1 ज़ैस साल अश्शूरेरे सर्गोन राज़ेरे हुक्मे सेइं तर्त्ताने पलिश्ती अश्दोद नगरे मां एइतां तैस सेइं जंग की ते तैस पुड़ कब्ज़ो भी कियो, 2 तैस्से साल यहोवा आमोसेरे मट्ठे यशायाह सेइं ज़ोवं, "गेइतां अपने लख्खे मरां टाट खोल्‍ल ते अपने पव्वां केरि जुट्टी खोल्‍ल;" ते तैनी एन्च़रे कियूं, ते तै नग्गो ते नग्गे पांवेइं घुमतो फिरतो थियो। 3 तैखन यहोवा ज़ोवं, "ज़ेन्च़रे सेइं मेरो दास यशायाह ट्लेइ सालन करां लेइतां नग्गो ते नग्गे पांवेइं सेइं हंठतो राहोरोए, मिस्र ते कूशेरे लेई अक खास निशान भोल्हो। 4 तैस्से तरीके सेइं अश्शूरेरो राज़ो मिस्री ते कूशेरे लोकन कैदी बनेइतां तैन मुल्खे मरां कढेलो, कुन मट्ठन कुन बुढे, सेभन कैदी बनेइतां कढेलो, ते बगैर लिगड़ेईं ते नग्गे पांवेइं सेइं नेलो, तैना पूरे तरीके सेइं नग्गे भोल्हे, ज़ैस सेइं मिस्र शरमिन्दो भोए। 5 तैखन तैना कूशेरे वजाई सेइं ज़ैस पुड़ तैसेरी उमीद थी, ते मिस्रे पुड़ ज़ैन बड़ू घमण्ड थियूं, परेशान ते शरमिन्दा भोइ गाले। 6 ते दरियारे इस पासे बसनेबाले तैस मौके एन ज़ोले, ‘हेरा, ज़ैन पुड़ असां भरोसो रखते थिये ते ज़ैन कांजो असां अश्शूरेरे राज़े करां नशने बाले थिये तैन केरि एरी हालत भोइ जेई। त फिरी असां लोक केन्च़रे बच़मेले?’"