1 यहोवा एन ज़ोते, "अफ़सोस मेरे तैन बगावत केरनेबाले बच्‍चन* पुड़ ज़ैना एरी गल्‍लां सोचतन ज़ैना मेरी तरफां नईं, करार त केरतन पन मेरी आत्मारे शिखालने सेइं नईं, ते एस वजाई सेइं पापे पुड़ पाप केरतन। 2 तैना मीं बगैर पुछ़ने मिस्रे जो च़ले गातन कि फ़िरौनेरी रक्षाई मां रान ते मिस्रे मां छ़पन। 3 एल्हेरेलेइ फ़िरौने पुड़ भरोसो तुश्शे लेई शरमरी वजा, ते मिस्रेरी छावी मां छ़पनू तुश्शे लेई निन्दारी वजा भोल्ही। 4 तैसेरे हाकिम सोअन नगरे मां एवरे त आन ते तैसेरे दूत हानेस नगरे मां पुज़ोरेन। 5 तैना एक्‍की एरी कौमरे ज़िरिये शरमिन्दा भोल्हे, ज़ैन सेइं तैन केरो कोई फैइदो न भोल्हो, तैस फैइदे ते मद्दतरे बदले तैना शरमिन्दा ते तैन केरि बेज़ती भोल्ही।"

6 दक्षिण सुनसान ठारारे जानबरां केरे बारे मां भारी वचन। तैना अपनि धन दौलत जुवान गधां केरि पिठी पुड़, ते अपने खज़ाने ऊँटां केरे कुबन पुड़ लेदतां, मुसीबत ते तेंगरे मुल्खे मां ज़मीनी मांमेइं भोइतां ज़ैड़ी शेर ते शेरनी ते ज़ैड़ी ज़ेरहे बाले उज़ाड़ने बाले सप रहतन तैन लोकां केरे पासे गेइ राहोरेन, ज़ैन सेइं तैन केरो कोई फैइदो नईं। 7 किजोकि मिस्रेरी मद्दत बेकार ते निकम्मीए, एल्हेरेलेइ मीं तैस जो बेलही बिशने बाली रहब* ज़ोवरूए।

8 यहोवा यशायाह सेइं ज़ोवं, हुनी गा ते तैन केरे लेई एक्‍की पेट्टी पुड़ लिखतां छ़ड, ते किताबी मां लिख, कि तै एजने बाले वक्तेरे लेई ते हमेशारे लेई अक गवाही बनोरी राली। 9 किजोकि तैना बगावत केरनेबाले लोक ते झूठ ज़ोने बालां मट्ठन, ज़ैना यहोवारी शिक्षाई शुन्नू न चान। 10 तैना नेबन सेइं ज़ोतन, "नबी न बना; ते नबी सेइं ज़ोतन कि इश्शे लेई ठीक नबूवत न केरा, बल्के असन सेइं मिट्ठी-मिट्ठी गल्‍लां ज़ोथ; ते धोखो देने बैली गल्‍लां केरा। 11 सही बत शारा, इस बत्ती मरां दूर भोथ, ते इस्राएलेरे पवित्र परमेशरेरे बारे मां इश्शे सामने न ज़ोथ।" 12 एल्हेरेलेइ इस्राएलेरे पवित्र परमेशर एन ज़ोते, "तुसां लोक ज़ैना मेरे इस वचने निकम्मे बुझ़तथ ते ज़ुलमे ते च़लाकी पुड़ भरोसो रखतथ बल्के सहारो नेतन। 13 एल्हेरेलेइ ई पाप तुश्शे लेई अक डंख बेनतां रालो ज़ैस मां अक दर्ज़ बेनतां राहोरीए ज़ै एक्‍की पले मां बिछ़ड़तां ढेर बेनि गालो। 14 ते कुम्हारेरे भांडेरो ज़ेरो ट्लुटतां चकनाचूर भोइ गालो, ते तैसेरे टुक्डां केरो कोई हिस्सो भी न मैल्हेलो, ज़ैस सेइं च़ुल्‍ली मरां अग कढी गाए या हावदे मरां पानी कढू गाए।"

15 इस्राएलेरे पवित्र प्रभु यहोवा एन ज़ोते, "मीं कां वापस एजने ते च़ुप केरने मां तुश्शो छुटकारोए। च़ुप राने ते भरोसो रखने मां तुश्शी बहादरी।" पन तुसेईं एरू न कियूं, 16 तुसां ज़ोने लगे, "नईं असां घोड़न पुड़ च़ेढ़तां नेश्शी गामेले," एल्हेरेलेइ तुसां नेश्शी गाले, ते इन भी ज़ोवं, "असां तेज़ दौड़ने बाले घोड़न पुड़ च़ेढ़तां नेश्शी गामेले," एल्हेरेलेइ तुश्शो पीछो केरनेबाले तुसन करां भी जादे तेज़ दौड़ने बाले भोल्हे। 17 एक्‍केरी धेमकी सेइं 1000 नश्शेले ते पंच़ां केरि धेमकी सेइं सारे नेश्शी गाले कि आखरी मां एक्‍की पहाड़े पुड़ एक्‍की डण्डेरे ज़ेरे या एक्‍की झण्डेरे ज़ेरे अकैल्‍ले रेइ गाले, ज़ैना निशानेरे लेई लाए गातन।

