यहोवा ते मूरती
1 यशायाह ज़ोते, बाबेलेरे देबते बेल46:1 बेल बेले जो मरदूक भी ज़ोते थिये नबो तैसेरू मट्ठू मन्नू गातू। ते नबो एरे मूरती झ़ेड़तां झुकी जेई, तैन केरि मूरती पैलतू जानबरन पुड़ लेद्दोरिन; ज़ैना चीज़न तुस छ़ुइतां च़लते थिये, तैना हुन्ना भारी बोझ भोइ जेई ते थकने बाले जानबरन पुड़ लेद्दोरिन। 2 तैना दूईये देबतां केरि मूरती झुकी जेई, तैना तैस भारे छुटेईं न सखन, ते एप्पु भी गुलैमी मां च़ले जेवरेन।
3 यहोवा ज़ोते, "हे याकूबेरे घराना, हे इस्राएलेरे सब बच़ोरे लोकव, मेरे पासे कन लेइतां शुना; तुसन अवं तुश्शे ज़रमने करां छ़ुइतां राव ते ज़रमने करां च़लातो एवरोईं। 4 तुश्शे बुढापे मां भी तुश्शे बाल सुफेद भोने तगर अवं तुसन छ़ुइतां च़लेइलो, मीएं तुस बनाए ते तुसन छ़ुइतां च़लातो रेइलो।
5 "तुसां मेरी मसाल कैस सेइं देले ते मीं केसेरे बराबर बनाले, केस सेइं मेरो मेल कराले कि अस अक्कां ज़ेरां भोम? 6 ज़ै थेली मरां सोन्नू उलटालो या ट्लेकड़ी मां चाँदी तुलतन, ज़ै सुनारे मज़दूरी देइतां तैस सेइं देबतेरी मूरती बनाते, तैखन तैना तैस मूरती कां झुकतन ते पूज़ा केरतन। 7 तैना तैस अपने कंधे पुड़ छ़ुइतां च़लातन फिरी तैस नेइतां एक्की जगाई टकातन ते तै मूरती ज़ैड़ी खड़ी रहतीए। ज़ैठां तै हिल्ली न सखे। अगर कोई तैस कां मद्दतरे लेई फरियाद केरे, त तै शुनी न सखे ते मुसीबती करां तैस न बच़ेइ सके।
8 "हे पापी लोकव, एस गल्ली याद रखा ते खियाल केरा, एस पुड़ मन न लाथ। 9 तैना गल्लां याद केरा ज़ैना बड़े पेइले मीं तुश्शे लेई कियोरी थी, किजोकि परमेशर अव्वें आईं, होरो कोई परमेशर नईं, अव्वें परमेशर आईं ते मेरे बराबर कोई भी नईं। 10 अवं त आखरी वक्तेरी गल शुरू करां ते पुराने ज़माने करां तैस गल्ली ज़ोतो एवरोईं ज़ै हुन्ना तगर न भोइ। अवं ज़ोताईं, ‘मेरी योजना कायम राहेली ते अवं अपनि इच्छा पूरी केरेलो।’ 11 एल्हेरेलेइ अवं पूर्वेरां अक उकाब कुजाताईं; मतलब दूर मुल्खेरां अपने योजना पूरी केरनेबालो अक मैन्हु कुजाताईं। मीएं ई गल ज़ोवरीए ते अव्वें तैस पूरी केरेलो; मीं ई विचार कियोरोए ते तैस कामयाब भी केरेलो।
12 "हे सखत मने बाले लोकव, तुस ज़ैना धार्मिकताई करां दूर आथ, ध्याने सेइं मेरी गल्लां शुना। 13 अवं अपनि धार्मिकता नेड़े आन्ने बालो आईं, तै दूर नईं, ते मेरे छुटकारे मां च़िर न लग्गे ते अवं सिय्योने छुटकारो केरेलो ते इस्राएले इज़्ज़त देइलो।"