1 सोर नगरेरे बारे मां बड़ो भारी वचन। तर्शीश नगरेरे ज़िहाज़व अफ़सोस, अफ़सोस, केरा; किजोकि सोर बरबाद भोइ जेव; तैड़ी न कोई बन्दरगाह ते न कोई छ़पनेरी ठारे! ऐह गल तैन पुड़ कित्ती लोकां केरे मुल्खे मां बांदी की जेवरीए। 2 हे समुन्दरे नेड़े राने बालाव; ज़ैन समुन्दरेरे पार गानेबाले सीदोनी बुपैरेईं धने सेइं भरे, च़ुप राथ! 3 शीहोरेरू* अन्न, ते नील दरिया कां पैदावार समुन्दरेरे बत्ती करां तैस मैलती थी, किजोकि तै ते कौमां केरे लेई बुपैरेरी ठार थी। 4 हे सीदोन, शरमिन्दा भो, किजोकि समुन्दरेरे मज़बूत ठारां इन ज़ोवरूए, "मीं न त गल्हे बिशनेरी तकलीफ भोइ ते न मीं बच्‍चे ज़ाए, ते न कधे कुइयां मट्ठां पालां।" 5 ज़ैखन सोर नगरेरी खबर मिस्र मुल्खे मां पुज़ेली, तैखन तैना शुन्तां बड़े मुसीबती मां पेले। 6 हे समुन्दरे नेड़े राने बालाव अफ़सोस, अफ़सोस, केरा! पार गेइतां तर्शीशे जो गाथ। 7 कुन ऐह तुश्शो खुश भोनेरो नगरे, ज़ैन पुराने ज़माने करां बस्सोरू थियूं; ज़ेसेरे पव तैस दूर मुल्खे मां बस्सनेरे लेई नेते थिये? 8 सोर नगरी ज़ै राज़न गेद्दी पुड़ बिशालती थी, ज़ैसारे बुपारी हाकिम थिये, ते ज़ेसेरे महाजन पूरे दुनियाई मां इज़्ज़तदार थिये, तैसेरे खलाफ केने एरी योजना बनाई?✝ 9 सेना केरे यहोवा ऐह योजना बनेवरीए, कि सैरी शान-ओ-शोकतरू गुमान घटिया केरतां छ़ड, ते दुनियारे इज़्ज़तदार लोकां केरू अपमान कराए। 10 हे तर्शीशेरे लोकव, नील दरियाएरे ज़ेरे अपने मुल्खे मां फैली गाथ, किजोकि हुनी तुश्शे लेई कोई बन्दरगाह बाकी नईं राहोरी। 11 यहोवा अपनो हथ समुन्दरे पुड़ रेखतां राज़े हिलेइतां छ़डो; यहोवा कनानेरे आसे पासेरे मज़बूत क़िले नाश केरनेरो हुक्म दित्तोरोए। 12 ते तैनी ज़ोवरूए, "हे सीदोन, हे भ्रष्ट कियोरी कुइये, हुनी तू खुश न भोल्ही, उठ ते पार गेइतां कित्ती लोकन कांजो च़ली गा, पन तीं तैड़ी भी चैन न मैल्हेली।"

13 कसदी लोकां* केरे मुल्खे हेर तै कौम हुनी नईं राहोरी; ते अश्शूरे तै मुल्ख जंगली जानबरां केरि ठार बनेवरीए। तैनेईं तैस मां मोरच़ो लेइतां अपने लेई गुम्मट बनाए ते तैन केरे मेहल डोलतां छ़डे, ते तैना बेरान केरतां छ़डे। 14 हे तर्शीशेरे ज़िहाज़व, अफ़सोस-अफ़सोस केरा, किजोकि तुश्शी बन्दरगाह हुनी उज़ड़ी जेवरीए। 15 तैस मौके अक राज़ेरे दिहाड़ेरे दिहाड़ां केरे मुताबिक 70 सालन तगर सोर बिसरोरो रालो। 70 सालां केरे बीतने पुड़ सोर गीते मां वेश्यारो ज़ेरो भोल्हो। 16 हे बिसरोरी वेश्या, सितार बज़ाती नगरे मां घुमती, ते रोड़ेच़ारे गीतां ज़ोती बज़ा ताके तैना लोक तीं फिरी याद केरन। 17 70 साल बीतने पुड़ यहोवा सोर नगरेरी खबर घिन्नेलो कि तै आबाद भोए, ते तै बदचलन कौन्श फिरी अपनो धंधो केरनेरे लेई वापस एज्जेली, तै सैरी दुनियारे सारे राज़े तैस सेइं बदकारी केरेले।✝ 18 पन सोरेरे बुपारेरी कमाई ते तैसेरे बुरे कम्मेरी कमाई, यहोवारे लेई पवित्र कि गाली; तै भण्डारे मां रख्खी गाली न अकोट्ठी की गाली, किजोकि ज़ैन तैसेरे बुपार केरने सेइं हासिल कियूं गालू, तैन तैसेरे कम्मे मां एज्जेलू, यहोवारे सामने रालू, कि तैन भरपूर भोजन ते चमकतां लिगड़ां मैल्हन।