यशायाह 18

कूशेरे खलाफ एलान

1 अफ़सोस, फंघां केरे फड़कने सेइं भरोरे मुल्ख, तू ज़ै कूशेरे*18:1 कूशेरे एथोपिया दरियान पार आस; 2 ते समुन्दरे पुड़ दूतन निरैठरी किश्ती पुड़ बिशैलतां पैनेरी बत्तां एन ज़ोइतां भेज़ते, हे लूश केरनेबाले दूतव, तैस कौमी कां गाथ ज़ैसारे लोक लम्मे कदेरे ते हेरने खूबसूरतन, ज़ैना शुरू करां लेइतां डरनेबालेन, ज़ै नापने ते ढ्लन्च़ने बालो भी आहे, ते ज़ैन केरो मुल्ख दरियान सेइं बेन्टोरोए।

3 हे दुनियारे सारे लोकव, ते धेरती पुड़ सब रानेबालव, ज़ैखन झण्डो पहाड़न पुड़ खड़ो कियो गाए, त तैस हेरा! ते ज़ैखन नरशिंगो बज़ाव गालो, तैखन तैसेरी आवाज़ शुना! 4 किजोकि यहोवा मीं सेइं ज़ोवरूए, "धुपरी गेर्मी सेइं ते फसल कटनेरे वक्तेरे ओशरे ज़ेरो आरामे हेरतो रालो।" 5 किजोकि दाछ़ ट्लोड़ने करां पेइले ज़ैखन फूड़ू फुल्‍ली गान; ते दाछ़ां केरे गुच्छे पक्‍कन, तैखन यहोवा डालन ड्लेती सेइं कटेलो; ते फैलोरे डालन*18:5 डालन एथोपियारे सिपाही ट्लोड़ी-ट्लोड़ी अलग शारेलो। 6 तैना सब पहाड़ेरां मास खाने बालां च़ुड़ोलू ते जंगली जानबरां केरे लेई अकोट्ठे पेवरे राले। ते मास खाने बालां च़ुड़ोलू तैन खाते-खाते रित बीताले, ते सब किसमां केरे जंगली जानबर तैन खाते-खाते हिंवतड़ो कट्टेले।

7 तैस मौके ज़ैस कौमरे लोक लम्मे कदेरे ते हेरने खूबसूरतन, ज़ैना शुरू करां लेइतां डरनेबालेन, ते ज़ैना ताकतबर ते ढ्लन्च़ने बालेन, ते ज़ैन केरो मुल्ख दरियान सेइं बेन्टोरोए, तैस कौमी करां सेनां केरे यहोवारे नंव्वेरे ठैरी सिय्योन*18:7 सिय्योन मतलब यरूशलेम पहाड़े पुड़ सेना केरे यहोवा कां भेंट पुज़ाई गाली।