुज़ाले। 23 राज़े तेरे बच्‍चन अपने सेवक ते तैन केरि रैनी दुद्ध पीयानेरे लेई तेरी घैई भोल्ही। तैना अपनु नक तल्‍ले मां घेस्तां तीं कां झुकेले ते तेरे पव्वां केरि धूड़ च़टेले। तैखन तू एन बुझ़ेली कि अव्वें यहोवा आईं; मेरो इंतज़ार केरनेबाले कधी शरमिन्दा न भोल्हे।"✝

24 कुन कोई जंगी बहादरेरे हथ्थे मरां लुटारो माल थसोड़ी सखते? कुन ज़ालम मैन्हेरे हथ्थे मरां कैदी छुटाए गातन? 25 फिरी भी यहोवा एन ज़ोते, "हाँ बहादर सिपेहेरे हथ्थे मरां कैदी छुटाए गाले, दुष्टेरो शिकार तैन करां छुटाव गालो, कि ज़ैना तीं सेइं लड़तन तैन सेइं अवं मुकदमो लड़ेलो, ते तेरे बच्‍चन अवं छुटेइलो। 26 ज़ैना तीं पुड़ अंधेर केरतन तैन अवं तैन्ना केरू मास खुवेइलो*, ते तैना अपनो खून पीतां* मतवाले भोइ गाले ज़ेन्च़रे नंव्वे दाछ़रे रस्से सेइं भोतन। तैखन सब मैन्हु बुझ़ेले कि तेरो बच़ानेबालो ते तेरो छुटानेबालो याकूबेरो शक्तिमान यहोवा अव्वें आईं।"✝