18 फिर भी यहोवा एल्हेरेलेइ च़िर लाते, कि तै तुसन पुड़ अनुग्रह केरे, ते एल्हेरेलेइ उच्‍चे केरेलो कि तुसन पुड़ दया केरे। किजोकि यहोवा न्याय केरनेबालो परमेशरे; धन आन तैना ज़ैना तैसेरे इंतज़ारे मां रहतन।

19 हे सिय्योनेरे लोकव तुस ज़ैना यरूशलेमे मां रहतथ; तुस फिरी कधी लेरां न देले, तै तुश्शी बिनती शुनते तुसन पुड़ ज़रूर अनुग्रह केरेलो; तै शुनते तुश्शी मन्नेलो। 20 ते चाहे प्रभु तुसन मुसीबतरी रोट्टी ते दुखेरू पानी भी दे, फिरी भी तुश्शू ज़ोवरू न छ़पेलू, ते तुस एपनी एछ़्छ़न सेइं अपने उपदेशक हेरते लाहेले। 21 ते ज़ैखन भी तुस देइने या बांए मुड़थ, तैखन तुश्शे पुतोरां यहोवारू वचन तुश्शे कन्ने मां एज्जेलू, "ईए बत्ते, एस्से पुड़ च़ला।" 22 तैखन तुसां तै चाँदी ज़ै तुश्शी बनेवरी मूरतन पुड़ मढ़ोरीए, ते तैन सोन्नू ज़ैस सेइं तुश्शी ढेलोरी मूरती सज़ेवरिन, अशुद्ध केरेले। तुसां तैन मेले लिगड़ां केरे ज़ेरे शैरतां छ़डेले, ते ज़ोले कि दूर भोथ। 23 तै तुश्शे लेई झ़ड़ी देलो कि तुसां उडारे मां बीज़ बेई सखथ, ते ज़मीनरी रोड़ी पैदावार सरहद्दी करां भी जादे भोल्ही। तैस मौके तुश्शे गोरू गब्बन खुल्‍लू बन च़रनेरे लेई मैल्हेलू। 24 ते दांत ते गधे ज़ैना तुश्शे ऊडारां केरे कम्मे एज्जेले, तैना बेलचे ते छज्जे सेइं छ़टोरो सुवादे बालो दानो खाएले। 25 ते तैस दिहाड़े ज़ेइस दुश्मन मारे गाले ते तैन केरे गुम्मट बिछ़ोड़े गाले त हर एक्‍की उच्‍चे पहाड़े ते पहैड़ी पुड़ेरां नाले ते पैनेरे नाग निस्सेले। 26 तैस मौके यहोवा अपने लोकां केरे ज़खमन बन्धेलो, ते तैन ज़खम बझ़ालो; ज़ैखन चैंदनरी लौ दिहाड़ेरी ज़ेरि, ते दिहाड़ेरी लौ सत गुणा जादे भोल्ही, मतलब एक्‍की हफतेरी लौ एक्सां भोल्ही।

27 हेरा, यहोवा दूरेरां च़लो एइते, तैसेरो क्रोध भड़कोरोए, ते तूएरी बिदलार खड़ी भोवरीए; ते तैसेरे ओठ क्रोधे सेइं भेरतन ते तैसेरी ज़िभ भस्म केरनेबाली अग्गरी ज़ेरि आहे। 28 ते तैसेरो शाह च़ढ़ने बाले दरियाएरे ज़ेरोए ज़ै गले तगर पुज़ते; तै सैरी कौमन नाश केरनेबाले छज्जे सेइं छ़ट्टेलो। ते मुल्खे-मुल्खेरे लोकन भड़कानेरे लेई तैन केरे ऐशी मां लगाम लाएलो।

29 तैखन तुस पवित्र तिहारेरी रातरां ज़ेरां गीतां ज़ोले, ते ज़ेन्च़रे लोक यहोवारे पवित्र पहाड़ेरे* पासे तैस सेइं मिलनेरे लेई, ज़ै इस्राएलेरी चट्टाने, बेंशोई बज़ाते गातन, तेन्च़रे तुश्शे मने मां भी खुशी भोल्ही। 30 यहोवा अपनि महिमा बाली आवाज़ शुनालो, ते अपनो क्रोध भड़कातो ते अग्गरी लौई सेइं भस्म केरतो, ते बेड़ी खतरनाक ऐंधी ते हछी झ़ड़ी ते आणी सेइं एपनी पेखड़ी केरि ताकत हिरालो।✝ 31 अश्शूर यहोवारे शब्देरी शेक्ति सेइं नाश भोइ गालो, तै तैस सोटे सेइं बालो। 32 ज़ैखन-ज़ैखन यहोवा तैन सज़ाह देलो, तैखन-तैखन डफली ते सानगी बज़ेली ते तै लगातार अपने हथ्थे सेइं तैस मारतो रालो। 33 बड़े च़रोकनो देंतो तोपेत तियार कियोरूए, तै राज़ां* केरे लेई रखोरोए, तै लम्मो चौड़ो ते डुग्घो भी बनेवरोए, तैट्ठेरी चखाई मां अग ते हछां कैड़न; यहोवा परमेशरेरी फुक गन्धकेरी अग्गरी ज़ेरि तैस फुकेली।