1 मोआब मुल्खेरे बारे मां नबूवत, एक्‍की राती मां मोआबेरू आर नगर उज़ड़ी जेवं ते तबाह भोइ जेवं, ते मोआबेरू कीर नगर एक्‍की राती मां उज़ड़ी जेवं ते तबाह भोइ जेव। 2 बैत ते दीबोन नगरेरे उच्‍ची ठारन पुड़ लेरां देनेरे लेई च़ैढ़ी जेवरेन; नबो ते मेदबा नगरन पुड़ मोआब हाय! हाय! केरते। तैन सेभी केरो दोग कटोरोए, ते तैन केरि दैढ़ी भी केटोरिन; 3 सड़कन मां तैना लोक टाट पलेटतां हंठतन; ते छतन पुड़ ते च़ुबत्तन मां लेरां देते हाय! हाय! केरतां हंठतन फिरतन। 4 हेशबोन ते एलाले नगरन मां चिन्डां लगोरेन मारने, ते तैन केरि लेरां यहसे तगर शुनोतिन; एल्हेरेलेइ मोआबेरे सिपाही चिन्डां मारने लगोरेन; तैन लोकां केरो दिल बड़ो उदासे। 5 मेरो दिल भी मोआबेरे लेई फरियाद केरते; तैसेरे रईस लोक सोअर, ते एग्लत-शलीशिया नगरे तगर नशतन। हेरा, लूहीत नगरेरे चड़ैई पुड़ तैना लेरां देते च़ैढ़ी राहोरेन; शुना, होरोनैम नगरेरी बत्ती मां तैना अपनो नाश भोनेरे लेई शोर मच़ाने लगोरेन। 6 निम्रीमेरू पानी शुक्‍की जेवं; घास फुकोई जेव ते हरियाली ट्लेक्‍की जेई, ते नमी किछ भी न राई। 7 एल्हेरेलेइ ज़ैन धन तैनेईं बच़ेइतां रख्खू, ते ज़ैन किछ तैनेईं अकोट्ठू कियूं, तैन सब तैना वैदरे पार घिन्तां च़लोरेन ज़ैस मां मजनू बुट आन। 8 एल्हेरेलेइ मोआबेरे च़ेवरे पासन शौर भोने लगोरीए, तैट्ठेरी शौर एगलैम ते बेरेलीमे मां भी शुनोने लगोरीए। 9 हालांकि दीमोन नगरेरे नाग खूने सेइं भेरतां भेरोए; फिरी भी अवं दीमोन नगरे पुड़ दुख छ़डेलो, अवं बच़ोरे मोआबेरे लोकां केरे लेई ते तैन केरे मुल्खेरे नश्शोरे लोकां केरे खलाफ शेर भेज़ेलो।