यशायाह 42

प्रभुएरो दास

1 यहोवा ज़ोते, मेरे दासे हेरा ज़ै मीं सुमैलतां रखोरोए, मेरे च़ुनोरे, ज़ैस पुड़ मेरो दिल खुशी आहे; मीं तैस पुड़ अपनो आत्मा दित्तोरोए, तै कौमां-कौमां केरे लेई बगैर तरफदैरां न्याय बांदो केरेलो।✝42:1 मत. 3:17;लूक. 9:35;2 पत. 1:7. 2 न तै चिन्डां मारेलो ते न उच्‍ची आवाज़ी सेइं गल केरेलो ते न सड़की मां तैसेरी आवाज़ शुनोली। 3 तै ढ्लन्च़ोरे निरैठरे डाले भी न ट्लोड़ेलो ते न हिशती बत्ती हिशालो, तै वफादैरी सेइं न्याय केरेलो। 4 न तै थकेलो ते न हिम्मत हारेलो ज़ांतगर तै न्याय धेरती पुड़ कायम न केरे; ते जज़ीरां केरे लोक तैसेरे शिक्षारो इंतज़ार केरेले।

5 यहोवा इश्शे परमेशरे ज़ैनी आसमान बनाव ते फैलाव, ते ज़मीनी मां ज़ैन किछ निस्ते तैन फैलाते ज़ै तैस पुड़ च़लनेबालन प्राण देनेबालो तैए आहे, तै इन ज़ोते: 6 "मीं यहोवा तू सच़्च़ैई सेइं कुजावरोस, अवं तेरो हथ ट्लेइतां तेरी हिफाज़त केरेलो; अवं तीं लोकां केरे लेई करार, ते कौमां केरे लेई लौ बनेइलो।✝42:6 लूक. 2:32;प्रेरित. 13:47. 7 कि तू कांना केरि एछ़्छ़ी खोल्‍लस, ते कैदी लोकन कैदी मरां छुटास ते ज़ैना आंधरे मां बिशोरेन तै काल कोठी मरां कढस।✝42:7 यशा. 61:1;प्रेरित. 26:18. 8 अवं यहोवा आईं, एन्ने मेरू नंव्वे; अपनि महिमा अवं कोन्ची होरि न देइलो, ते ज़ै तारीफ़ मेरे लेई आहे तै बनेवरी मूरतन न देइलो। 9 हेरा ज़ैना गल्‍लां केरि मीं नबूवत कियोरी थी तैना बीती जेई, हुनी अवं नेव्वीं गल्‍लां शुनाताईं; तैन केरे भोने करां पेइले शुनाताईं।"

तारीफ़रू गीत

10 हे समुन्दरे पुड़ च़लने बालाव, ते समुन्दरेरे सब रानेबालव, हे जज़ीरन पुड़ रानेबाले लोकव, तुसां सब अपने रानेबालन समेत यहोवारे लेई अक नंव्वू गीत ज़ोथ ते धेरतरे कूने-कूने पुड़ेरां तैसेरी तारीफ़ केरा।✝42:10 भज. 96:1-3;97:1. 11 सुनसान जगाह ते तैसेरी बेसती ते केदारेरे बस्सोरे ड्लाव्वां जयजयकार केरन, सेला नगरेरे रानेबाले लोकव जयजयकार केरन तैना पहाड़ां केरि च़ोटी पुड़ेरां उच्‍ची आवाज़ी सेइं ललकारन। 12 तैना यहोवारी महिमा बांदो केरन ते जज़ीरन मां रानेबाले लोक तैसेरी तारीफ़ केरन। 13 यहोवा बड़े बहादरेरो ज़ेरो निसेलो ते एक्‍की जंग लड़नेबाले सिपेहेरी ज़ेरि जलन भड़कालो, ते ज़ोरे सेइं ललकारेलो ते अपने दुश्मन पुड़ ज़ींत देलो।

14 परमेशर ज़ोते अवं काही च़िरेरो देंतो च़ुप राव, मीं किछ न ज़ोवं ते अपनो आप रोकतां रख्खो; पन एक्‍की गल्हे बिशने बैली कौन्शरो ज़ेरो चिन्डां मारताईं ते जल्दी-जल्दी शाह नेताईं। 15 अवं पहाड़न ते पहैड़न तबाह केरि देलो, ते तैन केरि सारी हरियाली शुकेइतां छ़डेलो; अवं दरियान जज़ीरे बनेइलो; ते तालाबन शुकेइतां छ़डेलो। 16 अवं कान्न तैस बत्तां च़लेइलो ज़ैस बत्तरो तैन पतो नईं, ते तैन एरी बत्तन पुड़ च़लेइलो ज़ैन तैना न ज़ानन; अवं तैन अग्री-अग्री आंधरे मां लौ बनेइलो ते टैरी बत्तां पेट्ठी बनेइलो। अवं एरां-एरां कम्मां केरेलो ते तैन न शैरेलो।✝42:16 लूक. 3:5;यशा. 29:18. 17 ज़ैना लोक बनेवरी मूरतन पुड़ भरोसो रखतन ते ढेलोरी मूरतन सेइं ज़ोतन, "तुसां इश्शे देबते आथ," तैन पत्रोवं नश्शनू ते शरमिन्दा भोनू पेलू।

हुक्म न मन्नेबालां केरे लेई खबरदारी

18 हे टोव्नव, ते हे कानाव, एछ़्छ़ी खोल्‍ला कि तुस हेरी सखथ! 19 मेरे दासेरे सिवा कौन कानोए? मेरे भेज़ोरे दूतेरो ज़ेरो कौन टोव्नोए? मेरे दोस्तेरो ज़ेरो कौन कानो या यहोवारे दासेरो ज़ेरो कौन कानोए? 20 तू बेड़ी गल्‍लन पुड़ नज़र केरतस पन तैन हेरस न; कन त खुलेन पन शुनस न।

21 यहोवा अपने धार्मिकतारे खातर इन रोड़ू लग्गू कि कानूनेरी बडीयाई जादे केरा।✝42:21 मत. 5:17-18;रोम. 7:12;10:4. 22 पन एना लोक लुट्टी जेवरेन, एना सारे कि खडन मां फसोरेन, ते काल कोठरन मां बन्द कियोरेन, इना ट्लाए जे ते तैन कोई न छुटाए; इना लुटी जे ते कोई हुक्म न दे कि इन वापस आनां। 23 तुसन मरां कौन एस पुड़ ध्यान देलो? कौन एजने बाले वक्तेरे लेई ध्याने सेइं शुनेलो? 24 केनी याकूब लुटव ते इस्राएल लुटेरां केरे कब्ज़े मां कियो? कुन यहोवा इन न कियूं ज़ेसेरे खलाफ असेईं पाप कियो? किजोकि तैनेईं तैसेरी बत्ती पुड़ च़लनू न चाऊ ते न तैसेरो कानून मन्नो। 25 एल्हेरेलेइ यहोवा तैन पुड़ अपने क्रोधेरी अग भड़काई ते जंगरी सखती तैस घेरे, ते अगर अग तैसेरे च़ेवरे पासन लेग्गी जेई, फिरी भी तै न समझ़ो; तै फुकोई भी जेव, फिरी भी तैनी सबक न शिखो।